ސާފް ޗެމްޕިއަންޝިޕް ބާއްވަން ރާއްޖެ، އިންޑިއާ އަދި ނޭޕާލް ޝައުގުވެރިވޭ

މި އަހަރުގެ ސާފް ޗެމްޕިއަންޝިޕް ބާއްވަން ރާއްޖެ އާއި، އިންޑިއާ އަދި ނޭޕާލުން ރަސްމީކޮށް ޝައުގުވެރިކަން ފާޅުކޮށްފިއެވެ.

މީގެ ކުރިން ސާފް ޗެމްޕިއަންޝިޕް ބަންގްލަދޭޝްގައި ބޭއްވުމަށް ތާވަލުކޮށްފައި އޮތީ މިދިޔަ އަހަރުގެ ސެޕްޓެމްބަރު މަހުގެ 19 ވަނަ ދުވަހުން ފެށިގެން 30 ވަނަ ދުވަހުގެ ނިޔަލަށެވެ. އެކަމަކު ބަންގްލަދޭޝްގައި ކޮވިޑް-19 ގެ ނުރައްކާ ބޮޑުވުމާ ގުޅިގެން އެ އަހަރުގެ ޖޫން މަހުގެ ތެރޭގައި މުބާރާތް ވަނީ މި އަހަރަށް ފަސްކޮށްފައެވެ.

އަދި މިދިޔަ އަހަރުގެ ޑިސެމްބަރު މަހުގެ ތެރޭގައި އޮންލައިންކޮށް ބޭއްވި ސައުތު އޭޝިއަން ފުޓްބޯލް ފެޑެރޭޝަން (ސާފް) ގެ ހިންގާ ކޮމިޓީގެ ބައްދަލުވުމުގައި ވަނީ މި މުބާރާތް މި އަހަރުގެ ސެޕްޓެމްބަރު މަހުގެ 14 ވަނަ ދުވަހުން ފެށިގެން 25 ވަނަ ދުވަހުގެ ނިޔަލަށް ބަންގްލަދޭޝްގައި ބޭއްވުމަށް ތާވަލުކޮށްފައެވެ. އެކަމަކު ބަންގްލަދޭޝްގައި ކޮވިޑުގެ ހާލަތު ގޯސްވުމާއި، އޭގެ އިތުރުން މިހާތަނަށް ސާފް ޗެމްޕިއަންޝިޕަށް ސްޕޮންސަރެއް ހޯދަން ކުރި މަސައްކަތުގައި އެކަށީގެންވާ ކުރިއެރުމެއް ނުލިބުމުން، ބަންގްލަދޭޝްއިން ވަނީ މުބާރާތް ބޭއްވުމުގެ ވިސްނުން ދޫކޮށްލާފައެވެ.

ރިޕޯޓުތައް ބުނާ ގޮތުން ހުކުރު ދުވަހު އޮންލައިންކޮށް ބޭއްވި ސާފްގެ ބައްދަލުވުމެއްގައި މުބާރާތް ބާއްވަން ޝައުގުވެރިކަން ފާޅުކުރަން ފުރުސަތު ހުޅުވާލުމާއެކު ރާއްޖެ އާއި، އިންޑިއާ އަދި ނޭޕާލުން ވަނީ މުބާރާތް ބާއްވަން ބޭނުންވާ ކަމަށް ބުނެފައެވެ. މި ބައްދަލުވުމުގައި ވަނީ އަންނަ އޯގަސްޓް މަހުގެ ފުރަތަމަ ހަފުތާ ތެރޭގައި މި ފަހަރުގެ ސާފް ބާއްވާނެ ގައުމެއް ކަނޑައެޅުމަށާއި، އަންނަ އޮކްޓޯބަރު މަހުގެ ކުރީ ކޮޅުގައި ސާފް ޗެމްޕިއަންޝިޕް ބޭއްވުމަށް ނިންމާފައެވެ.

ތިން ގައުމަކުން ސާފް ބޭއްވުމަށް ޝައުގުވެރިކަން ފާޅުކުރިއިރު، މީގެ ކުރިން ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވީ ވިދާޅުވީ މިހާރު ވިސްނުމަކީ ރާއްޖެ އާއި ލަންކާ ގުޅިގެން ސާފް ޗެމްޕިއަންޝިޕް ބޭއްވުން ކަމަށާއި، އެކަމަކު އެކަމަށް މަސައްކަތް ފެށޭނީ ސަރުކާރާއެކު މަޝްވަރާކުރުމަށްފަހު ކަމަށެވެ. އަދި ރާއްޖެ އާއި ލަންކާ ގުޅިގެން ސާފް ޗެމްޕިއަންޝިޕް ބޭއްވުމަށް ލަންކާއާއެކު ކޮންމެވެސް ވަރަކަށް މަޝްވަރާކުރެވިފައިވާ ކަމަށާއި، އެފަދަ ފުރުސަތެއް އޮތް ނަމަ ބައިވެރިވާން ތައްޔާރަށް އޮތްކަން ލަންކާއިން ހާމަކޮށްފައިވާ ކަމަށްވެސް ވިދާޅުވިއެވެ.

ރާއްޖެ އާއި ލަންކާއާ ގުޅިގެން ސާފް ޗެމްޕިއަންޝިޕް ބޭއްވުމަށް މަސައްކަތް ކުރަމުން އަންނަ ކަމަށް ބައްސާމް މީގެ ކުރިން ވިދާޅުވިއިރު، 2008 ވަނަ އަހަރުގެ މުބާރާތްވެސް ވަނީ ރާއްޖެ އާއި ލަންކާގައި ބާއްވާފައެވެ. އެ ފަހަރު ރާއްޖެއިން ވަނީ މުޅިން އަލަށް މި މުބާރާތް ކާމިޔާބުކޮށްފައެވެ. އެއަށްފަހު ޑާކާގައި 2018 ވަނަ އަހަރު ބޭއްވި މުބާރާތުގެ ޗެމްޕިއަންކަންވެސް ރާއްޖެއިން ވަނީ ހޯދާފައެވެ.