ލުބްނާންގައި އައު ސަރުކާރެއް އެކުލަވާލުމުގެ އުންމީދު އެބައޮތް

ލުބްނާންގައި އައު ސަރުކާރެއް އެކުަވާލެވޭނެ ކަމުގެ އުންމީދު އެބައޮތް ކަމަށް ބޮޑުވަޒީރު ނަޖީބް މިކާތީ ބުނެފިއެވެ.

ލުބްނާނުގެ ބޮޑުވަޒީރުގެ މަގާމަށް މިކާތީ އައްޔަންކޮށްފައިވަނީ އެ ގައުމުގެ ޤާނޫނުހަދާ މަޖިލީހުގައި ނެގި ވޯޓަކަށްފަހުއެވެ. ބޮޑުވަޒީރުގެ މަގާމަށް މިކާތީއާ ވާދަކުރެއްވީ ކުރީގެ ސަފީރެއްކަމަށްވާ ނަވާފު ސަލާމެވެ. އޭނާއަށް ލިބިވަޑައިގަތީ އެންމެ ވޯޓެކެވެ. މީކާތީއަށް ލިބިވަޑައިގަތީ 72 ވޯޓެވެ. ނަމަވެސް 42 މެންބަރުން އެއްވެސް ކޮޅަކަށް ވޯޓެއް ނުދެއްވައެވެ. އަދި 3 މެންބަރުން ވޯޓުގައި ބައިވެރިވަޑައިގެންފައެއް ނުވެއެވެ. ޤާނޫނުހަދާ މަޖިލީހުގެ ރުހުމާއެކު ލުބުނާނުގެ ރައީސް މިޝާލް ޢައޫންވަނީ ސަރުކާރެއް އެކުލާވުލުމުގެ ޒިންމާ މީކާތީއާ ހަވާލުކުރައްވާފައެވެ.

ލުބްނާނުގެ ބޮޑުވަޒީރުގެ މަގާމަށް މީކާތީ އައްޔަންކޮށްފައިވަނީ އެ މަގާމުން ސަޢުދުލް ޙަރީރީ އިސްތިއުފާދެއްވިތާ 11 ދުވަސްފަހުންނެވެ. ޙަރީރީ އިސްތިއުފާ ދެއްވީ، އައު ސަރުކާރެއް އެކުލަވާލުމަށް ކުރެއްވި މަސައްކަތް ނާކާމިޔާބު ވުމުންނެވެ.

މިކާތީ ބުނެފައިވަނީ، އަލަށް އެކުލަވާލާ ސަރުކާރުގެ މަގާމުތަކަށް ކަނޑައަޅާ ބޭފުޅުންގެ ނަންތައް ރައީސާ ހިއްސާކުރައްވާފައިވާ ކަމަށާއި، ބައެއް ނަންތަކަށް ރައީސް ރުހުންވެސް ދެއްވާފައިވާ ކަމަށެވެ. އަދި އިތުރަށް ގެންނަން ޖެހޭ ބަދަލުތަކާއެކު މަޝްވަރާވެސް ކުރިއަށްދާ ކަަމަށެވެ.