"އިމުގާ" އަޕްޑޭޓްކުރާތީ ޚިދުމަތް ދިނުމުގައި ދަތިވެދާނެ
31 ޖުލައި 2021 | ހޮނިހިރު 08:34އިމިގްރޭޝަނުން ބުނަނީ ޖުލައި 31 ވަނަ ދުވަހު ރާއްޖެއިން ބޭރަށް ފުރާ މީހުންނާއި އަދި ރާއްޖެ އެތެރެވާ މީހުން ހެލްތު ޑިކްލަރޭޝަން ފޯމްވެސް ހުށަހަޅަން ނުޖެހޭނެ ކަމަށް
މޯލްޑިވްސް އިމިގްރޭޝަންގެ ޚިދުމަތް ދެނީ
"އިމުގާ" އަށް މުހިންމު އަޕްގްރޭޑެއް ގެނައުމުގެ މަސައްކަތް ކުރިޔަށް ދާތީ ޚިދުމަތް ހޯދުމުގައި ދަތިތަކެއް ކުރިމަތިވެދާނެކަމަށް މޯލްޑިވްސް އިމިގްރޭޝަނުން ބުނެފިއެވެ.
"އިމުގާ"އަކީ މޯލްޑިވްސް އިމިގްރޭޝަންގެ ޚިދުމަތްތައް އޮންލަކޮށް ދިނުމަށް ބޭނުންކުރާ އެޕެވެ. އިމްގްރޭޝަނުން ބުނީ އޮގަސްޓް މަހުގެ 1ވަނަ ދުވަހުގެ ނިޔަލަށް މި މަސައްކަތް ނިންމާލެވޭނެކަމަށާއި އެއާއެކު އަލުން އެއްވެސް ދަތިކަމެއް ނެތި ޚިދުމަތް ލިބިގެންދާނެކަމަށެވެ. މީގެ އިތުރުން އިމިގްރޭޝަނުން ބުނީ ޖުލައި 31 ވަނަ ދުވަހު ރާއްޖެއިން ބޭރަށް އަދި ރާއްޖެ އެތެރެވާ މީހުން ހެލްތު ޑިކްލަރޭޝަން ފޯމްވެސް ހުށަހަޅަން ނުޖެހޭނެކަމަށެވެ. އެހެންނަމަވެސް ރާއްޖެ އަންނަ އިރު އަތުގައި 96 ގަޑިއިރު ނުވާ ނެގެޓިވް ޕީސީއާރް ނަތީޖާ އޮންނަންވާނެކަމަށް އިމިގްރޭޝަނުން ބުނެއެވެ.
މި ދުވަސްވަރަކީ ޗުއްޓީ ނިމުމަކާ ގާތްވެފައިވާ ދުވަސްވަރު ކަމަށް ވުމާއެކު ރާއްޖެއިން ބޭރަށް ދިޔަ ގިނަ މީހުން ދަނީ އެނބުރި ގައުމަށް އަންނަމުންނެވެ. އަދި ކޮވިޑްގެ ހާލަތު ރަނގަޅުވެ ރާއްޖެއަށް ފަތުރުވެރިން އައުމުގައިވެސް ގިނަ ލުއިތަކެއްވަނީ ދީފައެވެ. އެގޮތުން ރާއްޖެ އަންނަ ކޮންމެ މީހަކުވެސް 96 ގަޑިއިރުނުވާ ނެގެޓިވް ނަތީޖާ ގެންނަން ޖެހޭނެކަމަށް މޯލްޑިވްސް އިމިގްރޭޝަނުން ވަނީ ބުނެފައެވެ. މޯލްޑިވްސް އިމިގްރޭޝަނުން ނެރުނު ޓްރެވަލް އެޑްވައިޒަރީއެއްގައި ބުނީ ވެކްސިންގެ ޑޯޒްތައް ފުރިހަމަކޮށްފައިވާ މީހުންނާއި ވެކްސިން ފުރިހަމަނުކުރާ މީހުންވެސް ރާއްޖެއަށް ދަތުރުކުރާއިރު 96 ގަޑިއިރުނުވާ ނެގެޓިވް ނަތީޖާ ހުށަހަޅަން ޖެހޭނެ ކަމަށެވެ. ނަމަވެސް 1 އަހަރު ނުވާ ކުޑަކުދިން ޕީސީއާރު ޓެސްޓުގެ ނަތީޖާ ހުށަހަޅަން ނުޖެހޭނެ ކަމަށްކަމަށް އިމިގްރޭޝަނުން ހާމަކުރެއެވެ.
މިގޮތަށް ކަނޑއަޅާފައިވާއިރު، މީގެކުރިން ރާއްޖެއަށް އެތެރެވާ މީހުން ހުށަހަޅަން ޖެހެނީ 72 ގަޑިއިރުނުވާ ޕީސީއާރު ނެގެޓިވް ނަތީޖާއެކެވެ. މާލެ ސަރަހައްދުގައި ކޮވިޑްގެ ކޭސްތައް މަދުވުމުގެ ސަބަބުން، ސަރުކާރުން ވަނީ ކޮވިޑާ ގުޅިގެން އަޅާފައިވާ ފިޔަވަޅުތަކަށް ގިނަ ލުއިތަކެއް ދީފައެވެ. އެގޮތުން ވެކްސިން ފުރިހަމަކޮށްފައިވާ ދިވެހިންނާއި ރާއްޖޭގައި މަސައްކަތްކުރާ ބިދޭސީން، ބޭރުން އައިސް ކަރަންޓީން ވާން ނުޖެހޭގޮތަށްވެސް ވަނީ ލުއިދީފައެވެ. އަދި ރާއްޖޭގައި ކޯވިޑް-19އަށް ޕޮޒިޓިވްވެ ބަލިން ފަސޭހަވެފައިވާ މީހުންގެ ތެރެއިން ޕޮޒިޓިވްވި ސާމްޕަލް ނެގި ތާރީޚުން ފެށިގެން 60 ދުވަސް ނުވާ މީހުންނާއި ކޮވިޑް ވެކްސިން ފުރިހަމަކޮށް، ރާއްޖެ އަންނަ ދުވަހާ ހަމައަށް 14 ދުވަސް ވެފައިވާ މީހުންވެސް ކަރަންޓީނުވާން ނުޖެހޭގޮތަށް ވަނީ ހަމަޖައްސާފައެވެ.
