ލިވަޕޫލް ސަޕޯޓަރުންނަށް ވައިނަލްޑަމްގެ ބޮޑެތި ފާޑުކިޔުންތަކެއް

ދާދި ފަހުން ޕީއެސްޖީއަށް ބަދަލުވި ނެދަލެންޑްސްގެ މިޑްފީލްޑަރު ޖިއޮޖީނިއޯ ވައިނަލްޑަމް ލިވަޕޫލް ސަޕޯޓަރުންނަށް ފާޑުކިޔައިފިއެވެ.

އުމުރުން 30 އަހަރުގެ މިޑްފީލްޑަރު ލިވަޕޫލް ދޫކޮށް ޕީއެސްޖީއަށް ބަދަލުވީ ހިލޭ ޓްރާންސްފާއެއްގެ ދަށުންނެވެ. މީގެ ކުރިން ވައިނަލްޑަމް ބާސެލޯނާއަށް ބަދަލުވާނެ ކަމަށް ބެލެވުނު ނަމަވެސް،  ޕީއެސްޖީން ފަހުން ވަނީ ވައިނަލްޑަމްގެ ޑީލް ހައިޖެކް ކޮށްފައެވެ. އެގޮތުން ބާސާއިން ހުށަހެޅި މުސާރައަށް ވުރެ ބޮޑު މުސާރާއެއް ޕީއެސްޖީން ހުށަހެޅުމާއެކު، ވައިނަލްޑަމް ވަނީ ޕީއެސްޖީއަށް ސޮއިކޮށްފައެވެ. ހިލޭ ޓްރާންސްފާއެއްގެ ދަށުން ވައިނަލްޑަމް ޕީއެސްޖީއާ ގުޅުނުއިރު، އޭނާ ވަނީ އެ ޓީމާއެކު ތިން އަހަރުގެ އެއްބަސްވުމެއް ހަދާފައެވެ.

ދާދި ފަހުން ދިން އިންޓަވިއުއެއްގައި ވައިނަލްޑަމް ބުނީ ލިވަޕޫލުގައި ހޭދަކުރި ދުވަސްވަރު ސަޕޯޓަރުންގެ އަމަލުތައް ހުރިގޮތުން ކުލަބުގައި އޭނާގެ މުހިންމުކަން އިހުސާސް ނުކުރެވުނު ކަމަށެވެ. އެގޮތުން އޭނާއަސް ލޯތްބާއި އިހުތިރާމް ނުލިބޭކަމުގެ އިހުސާސް ކުރެވުނު ދުވަސްތަކެއް ދިޔަ ކަމަށްވެސް ބުންޏެވެ. އެކަމަކު މުހިއްމުކަން އިހުސާސް ނުކުރެވުނީ ޓީމުގެ ކުޅުންތެރިންނާއި އޮފިޝަލުންގެ ފަރާތުން ނޫން ކަމަށްވެސް ވައިނަލްޑަމް ވަނީ ބުނެފައެވެ.

ރިޕޯޓުތައް ބުނާ ގޮތުން ހިލޭ ޓްރާންސްފާއެއްގެ ދަށުން ވައިނަލްޑަމް ޕީއެސްޖީއަށް ބަދަލުވީ އެއްބަސްވުން އާކުރުމުގައި ދެބަސްވުންތަކެއް ހުރުމުންނެވެ. އެގޮތުން ލިވަޕޫލުގައި ވައިނަލްޑަމް ބަހައްޓަން އެ ޓީމުގެ ކޯޗު ޔާގެން ކްލޮޕް ބޭނުންވި ނަމަވެސް، ވައިނަލްޑަމް ބޭނުންވި ގޮތަށް އެއްބަސްވުން އާކުރަން ލިވަޕޫލުގެ މެނޭޖުމަންޓުން ބޭނުންނުވި ކަމަށްވެސް ވަނީ ރިޕޯޓުކޮށްފައެވެ.

ލިވަޕޫލުގައި ފަސް އަހަރު ހޭދަކުރުމަށް ފަހު ވައިނަލްޑަމް އެ ޓީމު ދޫކޮށްލިއިރު، މީގެ ކުރިން ނިއުކާސަލް ޔުނައިޓެޑަށްވެސް ކުޅުނު ވައިނަލްޑަމް ލިވަޕޫލަށް ބަދަލުވީ 2016 ވަނަ އަހަރުއެވެ. އެއަށްފަހު އޭނާ ވަނީ ލިވަޕޫލަށް ކުޅެދިން 236 މެޗުގައި 22 ލަނޑު ކާމިޔާބުކޮށްފައެވެ. އަދި މި ފަހުން ލިވަޕޫލުން އިނގިރޭސި ޕްރިމިއާ ލީގާއި، ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕުގެ އިތުރުން ފީފާ ކުލަބު ވޯލްޑް ކަޕް ކާމިޔާބުކުރިއިރު ވައިނަލްޑަމްގެ ހިއްސާ ބޮޑެވެ.