ކޮވިޑުގެ ހާލަތު ގޯސްވެ ގައުމުގެ ކަންކަން ބޮއްސުންލައިގެން ދިއުމުން ބައިނަލްއަގްވާމީ އެހީއަށް މިޔަންމާއިން އެދިއްޖެއެވެ.

ސިޔާސީ ހަލަބޮލިކަމާއި ކޮވިޑް-19ގެ ނުރައްކާތެރި ރާޅެއްގެ އިތުރުން ބޯކޮށް ވާރޭވެހި ފެންބޮޑުވެ ބިންގަނޑު ކަނޑައިގެން ދިއުމުގެ ހާދިސާތައްވެސް އެ ގައުމަށް ވަނީ ކުރިމަތިވެފައެވެ.

މިފަދަ ހާލަތަކަށް ވެއްޓުމުން މިޔަންމާގެ އަސްކަރީ ސަރުކާރުން ވަނީ މައްސަލަތައް ހައްލުކުރުމަށް ބައިނަލްއަގްވާމީ އެހީތެރިކަން ބޭނުންކަމަށް ބުނެފައެވެ. ޚާއްސަކޮށް އާސިއާނުގެ ގައުމުތަކާއި ރަހުމަތްތެރި ގައުމުތަކުގެ އެހީތެރިކަމަށް ވަރަށް ބޮޑަށް ބޭނުންވެފައިވާކަމަށް ބުނެފައިވެއެވެ.

މިޔަންމާގައި ކުރި ބަޣާވާތަށްފަހު އެ ގައުމުގެ އަސްކަރީ ސަރުކާރަށް އެންމެ ބޮޑު އެހީތެރިކަމެއް ދެމުންދަނީ ޗައިނާއާއި ރަޝިޔާއިންނެވެ. އެ ގޮތުން ދާދިފަހުން ޗައިނާއިންވަނީ 2 މިލިޔަން ޑޯޒްގެ ވެކްސިން ފޯރުކޮށްދީފައެވެ. އަދި ރަޝިޔާގެ އެހީތެރިކަމާއެކު މިޔަންމާގައި ވެކްސިން ބަންދުކުރުމުގެ މަޝްރޫއެއްވެސް ފެށުމަށް ދަނީ މަސައްކަތްކުރަމުންނެވެ.

މިއަހަރުގެ ފެބުރުއަރީ މަހުގެ 1ވަނަ ދުވަހު މިޔަންމާގެ އިސްވެރިޔާ އަން ސަން ސޫކީގެ ސަރުކާރާ ދެކޮޅަށް އެ ގައުމުގެ ސިފައިން ބަޣާވާތްކުރުމަށްފަހު ސޫ ކީއާއި އޭނާގެ ސަރުކާރަށް ނިސްބަތްވާ އިސްވެރިން ވަނީ ހައްޔަރުކޮށްފައެވެ. އެއަށްފަހު އަސްކަރިއްޔާއިން ވަނީ އެއް އަހަރުގެ މުއްދަތަށް ކުއްލި ހާލަތު އިއުލާނުކޮށްފައެވެ.

އަސްކަރިއްޔާއިން ކުރި ބަޣާވާތް ނިމުމަކަށް ގެނެސް ސޫކީ މިނިވަންކުރުމަށް ގޮވާލައި މިޔަންމާގެ ގިނަ އަދަދެއްގެ ރައްޔިތުން ވަނީ މަގުތަކަށް ނުކުމެ މުޒާހަރާކޮށްފައެވެ.