ރައީސް ޞާލިޙުގެ ސިޔާސަތުތަކަށް އެމްއެންޕީގެ ތައުރީފު
27 ޖުލައި 2021 | އަންގާރަ 08:26ރައީސް ޞާލިޙާއި ޓީމުން ކުރެއްވި މަސައްކަތަކީ އައްސަރިބަހާއި ސާބަސް ހައްގު މަސައްކަތެއް ކަމަށް ނާޒިމް ވިދާޅުވި
މޯލްޑިވްސް ނޭޝަނަލް ޕާޓީ އިން ބޭއްވި ނޫސްވެރިންގެ ބައްދަލުވުމުގެ ތެރެއިން
ކޮވިޑާ ގުޅިގެން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ގެންގުޅުއްވި ސިޔާސަތުތަަކަށް ތައުރީފުކޮށް މޯލްޑިވްސް ނޭޝަނަލް ޕާޓީ (އެމްއެންޕީ) އިން ވާހަަކަ ދައްކައިފިއެވެ.
އެ ޕާޓީން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކުރީގެ ޑިފެންސް މިނިސްޓަރ އަދި ދަނގެތީ ދާއިރާގެ މެމްބަރު މުޙައްމަދު ނާޒިމް ވިދާޅުވީ ދިވެހި ސަރުކާރުން ޕެންޑެމިކްގެ ތެރޭގައި ކަންތައްތައް ކޮށްފައިވަނީ ވަރަށް ޙިކުމަތްތެރިކަމާއެކު ވަރަށް ރަނގަޅަށް ކަމަށެވެ. ޑިޒާސްޓަރ މެނޭޖްމަންޓް ދާއިރާ އިން ތައުލީމު ހާސިލު ކުރެއްވި ބޭފުޅެއްގެ ހަސިއްޔަތުން ރާއްޖޭގައި ކުރެވޭނެ އެންމެ ރަނގަޅަކަށް ކޮވިޑުގެ ހާލަތާ ގުޅިގެން ރައީސް އަމަލުކުރެއްވި ކަމަށެވެ. އެގޮތުން ވަރަށް ޙިކުމަތްތެރިކަމާއެކު އެކަމާ ގުޅޭ ހުރިހާ ޕްރޮޕެޝަނަލުންނާ މަޝްވަރާ ކުރައްވައިގެން ކަންކަންތައް ކުރިއަށް ގެންދެވި ކަަމަށެވެ.
ކޮންމެ މީހަކު ވެސް ރަނގަޅަށް ކަމެއްކޮށްފިނަމަ އެކަން ބަލައިގަންނަން ޖެހޭނެ ކަމަށާއި ކޮވިޑާ ގުޅިގެން އެކި ލޯނުތަކާއި ސްޓިމިއުލަސް ޕެކޭޖްތައް ރައީސް ތައާރަފުކުރެއްވި ކަމަށް ނާޒިމް ވިދާޅުވިއެވެ. އަބަދުވެސް ދުރުގައި ތިބޭއިރު ފެންނާނީ ގިނައިން ނުކުރެވޭ ކަންތައްތައް ކަމަށާއި ގޮނޑީީގައި އިށީނުމުން ތަފާތުތައް ފެންނާނެ ކަމަށް ނާޒިމް ވިދާޅުވިއެވެ. ރައީސް ޞާލިޙާއި ޓީމުން ކުރެއްވި މަސައްކަތަކީ އައްސަރިބަހާއި ސާބަސް ހައްގު މަސައްކަތެއް ކަމަށް ވެސް ނާޒިމް ވިދާޅުވިއެވެ.
ނާޒިމް މިހެން ވިދާޅުވެފައިވާއިރު ކޮވިޑާ ގުޅިގެން ރާއްޖެއިން އަޅާފައިވާ ފިޔަވަޅުތަކަށް ވެސް ބައިނަލްއަގްވާމީ ޖަމުޢިއްޔާ، ޖަމާޢަތްތަކާއި ދުނިޔޭގެ އެކިއެކި އިސްވެރިން ވަނީ މަރުހަބާ ދަންނަވާފައެވެ. އެގޮތުން ރާއްޖެއިން ކޮވިޑު ކޮންޓްރޯލް ކުރުމަށް ގެންގުޅުނު ހަރުދަނާ ސިޔާސަތުތަކަށް ވެސް ވަނީ ތައުރީފު ކުރައްވާފައެވެ. އެގޮތުން ކޮވިޑާ ދެކޮޅަށް ރާއްޖެ އިން އަޅަމުން ގެންދަނީ ވަރަށް އުނދަގޫ އެހެންނަމަވެސް ވަރަށް ފާހަގަކޮށްލެވޭ ފިޔަވަޅުތަކެއް ކަމަށް ވިދާޅުވެ ޗައިނާ އިން ރާއްޖެއަށް ކަނޑައަޅާފައިވާ ސަފީރު ވަނީ މީގެ ކުރިން ސަރުކާރުގެ ސިޔާސަތުތަކަށް ތައުރީފު ކުރައްވާފައެވެ.
