ހޫޘީންގެ މިސައިލް ހަމަލާ ބައިނަލްއަގްވާމީ ދުނިޔެ އިން ކުށްވެރިކޮށްފި
ހޫޘީން ވަނީ ސައުދީ އަށް އާދިއްތަ ދުވަހުގެ ރޭ ހަތް މިސައިލް ފޮނުވާލާފައި
ހަތް މިސައިލް ވެސް ސައުދީން ވައްޓާލާފައިވާ ކަމަށް އެ ގައުމުން ބުނޭ
ޔަމަނުގެ ހަނގުރާމަވެރި ޖަމާއަތެއް ކަމަށްވާ ހޫޘީން އާދީއްތަ ދުވަހު ސައުދީ އަށް ދިން މިސައިލް ހަމަލާ ދުނިޔޭގެ ގައުމުތަކުގެ ވެރިންނާއި އެކި ޖަމާއަތްތަކުން ކުށްވެރިކޮށްފިއެވެ.
ހޫޘީން، ޔަމަނުން ސައުދީ އަށް ހަތް ބެލިސްޓިކް މިސައިލް ފޮނުވާލިއިރު، އެ މިސައިލްތައް ވައްޓާލާފައިވާ ކަމަށް ސައުދީ އަރަބިއްޔާ އިން ވަނީ ބުނެފައެވެ. ވެއްޓުނު މިސައިލްގެ ބައިތަކުން ޖެހި އެކަކު މަރުވެފައިވާ ކަމަށް ރިޕޯޓުތައް ބުނާއިރު ހޫޘީންގެ މިސައިލް ހަމަލާ ދީފައި ވަނީ ޔަމަނަށް ސައުދީން ވައިގެ ހަމަލާތައް ދޭން ފެށިތާ ތިން އަހަރުވީ ދުވަހުއެވެ.
ހޫޘީން ސައުދީ އަށް ދިން ހަމަލާ ބަހްރައިން، ޖޯޑަން، ޕާކިސްތާން، ޔޫއޭއީ، އަދި ދިވެހިރާއްޖެ އިން ވަނީ ކުށްވެރިކޮށްފައެވެ. އަަދި އަރަބް ލީގުން ވެސް ވަނީ ހޫޘީންގެ ހަމަލާ ކުުށްވެރިކޮށްފައެވެ. އިނގިރޭސިވިލާތުން ބުނީ "އިރާނުން ހޫޘީން ނަށް ހަތިޔާރު ފޯރުކޮށްދިނުން ހުއްޓާލަން ޖެހޭ ކަމަށާއި، އިރާނުގެ ނުފޫޒު އިރާނުން ފޯރުވަންވީ ހަމަނުޖެހުން ހުއްޓުމަަށް ކަމަށެވެ."
އާދީއްތަ ދުވަހު ސައުދީ އަށް ފޮނުވާލި ހަތް މިސައިލްގެ ތެރެއިން ތިން މިސައިލް ފޮނުވާލާފައި ވަނީ ވެރިރަށް ރިޔާދަށެވެ. ހޫޘީން މީގެ ކުރިން ވެސް ސައުދީ އަށް ހަމަލާދީފައިވާއިރު ޔަމަނުގެ ދާޚިލީ ހަނގުރާމައިގައި ހޫޘީންނަށް ހަތިޔާރު ފޮނުވައި އެހެނިގެން ގޮތްގޮތުން އެހީތެރިވެދެނީ އީރާނުން ކަމަށް ސައޫދީ އާއި ވިލާތުގެ ގައުމުތަކުން ބުނެއެވެ. ނަމަވެސް އީރާނުން އެކަން ދޮގުކުރެއެވެ.
ޔަމަނުގައި ހިނގަމުންދާ ދާޚިލީ ހަނގުރާމައިގެ ތެރެއަށް ވަދެ ސައުދީ އިސްވެ އުފައްދާފައިވާ ގުޅިފައިވާ ކޯލިޝަނުން ގެންދަނީ 2015 ވަނަ އަހަރުގެ މާޗްމަހުގެ 26 ވަނަ ދުވަހުން ފެށިގެން ހޫޘީންނާ ދެކޮޅަށް ހަމަލާ ދެމުންނެވެ.
