ފެނަކަ ކޯޕަރޭޝަނުން ފިއުލް ސަޕްލައިއަށް ދައްކަންޖެހޭ ފައިސާ ބަރާބަރަށް ދައްކަމުން ދާ ކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރ އަޙުމަދު ސަޢީދު މުޙައްމަދު ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމުގައި ވާހަކަދައްކަވަމުން ސަޢީދު ވިދާޅުވީ އެ ކުންފުނިން ފިއުލް ސަޕްލައި މޯލްޑިވްސްއަށް ދައްކަންޖެހޭ ފައިސާތަކެއް އޮތް ކަމަށް ދެކެވޭ ވާހަކައަކީ އެސްޓީއޯގެ ސީއީއޯ ދެއްކެވި ވާހަކައެއްގެ މާނަ އޮޅުވާލައިގެން ބަޔަކު ދައްކަމުންދާ ވާހަކައެއް ކަމަށެވެ. އަދި މިފަދަ މޭރުމަކުން އެސްޓީއޯގެ ސީއީއޯ އެއްވެސް ވާހަކައެއް ދައްކަވާނެ ކަމަށް ގަބޫލުފުޅެއް ނުކުރައްވާ ކަމަށާއި، އެ ކުންފުނިން ފިއުލް ސަޕްލައިއަށް ދައްކަންޖެހޭ ފައިސާ ބަރާބަރަށް ދައްކަމުންދާކަމަށެވެ.
ސަޢީދު ވިދާޅުވީ 2018 ވަނަ އަހަރުގެ ޑިސެމްބަރު މަހު ކުންފުންޏާ ހަވާލުވެވަޑައިގަތްއިރު، ފެނަކައިން ފިއުލް ސަޕްލައިއަށް ދައްކަންޖެހޭ ފައިސާގެ އަދަދު ހަތްސަތޭކަ ތިރީސް ހަތް މިލިއަން ހަތްސަތޭކަ ފަންސާސް ފަސް ރުފިޔާއަށް އަރާ ކަމަށެވެ. މިއަހަރުގެ ޖޫން މަހުގެ ނިޔަލަށް 1 ބިލިއަނަށްވުރެ ގިނަ ރުފިޔާ ފިއުލް ސަޕްލައިއަށް ދައްކާފައިވާކަމަށާއި, މިހާތަނަށް ނުދެއްކި އޮތީ ފަންސާހަކަށް މިލިއަން ރުފިޔާ ކަމަށެވެ.
ފެނަކަ ކޯޕަރޭޝަނަށް އެސްޓީއޯއިން ތެޔޮ ގަންނަނީ 6 އޭޕްރީލް 2017 ވަނަ އަހަރު ވެފައިވާ އެެއްބަސްވުމެއްގެ ދަށުން ކަމަށާއި, މި އެގްރީމެންޓުގައި އެސްޓީއޯއިން ކުރަންޖެހޭ ކަންތައްތަކާއި، ފެނަކައިން ކުރަންޖެހޭ ކަންތައްތައް ވަރަށް ސާފުކޮށް ބަޔާންކޮށްފައިވާ ކަމަށާއި، މިހާތަނަށްވެސް ދެ ކުންފުނިން މަސައްކަތްކޮށްފައިވަނީ ވަރަށް ގުޅިގެން ކަމަށް ސަޢީދު ވިދާޅުވިއެވެ.
އެހެންކަމަށްވުމާއެކު، ފެނަކައާއި ފިއުލް ސަޕްލައި މޯލްޑިވްސްއާ ބެހޭގޮތުން މިފަދަ ވާހަކައެއް ދައްކަންޖެހޭ ސަބަބެއް ނޭނގުނު ކަމަށް ސަޢީދު ވިދާޅުވިއެވެ.
