ރައީސް ނަޝީދަށް ދިން ހަމަލާގެ ތަހުގީގުގެ މުއްދަތު ދިގުކުރުމަށް ހުށަހަޅައިފި
3 އޯގަސްޓު 2021 | އަންގާރަ 10:11ތަހުގީގުގެ މުއްދަތު މި މަހުގެ 20 ވަނަ ދުވަހާ ހަމައަށް ދިގުކުރުމަށް ހުށަހަޅާފައިވަނީ
މި މައްސަލައިގެ ޝަރީއަތް ކޯޓުގައި އާންމުންނަށް ހުޅުވާލައިގެން ފެންނަ ގޮތަށް ކުރިއަށް ގެންދެވޭނެ ކަމަށް އުންމީދު ކުރައްވާ ކަމަށް ޕީޖީ ހުސައިން ޝަމީމް ވިދާޅުވި
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަަޝީދަށް އަމާޒުކޮށް ދިން ހަމަލާގެ ތަހުގީގުގެ މުއްދަތު ދިގުކުރުމަށް ހުށަހަޅާފައިވާ ކަމަށް ޕްރޮސެކިއުޓަރ ޖެނަރަލް (ޕީޖީ) ހުސެއިން ޝަމީމް ވިދާޅުވެއްޖެއެވެ.
އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ޕީޖީ ހުސެއިން ޝަމީމް ވިދާޅުވީ މި މަހުގެ 20 ވަނަ ދުވަހާ ހަމައަށް ތަހުގީގުގެ މުއްދަތު ދިގު ކުރުމަށް ހުށަހަޅާފައިވާ ކަމަށެވެ. ޝަމީމް ވިދާޅުވި މި މައްސަލައިގެ ޝަރީއަތް ކޯޓުގައި އާންމުންނަށް ހުޅުވާލައިގެން ފެންނަ ގޮތަށް ކުރިއަށް ގެންދެވޭނެ ކަމަށް އުންމީދު ކުރައްވާ ކަމަށެވެ. ކުރިއަތް އޮތްތާނގައި ޕީޖީ އޮފީހުގެ މަސައްކަތް އިތުރަށް ހަރުދަނާކޮށް ކުރައްވާނެ ކަމަށް ވެސް ވިދާޅުވިއެވެ.
ތަހުގީގު ކުރިއަށްދާކަން ފާހަގަކުރައްވައި ޝަމީމް ވިދާޅުވީ, އަމާޒަކީ މިކަމުގައި ބައިވެރިވާ އެންމެން ހޯދުން ކަމަށާއި، މިކަހަލަ ކަމެއް ތަކުރާރުނުވާނެ ގޮތް ހެދުން ކަމަށެވެ. ތަހުގީގު ކުރިއަށް ގޮސްފައިވާ ހިސާބާ ބެހޭގޮތުން މައުލޫމާތު ދިނުމަށް ޖުލައި 24 ވީ ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ފުލުހުން ބުނެފައިވަނީ މި ހަމަލާއާ ގުޅިގެން މިހާތަނަށް 10 މީހަކު ހައްޔަރުކޮށްފައިވާ ކަމަށެވެ. އެއީ ހަމަލާ ދިނުމުގައި އަމަލީ ގޮތުން ބައިވެރިވި މީހުންނާއި، ހަމަލާ ރޭވުމުގައި އިސްކޮށް ހަރަކާތްތެރިވި މީހުން ކަމަށެވެ. އަދި 6 މީހެއްގެ ވަނަވަރު ވެސް ފުލުހުން އާއްމުކޮށްފައިވެއެވެ.
މި މައްސަލާގައި ޕީޖީން ކުރަމުން ގެންދާ މަސައްކަތްތަކުގެ މައުލޫމާތު ހިއްސާކޮށްފައިވާއިރު މިއީ ރާއްޖޭގެ ތާރީޚުގައި ހިންގާފައިވާ ޓެރަރިޒަމްގެ އެންމެ ނުރައްކާތެރި ހަމަލާ ކަމަށް ވާއިރު، ފުލުހުންގެ ތަހުގީގުގެ މައްޗަށް ބިނާކޮށް ކާމިޔާބުކަމާއެކު މި މައްސަލަ ޕްރޮސެކިއުޓްކުރުމަށް ކުރަން ޖެހޭ އެންމެހާ ކަންކަން ޕީޖީ ކުރައްވާނެކަމުގެ ފުރިހަމަ ޔަގީންކަން އެބައޮތް ކަމަށް ހޯމް މިނިސްޓަރު ޝެއިހް އިމްރާން ވަނީ ވިދާޅުވެފައެވެ.
ފުލުހުން ބުނެފައިވަނީ މި ހަމަލާދިނުމަށް 3 ފަހަރު މަތިން މަސައްކަތް ކޮށްފައިވާކަން ތަހުގީގަށް ހޯދުނު ހޯދުންތަކުން އެނގިފައިވާ ކަމަށެވެ. އެގޮތުން ޖާނުންފިދާވެގެން ހަމަލާދިނުމަށް މަސައްކަތް ކުރި ކަމަށް ނޫސްވެރިންގެ ބައްދަލުވުމުގައި ފާހަގަކޮށްފައިވެއެވެ. އެންމެ ފުރަތަމަ ހަމަލާދިނުމަށް ރާވާފައިވަނީ ޔާގޫތުގެ ހުންނަ ސަރަހައްދުގައެވެ.
ދެވަނަ ފަހަރަށް ހަމަލާ ދިނުމަށް ރޭވީ ރައީސް ނަޝީދު ކަސްރަތަށް ނުކުންނަވާއިރު، މޭރީ ބްރައުން ރެސްޓޯރަންޓު ސަރަޙައްދުގައެވެ. ނަމަވެސް އެކަމުގައި ދަތިތަކެއް ހުރުމުން 3 ވަނަ ފަހަރަށް ހަމަލާ ރޭވީކަން އޭސީޕީ މުޙައްމަދު ރިޔާޒު ފާހަގަ ކުރެއްވިއެވެ. ރިޔާޒް ވިދާޅުވީ، ހަމަލާ ދިނުމަށް ބޭނުންކުރި ސައިކަލަކީ 2019 ވަނަ އަހަރު ގަނެފައިވާ ސައިކަލެއް ކަމަށެވެ.
