ޓްރެފިކް ޖޫރިމަނާ 10،000ރ. އަށްވުރެ މަތިވެއްޖެނަމަ ކޮމިއުނިޓީ މަސައްކަތުން އެ ފައިސާ އަނބުރާ ހޯދުމުގެ ބާރު މީރާއަށް ލިބިގެންވާކަމަށް ސަބް އިންސްޕެކްޓަރ އޮފް ޕޮލިސް ޠަލްޙަތު އަޙުމަދު ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމުގައި ވާހަކަދައްކަވަމުން ޠަލްޙަތު ވިދާޅުވީ ޓްރެފިކް ޖޫރިމަނާ ދައުލަތަށް ހޯދުމުގައި ވެސް އަމަލުކުރަނީ ދައުލަތުގެ މާލިއްޔަތު ޤާނޫނުގެ ދަށުން ކަމަށެވެ. މީހަކު ދައުލަތަށް ދައްކަންޖެހޭ ޖޫރިމަނާއެއް ވާނަމަ އެ ޖޫރިމަނާއެއް ކަނޑައަޅާފައި އޮންނަނީ ދައުލަތަށް ދައްކަންޖެހޭ މަދަނީ ދަރަންޏެއްގެ ގޮތުގައި ކަމަށެވެ. މި ގޮތަށް ކަން އޮތުމުން އެ ލާރި އަނބުރާ ހޯދަން އެމީހަކާ ދެކޮޅަށް ދައުވާ ކުރުމުގެ ބާރު މީރާއަށް ލިބިގެންވާކަމަށް އޭނާ ވިދާޅުވިއެވެ.
ޠަލްޙަތު ވިދާޅުވީ ދައުލަތަށް އަނބުރާ ދައްކަންޖެހޭ ދަރަނި 10،000ރ. އަށްވުރެ މައްޗަށް އަރައިފިނަމަ އެމީހަކު ކޮމިއުނިޓީ މަސައްކަތަށް ނެރުމަށް ޝަރީއަތުގައި އެދުމުގެ ބާރު ވެސް މީރާއަށް ލިބިގެންވާކަމަށެވެ. މިގޮތުގެމަތިން ދައުލަތުން ކަނޑައަޅާ ތަނެއްގައި ވަކި ވަގުތެއް ވަންދެން މަސައްކަތްކުރަންޖެހޭނެ ކަމަށާއި، އެމީހަކު އެތަނުގައި މަސައްކަތްކުރިކަމުގެ ރަސީދެއް މީރާއަށް ހުށަހެޅުމުން, މީރާއިން އެބައި އެމީހެއްގެ ދަރަނިން އުނިކުރަމުންދާނެ ކަމަށެވެ.
ފަހަކަށް އައިސް ކޮވިޑް-19 ފެތުރުން ކޮންޓްރޯލްކުރުމަށް އަޅާފައިވާ ގިނަ ފިޔަވަޅުތަކަކާ ޚިލާފުވެގެންނާއި، މަގުމަތީގައި އުޅޭއިރު އަމަލުކުރުމަށް ފުލުހުން ހަދާފައިވާ އެކި ގަވައިދުތަކާ ޚިލާފުވެގެން ގިނަ ބަޔަކު ބޮޑު އަދަދުތަކުން އަންނަނީ ޖޫރިމަނާކުރަމުންނެވެ. ދުވާލެއްގެ މައްޗަށް އެތައް ބަޔަކު ޖޫރިމަނާކުރަމުން އަންނައިރު، މި ހާލަތާ ގުޅިގެން ފައިސާ އަނބުރާ ދެއްކުމުގައި ދަތިތަކެއް ހުންނަ ކަމުގެ ޝަކުވާ ގިނަ ބަޔަކު ކުރަމުން ގެންދެއެވެ.
