މި އަހަރުގެ ދެވަނަ ކުއާޓާގައި އުރީދޫއަށް ލިބުނު ސާފު ފައިދާ 20 އިންސައްތަ ދަށަށް ގޮސްފައިވާ ކަމަށް އެ ކުންފުނީގެ ކުއާޓަލީ ރިޕޯޓުން ދައްކައިފިއެވެ.
އުރީދޫގެ 2021 ވަނަ އަހަރުގެ ކުއާޓަލީ ރިޕޯޓް ދައްކާގޮތުން އަހަރުގެ ދެވަނަ ކުއާޓާގައި އެ ކުންފުންޏަށް ސާފު ފައިދާގެ ގޮތުގައި ލިބިފައި ވަނީ 97.6 މިލިއަން ރުފިޔާއެވެ. މިއީ މި އަހަރުގެ ފުރަތަމަ ކުއާޓާގައި އެ ކުންފުންޏަށް ސާފު ފައިދާގެ ގޮތުގައި ލިބުނު 122.3 މިލިއަން ރުފިޔާއާ އަޅާ ބަލާއިރު، 24.7 މިލިއަން ރުފިޔާ މަދު އަދަދެކެވެ.
އުރީދޫން އާންމުކޮށްފައިވާ ތަފާސްހިސާބުތައް ދައްކާ ގޮތުން އަހަރުގެ ފުރަތަމަ ކުއާޓާގައި އެ ކުންފުންޏަށް އާމްދަނީގެ ގޮތުގައި 447.1 މިލިއަން ރުފިޔާ ލިބުނު ނަމަވެސް ދެ ވަނަ ކުއާޓާގައި އެ އަދަދު ވަނީ 423.3 މިލިއަން ރުފިޔާއަށް ދަށްވެފައެވެ.
ކޮވިޑް-19ގެ ސަބަބުން ކުންފުނީގެ އާމްދަނީއަށް ވަރަށް ބޮޑު އަސަރެއް ކޮށްފައިވާކަމަށް އުރީދޫއިން ފާހަގަކުރާއިރު، އިޔާރ އޮން އިޔާރ ބޭސިސް އިން ކުންފުނީގެ ގްރޮސް ރެވެނިއު 3.3 އިންސައްތަ އިތުރުވެފައިވާ ކަމަށް އުރީދޫއިން ފާހަގަކުރެއެވެ.
ދެވަނަ ކުއާޓާގައި އުރީދޫގެ ސުޕަރނެޓް ފިކްސްޑް ބްރޯޑްބޭންޑްގެ ޚިދުމަތް ރާއްޖޭގެ ތިން ރަށަކަށް މުޅިން އަލަށް ވަނީ ފޯރުކޮށްދީފައެވެ. އަދި ފިކްސްޑް ބްރޯޑްބޭންޑްގެ ޚިދުމަތް ރާއްޖޭގެ 36 ރަށަކަށް މުޅިން އަލަށް ފޯރުކޮށްދޭން ވަނީ ފަށާފައެވެ. އޭގެ އިތުރުނެ ނިމުނު ކުއާޓާގައި އުރީދޫއިން ވަނީ މުޅިން އަލަށް އާޗާ ޕްރިޕެއިޑް ޕްލޭންތަކަކާއި، އުރީދޫ ޑޭޓާ ރޯލްއޯވަރގެ ޚިދުމަތް ތައާރާފުކޮށްފައެވެ. ރޯދަ މަހާއި ފިތުރު އީދާ ދިމާކޮށް ހާއްސަ އޮފަރތަކެއް ވެސް އުރީދޫއިން ވަނީ ދެ ވަނަ ކުއާޓާގެ ތެރޭގައި ތައާރަފުކޮށްފައެވެ.
