ކޮވިޑް އުފެދުނީ ޗައިނާގެ ލެބަކުންކަން ރިޕަބްލިކަންސްގެ ރިޕޯޓުން އެނގޭ!
3 އޯގަސްޓު 2021 | އަންގާރަ 17:53ރިޕަބްލިކަންގެ ރިޕޯޓުގައި ކޮވިޑް އުފެދުނު ގޮތުގެ ގިނަ ހެކިތަކެއް ހުރި
ވޫހާންގައި އާންމުން ކޮވިޑަށް ޓެސްޓު ކުރަނީ
ކޮވިޑް އުފެދުނު ގޮތާއިމެދު އެމެރިކާގެ ރިޕަބްލިކަންސްއިން އެކުލަވާލި ރިޕޯޓުން ކޮވިޑް އުފެދިފައިވަނީ ޗައިނާގެ ވޫހާން ސިޓީގެ ލެބުންކަން އެނގިއްޖެއެވެ.
ކޮވިޑް އުފެދުނު ގޮތާމެދު ރިޕަބްލިކަންސްއިން ހޯމަ ދުވަހު ހަދާފައިވާ ރިޕޯޓް އާންމުކޮށްފައިވާއިރު، މި ރިޕޯޓާމެދު މިހާތަނަށް އެމެރިކާގެ އިންޓެލިޖެންސްއިން ބަހެއް ބުނެފައެއް ނުވެއެވެ.
ރިޕަބްލިކަންސްއިން އެކުލަވާލި ރިޕޯޓުގައި, ކޮވިޑް އުފެދުނު ގޮތުގެ ތަފްސީލު ދީފައިވާއިރު، އެއަށް ބާރުދޭ ގިނަ ހެކިތަކެއް ވަނީ ހިމަނާފައެވެ. އޭގެ ތެރޭގައި ވޫހާންގެ ލެބޯޓްރީގެ ޗީފް، އެ ލެބޯޓްރީގައި މަސައްކަތް ކުރާ ސައިންސްވެރިންނަށް ފޮނުވާފައިވާ މެއިލްތަކެއް ވެސް ވަނީ ހިމަނާފައެވެ. މިއީ މީގެ ކުރިން އެމެރިކާގެ ސްޓޭޓް ޑިޕާޓްމަންޓުން ލީކުކޮށްލާފައިވާ މެއިލްތަކެއްވެސްމެއެވެ.
ކޮރޯނާވައިރަސް ދުނިޔެއަށް ފެތުރުނީ ވޫހާންގެ ލެބަކުން ލީކުވެގެން ކަމަށް ދެކެވޭ ވާހަކަ ފަހަކަށް އައިސް ވަނީ އިތުރުވެފައެވެ. ނަމަވެސް އެއީ އެއްވެސް ހަގީގަތެއް ނެތް ކޮންސްޕިރެސީ ތިއަރީއެއް ކަމަށް ޗައިނާ ސަރުކާރުން ދަނީ ބުނަމުންނެވެ.
އެއާއެކު ޗައިނާގެ ވޫހާން ސިޓީއިން 2019ވަނަ އަހަރުގެ ފަހުކޮޅުގައި ފެނުނު ކޮރޯނާވައިރަސްގެ ހަގީގަތް ރަނގަޅަށް ދެނެގަންނަން ފުރިހަމަ ތަހުގީގެއް ކުރަން ޑަބްލިއުއެޗްއޯއަށް ދަނީ ޕްރެޝަރު ބޮޑުވަމުންނެވެ.
މީގެ ކުރިން އެމެރިކާގެ ރައީސް ޖޯ ބައިޑެން ވަނީ އެގައުމުގެ ކަމާބެހޭ އިދާރާތަކަށް ކޮވިޑްގެ އަސްލު ދެނެގަތުމަށް ފުރިހަމަ ތަހުގީގެއް ހިންގުމަށް އަމުރުވެސް ކުރައްވާފައެވެ.
ޑަބްލިއުއެޗްއޯއިން ކޮވިޑް އުފެދުނު ގޮތުގެ ދިރާސާގެ ފުރަތަމަ މަރުހަލާ ނިންމާލާފައިވާއިރު، އެފަހަރު ޑަބްލިއުއެޗްއޯއިން ބުނީ ކޮވިޑް ފެތުރުނީ ލެބަކުން ލީކުވެގެން ކަމަށް ބެލުމުގެ ފުރުސަތު ކުޑަކަމަށެވެ. އެހެންނަމަވެސް ޖުލައި މަހުގެ ކުރީކޮޅު ޑަބްލިއުއެޗްއޯއިން ބުނީ އެ ތަހުގީގުގެ ދެވަނަ މަރުހަލާ ފަށަން ޖެހޭ ކަމަށެވެ. އެ މަރުހަލާގައި ޗައިނާގެ ލެބުތައް އޮޑިޓް ކުރާނެއެވެ. އެމެރިކާއިން އަންނަނީ ވޫހާންގައި ހުންނަ ބަޔޯޓެކް ލެބެއް ރަނގަޅަށް ބެލުމަށް ބާރުއަޅަމުންނެވެ.
