ޔޫކްރޭނުގެ ކޯޗުކަމުން ޝެވްޗެންކޯ ވަކިވެއްޖެ

ޔޫކްރޭނުގެ ގައުމީ ފުޓްބޯޅަ ޓީމުގެ ކޯޗުގެ މަގާމުން ކުރީގެ މަޝްހޫރު ފޯވާޑް އަންދްރޭ ޝެވްޗެންކޯ ވަކިވެއްޖެއެވެ.

އުމުރުން 44 އަހަރުގެ ޝެވްޗެންކޯ އެންމެ ފުރަތަމަ ޔޫކްރޭން ޓީމާ ހަވާލުވީ 2016 ވަނަ އަހަރު ފެބްރުއަރީ މަހު އެސިސްޓަންޓް ކޯޗެއްގެ ގޮތުގައެވެ. އެ އަހަރުގެ ޔޫރޯއަށްފަހު ޔޫކްރޭން ކޯޗުގެ މަގާމުން މައިހޭލޯ ފޮމެންކޯ ވަކިކޮށް، ޝެވްޗެންކޯއަށް ވަނީ ގައުމީ ޓީމުގެ ހެޑް ކޯޗުކަން ރަސްމީކޮށް ހަވާލުކޮށްފައެވެ.

ޝެވްޗެންކޯގެ އިރުޝާދުގެ ދަށުން މި ފަހަރުގެ ޔޫރޯގައި ޔޫކްރޭން ވަނީ މޮޅު ކުޅުމެއް ދައްކާފައެވެ. އެގޮތުން މި ފަހަރުގެ މުބާރާތުގެ ކުއާޓާގައި ޔޫކްރޭން ވާދަކުރިއިރު، ކުއާޓާއިން ޔޫކްރޭން ކެޓީ ރަނަރަޕްކަން ހޯދި އިންގްލެންޑް އަތުން 4-0 ގެ ނަތީޖާއަކުން ބަލިވުމުންނެވެ. މި ފަހަރުގެ ޔޫރޯގެ ކުއާޓާގައި ޔޫކްރޭން ވާދަކުރިއިރު، މިއީ އެ ގައުމުގެ ތާރީޚުގައި މި މުބާރާތުގެ ކުއާޓާގައި ކުޅުނު ފުރަތަމަ ފަހަރެވެ.

އެހެންނަމަވެސް އާދީއްތަ ދުވަހު ޝެވްޗެންކޯ ވަނީ އަމިއްލަ އިންސްޓާގްރާމުގައި ހިއްސާކުރި މެސެއްޖެ ޔުކްރޭނުގެ ކޯޗުކަމުން ވަކިވިކަން އިއުލާން ކޮށްފައެވެ. ޔުކްރޭނުގެ ކޯޗުކަމުން ޝެވްޗެންކޯ ވަކިވިއިރު، އޭނާ މިހާތަނަށް ޓީމަކަށް އިރުޝާދުދީފައިވަނީވެސް ޔޫކްރޭނުގެ ގައުމީ ފުޓްބޯޅަ ޓީމަށް އެކަންޏެވެ.

ޔޫކްރޭނުގައި 2012 ވަނަ އަހަރު ބޭއްވި ޔޫރޯ ފުޓްބޯޅަ މުބާރާތަށްފަހު ޝެވްޗެންކޯ ފުޓްބޯޅަ ކުޅުން ހުއްޓާލިއިރު، އޭނާއަކީ ޔޫކްރޭން ޓީމަށް މިހާތަނަށް އެންމެ ގިނަ ލަނޑު ޖަހާދީފައިވާ ކުޅުންތެރިޔާއެވެ. އެގޮތުން ފުޓްބޯޅަ ކުޅުން ހުއްޓާލުމުގެ ކުރިން ޝެވްޗެންކޯ ވަނީ ޔޫކްރޭން ޓީމަށް 111 މެޗު ކުޅެދީ 48 ލަނޑު ޖަހާފައެވެ.

މީގެ އިތުރުން 21 ވަނަ ގަރުނުގައި ދުނިޔޭގެ ފުޓްބޯޅައިގައި ފެނުނު މޮޅެތި ފޯވާޑުންގެ ތެރެއިން ޝެވްޗެންކޯ ހިމެނޭއިރު، އޭނާ ވަނީ ޔޫރަޕުގެ މޮޅު ކުޅުންތެރިޔާގެ މަގާމުވެސް ހޯދާފައެވެ. އަދި ވަނީ ޗެލްސީ އާއި، އޭސީ މިލާނަށްވެސް ކުޅެ، ގިނަ ކާމިޔާބީތައް ހޯދާފައެވެ.