މަޖިލީހުގެ ކުރީގެ މެމްބަރު މުހައްމަދު އަބްދުﷲ ވެސް އަނބުރާ ޕީޕީއެމްއަށް!
މުހައްމަދު އަބްދުﷲ އަކީ އިހަވަންދޫ ދާއިރާގެ ކުރީގެ މެމްބަރު
ރައްޔިތުންގެ މަޖިލީހުގެ އިހަވަންދޫ ދާއިރާގެ ކުރީގެ މެމްބަރު މުހައްމަދު އަބްދުﷲ ޕީޕީއެމްއާއި ވަނީ ގުޅިފައި
ރައްޔިތުންގެ މަޖިލީހުގެ އިހަވަންދޫ ދާއިރާގެ ކުރީގެ މެމްބަރު މުހައްމަދު އަބްދުﷲ (މުހަންމާ) ޕީޕީއެމްއާ އަލުން ގުޅިވަޑައިގެންފިއެވެ.
އިދިކޮޅު ޕްރޮގްރެސިވް ކޯލިޝަނުން ޖުލައި 30 ވަނަ ދުވަހު ބޭއްވި ރަސްމިއްޔާތެއްގައި އެޕާޓީގެ ކުރީގެ ބައެއް މެމްބަރުންނާއި، ބައެއް އާންމުން ވެސް ވަނީ ޕީޕީއެމްއާ ގުޅިފައެވެ. މި ރަސްމިއްޔާތުގައި ވާހަކަ ދައްކަވަމުން އިހަވަންދޫ ދާއިރާގެ ކުރީގެ މެމްބަރު މުހައްމަދު އަބްދުﷲ ވަނީ ޕާޓީއާ އަލުން ގުޅިވަޑައިގެންނެވި ސަބަބު ބަޔާންކުރައްވާފައެވެ. މުހައްމަދު އަބްދުﷲ ވިދާޅުވީ އޭނާ ޕީޕީއެމްއާ އަލުން ގުޅުނީ، ސިޔާސީ ގޮތުން ގިނަ މަސައްކަތްތަކެއް އަލުން ކުރެއްވުމަށް ކަމަށެވެ. މުހައްމަދު އަބްދުﷲ ވަނީ ޕީޕީއެމް ދޫކޮށް އެހެން ޕާޓީއަކަށް ދެވުނީތީ ހިތާމަކުރައްވާކަމަށް ވެސް ވިދާޅުވެފައެވެ.
ޕީޕީއެމްއާ މެމްބަރުން ގުޅުމަށް ބޭއްވި މި ރަސްމިއްޔާތުގައި ފޯމުތަކާ ހަވާލުވީ ޕީއެންސީގެ ރައީސް އަބްދުއްރަހީމް އަބްދުﷲއެވެ. ޕީޕީއެމްއާ އަލުން ގުޅިވަޑައިގެންނެވި މުހައްމަދު އަބްދުﷲ ވަނީ މިހާރު ވެރިކަން ކުރާ މައިޕާޓީ އެމްޑީޕީއަށް ވެސް ސޮއިކުރައްވާފައެވެ. މުހައްމާއަކީ ރައީސް އަބްދުﷲ ޔާމީންގެ ވެރިކަން ބަދަލު ކުރުމަށް އޭރުގެ މަޖިލިސް ތެރެއިން ކުރެވުނު މަސައްކަތުގައި ޔާމީންގެ ވެރިކަމާ ދެކޮޅަށް މަޖިލީހުން ނިކުތް 12 މެމްބަރުންގެ ތެރޭގައި ވެސް ހިމެނޭ ބޭފުޅެކެވެ.
އިހަވަންދޫ ދާއިރާގެ ކުރީގެ މެމްބަރު މުހައްމަދު އަބްދުﷲ އިދިކޮޅާ އަލުން ގުޅިފައިވާއިރު، ކުރީގެ މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މުޙައްމަދު މަލީޙް ޖަމާލް އާއި ޤާނޫނީ ވަކީލް މުހައްމަދު ވަހީދު އިބްރާހިމް ވެސް ވަނީ އިދިކޮޅު ކޯލިޝަނާ ގުޅިފައެވެ.
