ޓޮޓެންހަމުގެ ފަރިތަކުރުންތަކަށް ނުކުންނަން ކޭން ދެކޮޅު

ޓޮޓެންހަމް ހޮޓްސްޕާގެ ފަރިތަކުރުންތަކުގައި ބައިވެރިވާން އެ ޓީމަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން ދެކޮޅު ހަދާފައިވާ ކަމަށް ރިޕޯޓުތައް ބުނެފިއެވެ.

އުމުރުން 28 އަހަރުގެ ކޭން މި ވަގުތު ޓޮޓެންހަމުގެ އެއްބަސްވުމުގައި ހުރީ 2024 ވަނަ އަހަރުގެ ޖޫން މަހުގެ ނިޔަލަށެވެ. 2011 ވަނަ އަހަރު ޓޮޓެންހަމުގެ ސީނިއާ ޓީމުން ޖާގަ ހޯދި ކޭނަށް މިހާތަނަށް ޓޮޓެންހަމާއެކު ބޮޑު ކާމިޔާބީއެއް ހޯދިފައެއް ނުވެއެވެ.

މީގެ ކުރިން ބައެއް މީޑިއާތަކުން ވަނީ ފުޓްބޯޅައިގެ އެންމެ ބޮޑު ޓްރޮފީތައް ހޯދުމަށް ބޭނުންވާތީ ޓޮޓެންހަމް ދޫކޮށްލަން ކޭން ނިންމާފައިވާ ކަމަށް ރިޕޯޓުކޮށްފައެވެ. އެއާއެކު ކޭން ހޯދަން މެންޗެސްޓާ ސިޓީން މަސައްކަތް ކުރަމުން އަންނަ ކަމަށާއި، އަދި އޭނާ ހޯދުމަށް ސިޓީން 100 މިލިޔަން ޕައުންޑް ޚަރަދުކުރަން ތައްޔާރަށް އޮތް ކަމަށްވެސް ވަނީ ރިޕޯޓުކޮށްފައެވެ.

ދާދި ފަހުން ބޭއްވި ޔޫރޯ ފުޓްބޯޅަ މުބާރާތަށްފަހު ކޭން ތިން ހަފުތާގެ ޗުއްޓީއަކަށް ދިޔައިރު، ހޯމަ ދުވަހަކީ ކޭން ޓޮޓެންހަމުގެ ފަރިތަކުރުންތަކަށް ނުކުންނަން ޖެހޭ ދުވަހެވެ. އެކަމަކު ހޯމަ ދުވަހު ޓޮޓެންހަމުން ކުރިއަށްގެންދިޔަ ފަރިތަކުރުންތަކުގައި އޭނާ ބައިވެރިވެފައެއް ނުވެއެވެ. އިނގިރޭސި މީޑިއާ ރިޕޯޓުތައް ބުނާ ގޮތުން ފަރިތަކުރުންތަކުގައި ބައިވެރިވާން ކޭން ބޭނުން ނުވަނީ ޓޮޓެންހަމް ދޫކޮށްލަން ބޭނުންވާތީއެވެ.

އެކަމަކު މީގެ ކުރިން ދިން އިންޓަވިއުއެއްގައި ޓޮޓެންހަމުގެ ކޯޗުގެ މަގާމާ ދާދި ފަހުން ހަވާލުވި ނޫނޯ އެސްޕިރީޓޯ ސަންޓޯ ބުނީ ކޭން އަކީ މި ވަގުތު ޓޮޓެންހަމުގެ ކުޅުންތެރިއެއް ކަމަށާއި، އެހެންކަމުން ކޭންގެ ޓްރާންސްފާއާ ގުޅޭގޮތުން އިތުރު ވާހަކައެއް ދައްކަން ބޭނުންނުވާ ކަމަށެވެ.

މި ފަހަރުގެ ޓްރާންސްފާގައި ކޭން ޓޮޓެންހަމް ދޫކޮށްލާނެ ކަމަށް ބެލެވޭއިރު، ޓޮޓެންހަމް ދޫކޮށްލި ނަމަވެސް، ކޭން ބޭނުންވަނީ އިނގިރޭސި ޕްރިމިއާ ލީގުގައި ކުޅުމަށް ކަމަށް ރިޕޯޓުތައް ބުނެއެވެ. އެގޮތުން ޓޮޓެންހަމް ދޫކޮށްލާނަމަ، ކޭން ބޭނުމީ ސިޓީ ނުވަތަ މެންޗެސްޓާ ޔުނައިޓެޑަށް ދާން ކަމަށްވެސް ވަނީ ރިޕޯޓުކޮށްފައެވެ.

ޓޮޓެންހަމާއެކު ކޭންއަށް މިހާތަނަށް ބޮޑު މުބާރާތެއް ކާމިޔާބުނުކުރެވުނު ނަމަވެސް، އޭނާ ވަނީ 2018-2019 ވަނަ ސީޒަނުގެ ޔުއެފާ ޗެމްޕިއަންސް ލީގުގެ ފައިނަލާއި، 2014-2015 އަދި މިދިޔަ ސީޒަނުގެ އިނގިރޭސި ލީގު ކަޕުގެ ފައިނަލުގައި ކުޅެފައެވެ. އަދި ކޭން ވަނީ މިހާތަނަށް ޓޮޓެންހަމަށް ކުޅެދިން 336 މެޗުގައި ކޭން ވަނީ 221 ލަނޑު ޖަހާފައެވެ.