މުލިއާގެ ކައިރިން ބޮމުގެ އިންޒާރުދިން މީހާގެ ބަންދަށް އަނެއްކާވެސް 15 ދުވަސް
މުލީއާގެ ކައިރިއަށްގޮސް ދެ މީހަކު ވަނީ އެ މީހުން އެވަގުތު ގެންގުޅުނު ފޮށިގަނޑެއްގައި ބޮމެއް އޮތްކަމަށް ބުނެ އިންޒާރުދީފައި
މުލިއާގެ - މުލިއާގެ ގޮއްވާލާނެ ކަމަށް ބުނި މީހާގެ ބަންދަށް އިތުރު 15 ދުވަސް ވަނީ ޖަހާފައި
މުލިއާގެ ގޮއްވާލާނެ ކަމަށް ބުނި މީހާގެ ބަންދަށް އަނެއްކާވެސް 15 ދުވަސް ޖަހައިފިއެވެ.
ރައީސުލްޖުމްހޫރިއްޔާ ދިރިއުޅުއްވާ ރަސްމީގެކޮޅު، މުލިއާގެ ކައިރިއަށްގޮސް، އެތަން ގޮއްވާލާނެކަމަށްބުނެ އިންޒާރުދިން ދެ މީހުން ހައްޔަރު ކޮށްފައިވަނީ ޖުލައި މަހުގެ 9 ވަނަ ދުވަހުއެވެ.
މުލީއާގެ ކައިރިއަށްގޮސް ދެ މީހަކު ވަނީ އެ މީހުން އެ ވަގުތު ގެންގުޅުނު ފޮށިގަނޑެއްގައި ބޮމެއް އޮތްކަމަށް ބުނެ އިންޒާރުދީފައެވެ. އަދި އެ ތަން ގޮއްވާލާނެކަމަށް ބުނުމާއެކު ސަލާމަތީ ބާރުތަކުންވަނީ އެ މީހުން ހައްޔަރުކޮށްފައެވެ. އެންމެ ފުރަތަމަ މި ދެ މީހުން ހިފެހެއްޓީ މުލިއާގޭގެ ސަލާމަތީ ކަންކަން ބަލަހައްޓަން ތިބި ސިފައިންނެވެ. ފުލުހުންގެ ޚާއްސަ ޓީމަކުންވަނީ އެ ސަރަހައްދަށްގޮސް، އެމީހުން ގެންގުޅުނު ފޮށިގަނޑާއި އެމީހުން ވެސް ބަލައި ފާސްކޮށް ދެ މީހުން ހައްޔަރުކޮށްފައެވެ.
މި މައްސަލައިގައި ހައްޔަރު ކުރި 2 މީހުންގެ ތެރެއިން އެކަކު ވަނީ ދޫކޮށްލާފައިވައެވެ. މިހާރު ފުހުންގެ ބެލުމުގެ ދަށުގައި ހުރީ ފޮށިގަނޑުގައި ބޮމެއް އޮތްކަމަށް ބުނި މީހާ ކަމަށް ފުލުހުންވަނީ ބުނެފައެވެ.
މި މައްސަލާގައި ހައްޔަރުކުރި ދެ މީހުންނަކީ ވެސް މަސްތުވާތަކެތީގެ ރެކޯޑް އޮންނަ ދެ މީހުންނެވެ. މި މައްސަލާގައި ބަންދުގެ މުއްދަތު އިތުރުކުރި މީހާގެ މައްޗަށް ފުލުހުން ކުރަނީ ޓެރަރިޒަމްގެ އަމަލެއް ހިންގާނެކަމުގެ އިންޒާރުދިނުން ނުވަތަ ބިރު ދެއްކުމުގެ ތުހުމަތާއި ބިރު ދެއްކުމާއި ދޮގު ޚަބަރު ދިނުމުގެ ތުހުމަތެވެ.
