ރައްޔިތުންގެ މަޖިލީހުގެ ރައީސްގެ ގެކޮޅު އެޅުމަށް ދަންޑެހެލުގެ ޕާކިންގ ހުސްކޮށްފި

ރައްޔިތުންގެ މަޖިލީހުގެ ރައީސަށް ސަރުކާރުގެ ފަރާތުން ހަމަޖައްސައިދޭ ގެކޮޅު އިމާރަތްކުރުމަށް ދަންޑެހެލުގެ ޕާކިންގ ހުސްކޮށްފިއެވެ.

މެއި މަހުގެ 6ވަނަ ދުވަހުގެ ރޭ ރައީސް ނަޝީދަށް އަމާޒުކޮށް, ދިން ހަމަލާއާ ގުޅިގެން އެމަނިކުފާނާއި އުއްތަމަ ފަޑިޔާރުގެ ސެކިއުރިޓީ ކަންކަން އިތުރަށް ވަރުގަދަކުރުމަށް ސަރުކާރުން ވަނީ ނިންމާފައެވެ. ސަރުކާރުން މިކަން ކުރަނީ ދެ ގާނޫނަކަށް އިސްލާހު ގެނެސްގެންނެވެ. އެއީ ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނަށް 1 ވަނަ އިސްލާހު ގެނައުމުގެ ބިލާއި، ދިވެހިރާއްޖޭގެ ފަނޑިޔާރުންގެ ގާނޫނަށް 6 ވަނަ އިސްލާހު ގެނައުމުގެ ބިލެވެ. މި ދެ ބިލް ރައީސުލްޖުމްހޫރިއްޔާ ތަޞްދީޤު ކުރައްވާފައިވަނީ މިދިޔަ ޖޫން މަހުގެ 30 ވަނަ ދުވަހުއެވެ.

ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނަށް 1 ވަނަ އިސްލާހު ގެނައުމުގެ ބިލުގައިވާ ގޮތުން, ރައްޔިތުންގެ މަޖިލީހުގެ ރައީސާއި އެމަނިކުފާނުގެ އާއިލާގެ ބޭފުޅުން ދިރިއުޅުއްވާނެ ރަސްމީ ތަނަކާއި، އެ ތަނަށް ބޭނުންވާ އެކަށީގެންވާ އަދަދެއްގެ މުވައްޒަފުންނާއި، އެ ތަނަށް ހިނގާނެ ޚަރަދު، ދައުލަތުގެ ފަރާތުން ހަމަޖައްސައިދޭންވާނެއެވެ. އަދި ރައްޔިތުންގެ މަޖިލީހުގެ ރައީސް ދިރިއުޅުއްވުމަށް ހަމަޖައްސައިދޭ ރަސްމީ ތަނަކީ، ސަލާމަތީގޮތުން އަޅަންޖެހޭ ފިޔަވަޅުތައް އެޅޭނެ ގޮތަކަށް ހުރި ތަނެއްކަމަށް ވާންޖެހޭނެ ކަމަށާއި، އެ ތަނުގެ ސެކިއުރިޓީ ބަލަހައްޓާނީ، މޯލްޑިވްސް ނޭޝަނަލް ޑިފެންސް ފޯސްއިން ކަމުގައި މި ބިލުގައި ބަޔާންކޮށްފައިވެއެވެ. މި ބިލުގައިވާގޮތުން މަޖިލީހުގެ ރައީސް ދިރިއުޅުއްވާ ރަސްމީ ތަނަށް ބޭނުންވާނެ މުވައްޒަފުން ހަމަޖައްސާނީ ރައްޔިތުންގެ މަޖިލީހުގެ އިދާރާއިންނެވެ. އަދި މި ގެނެވުނު އިސްލާހުތަކުގެ ތެރޭގައި ރައްޔިތުންގެ މަޖިލީހުގެ ރައީސަށް ދޭންޖެހޭ ހިމާޔަތާއި ރައްކާތެރިކަން މޯލްޑިވްސް ނޭޝަނަލް ޑިފެންސް ފޯސްއިން ހަމަޖައްސައިދޭންވާނެ ކަމުގައި ބަޔާންކޮށްފައިވެއެވެ.

މި ބިލް ތަޞްދީޤުކުރުމާއެކު ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު ސުޕްރީމް ކޯޓު ކުރިމަތީގައި ހުންނަ ދަންޑެހެލު ޕާކިންގ މިހާރު ހުރި ބިމުގައި އިމާރާތްކުރުމަށް ސަރުކާރުން ވަނީ ނިންމާފައެވެ. މިއާއެކު މިމަހުގެ 15 ގެ ކުރިން އެ ޕާކިންގގައި ހުރި އުޅަނދުތައް ހުސްކުރުމަށް ސިޓީ ކައުންސިލުން ވަނީ އަންގާފައެވެ. އެހެންނަމަވެސް މި ތަން ހުސްނުކުރެވި ގިނަ ދުވަސްތަކެއް ފާއިތުވުމަށްފަހު އެތަން މިހާރު ވަނީ ހުސްކޮށްފައެވެ. މިހާރު ކުރިއަށްދަނީ އެތަނުގައި ހުރި ގާތައް ނެގުމުގެ މަސައްކަތެވެ.

ދަންޑެހެލު ޕާކިންގއަކީ ސްލޮޓުތައް ކުއްޔަށް ދީގެން ޕާކް ކުރުން ކުރިއަށްގެންދާ ތަނެކެވެ. އެތަން ހުސްކުރުމުގައި ލަސްތަކެއް ދިމާވެފައިވަނީ އެ ކުލީގެ މުއްދަތު ހަމަނުވާތީ ކަމަށް މައުލޫމާތު ލިބިފައިވެއެވެ. މިހާރު އެތަން ހުސްކޮށްފައިވާއިރު، އެތަނުގައި ކުއްޔަށް ޕާކު ކޮށް އުޅުނު މީހުންނަށް، ރައްޔިތުންގެ މަޖިލިސް ކައިރީގައި ހުންނަ ދަރުމަވަންތަ ޕާކިންގއިން ސްލޮޓުތައް ދޫކޮށްފައިވާކަމަށް މައުލޫމާތުލިބިފައިވެއެވެ. މިކަމާ ގުޅޭގޮތުން ސިޓީ ކައުންސިލްގެ ރަސްމީ ބަހެއް ލިބޭގޮތް ނުވި ނަމަވެސް މާލެ ސިޓީ ކައުންސިލްގެ މޭޔަރ ޑރ. މުޙައްމަދު މުޢިއްޒު ވަނީ, ދަންޑެހެލު ޕާކިންގގައި ޕާކުކުުރުމަށް ސްލޮޓުތައް ކުއްޔަށް ނަގާފައިވާ މީހުންނަށް ޕާކު ކުރެވޭނެ އެހެން އިންތިޒާމުތައް ހަމަޖައްސައިދޭނެ ކަމަށް ބުނެފައެވެ.

ރައްޔިތުންގެ މަޖިލީހުގެ ރައީސްއާއި އުއްތަމަ ފަނޑިޔާރަށް ޚާއްސަކޮށްގެން, އެންމެ މަތީ ފަންތީގެ ހިމާޔަތާއެކު ޚާއްސަ ގެކޮޅެއް ހަމަޖައްސައިދޭން ސަރުކާރުން ނިންމާފައިވީނަމަވެސް އެ ދެ ބޭފުޅުންނަށް ޚާއްސަ ވަގުތީ ގެކޮޅެއް ހަމަޖައްސައިދިނުމުގެ މަސައްކަތް މިހާރު ވަނީ ފަށާފައެވެ. އެގޮތުން ރައްޔިތުންގެ މަޖިލީހުގެ ރައީސަށް ހަމަޖައްސާފައިވަނީ މ. މުރައިދޫގެއެވެ. އަދި އުއްތަމަ ފަނޑިޔާރަށް ހަމަޖައްސާފައިވަނީ ރެހެންދި ފްލެޓްގެ އެޕާޓްމެންޓެކެވެ. މިހާރު ކުރިއަށްދަނީ މި ތަންތަނުގެ ސަލާމަތީ ކަންކަން ވަރުގަދަކުރުމުގެ މަސައްކަތެވެ. އެހެންނަމަވެސް ސަރުކާރުގެ ފަރާތުން މިކަން އަދި ކަށަވަރުކޮށްދީފައެއް ނުވެއެވެ.