ސަމިޓަކަށް ތުރުކީ އަށް ވަޑައިގެންނެވި ސޫދާނުގެ ރައީސް އުމަރު އަލްބަޝީރު ހައްޔަރުކޮށް، ބައިނަލްއަގްވާމީ ޖިނާއީ ކޯޓާ ހަވާލުކުރުމަށް އެ ކޯޓުން ތުރުކީއަށް އެންގި އެންގުމަށް އެގައުމުގެ ރައީސް ރަޖަބް ތައްޔިބު އޮރްދުޣާން ޖޯކު ޖައްސަވައިފިއެވެ.

އޮރްދުޣާންއާ ހަވާލަދީ މީޑިއާތަކުގައި ބުރާސްފަތި ދުވަހު ބުނެފައި ވަނީ ބައިނަލްއަގްވާމީ ކޯޓުން އެންގި އެންގުމަކީ "ވަރަށް ހިނނިއަންނަ ކަމެއް ކަމަށެވެ. އޯއައިސީގެ މެމްބަރު ގައުމެއްގެ ވެރިއަކު ސަމިޓަކަށް ވަޑައިގެން އުޅުއްވަނިކޮށް ހައްޔަރު ކުރެވިދާނެތޯ އޮރްދުޣާން ވަނީ ސުވާލު އުފައްދަވާފައެވެ.

ސޫދާނުގެ ރައީސް ތުރުކީއަށް ވަޑައިގެންނެވީ ޑިސެމްބަރު 13 ގައި ބޭއްވި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ސަމިޓެއްގައި ބައިވެރިވެވަޑައިގަތުމަށެވެ. އޮރްދުޣާންގެ އެދިވަޑައިގަތުމަކަށް އޯއަސީގެ ސަމިޓެއް ބޭއްވީ އެމެރިކާގެ ރައީސް ޑޮނަލްޑް ޓްރަމްޕް، އިޒްރޭލުގެ ވެރިރަށް ކަމުގައި ޖެރޫސަލް ގަބޫލުފުޅުކުރެއްވުމާ ގުޅިގެން އެކަން ކުށްވެރިކުރުމަށްޓަކައެވެ.

ރިސެސް އަށް ގޮސްފައިވާ އައިސީސީ އިން، އޮރްދުޣާންގެ ވާހަކަފުޅާ ގުޅިގެން ތުރުކީއަށް އެއްވެސް އެންގުމެއް އަންގާފައިވާ ކަން އަދި ކަށަވަރުކޮށްދީފައެއް ނުވެއެވެ.

ސުދާނުގެ ރައީސް އުމަރު އަލްބަޝީރަކީ ހަނގުރާމައިގެ ޖަރީމާ ހިންގިކަމުގެ ތުހުމަތުގައި ޝަރީއަތް ހިންގުމަށް ބައިނަލްއަގްވާމީ ޖިނާއީ ކޯޓު ކަމަށްވާ އައިސީސީ އިން ބޭނުންވެފައިވާ ފަރާތެކެވެ. އަލްބަޝީރާ މެދު ކުރެވޭ އެންމެހާ ތުހުމަތުތައް އެމަނިކުފާނު ދޮގުކުރައްވާއިރު އަލްބަޝީރުގެ މައްޗަށް ތުހުމަތުތައް ކުރެވެނީ 2003ގައި ސޫދާނުގެ ދާރްފޫރްގައި ހިންގި ހަމަނުޖެހުންތަކާ ގުޅިގެންނެވެ.