ފުވައްމުލަކު ކޮޑަކިޅީގައި ނަގާފައިވާ ޓިކްޓޮކަކަށް ބޮޑު ސަމާލުކަމެއް ލިބިއްޖެއެވެ.
"ދަ ތްރީ ޑަމްބެލްސް"ގެ ނަމުގައި ހަދާފައިވާ މި ޓިކްޓޮކް މިހާރު 22 މިލިއަނަށްވުރެ ގިނަ މީހުންވަނީ ބަލާފައެވެ. އަދި 4 މިލިއަނަށްވުރެ ގިނަ ލައިކް ވަނީ ލިބިފައެވެ. މީގެ އިތުރުން ބޭރުގެ ބައެއް މީޑިއާތަކުގެ ސަމާލުކަންވެސް މި ވީޑިއޯއަށް ވަނީ ލިބިފައެވެ.
ވީޑިއޯގައި ފެންނަނީ ފުވައްމުލަކުގައި ޗުއްޓީ ހޭދަކުރަމުންގެންދިޔަ ފަތުރުވެރިއަކު ކުޅީގެ ޗަކަގަނޑުގެ ތެރެއިން ހުރަސްކުރަން އުޅުމުގެ ތެރޭގައި އޭނާ އެއްކޮށް ކުޅީގެ ފެންގަނޑުގެ ތެރެއަށް ވެއްޓި އަޑިއަށްދާ މަންޒަރެވެ.
ވީޑިއޯގެ އޮރިޖިނަލް އަޑާއެކު ޕޯސްޓްކޮށްފައި ވާއިރު ކުޅީގެ ޗަކަގަނޑުގެ ތެރެއިން ހުރަސްކުރުމުގެ ކުރިން އޭނާގެ ފަޓުލޫނު ހަޑިވާކަމަށް ބުނެ ފައިވާން ވެސް އަތަށް ނަގައެވެ. އަދި އަހަރެންނަށް މިތަނުން ހުރަސްކުރެވޭނެ ބާއޭ ބުނެ ހުރަސްކުރަން ފުންމާލާ ވަގުތު މުޅި މީހާ އެއްކޮށް ގަނބައި ގަންނަނީއެވެ.
ގިނަ ބަޔަކަށް މިވީޑިއޯވީ މަޖާ ވީޑިއޯއަކަށެވެ. މި އެކައުންޓުގައި ފުވައްމުލަކުގައި އޭނާ ޗުއްޓީ ހޭދަކުރިއިރު ކޮށްފައިވާ ބައެއް ކަންކަމުގެ ވީޑިއޯވެސް އަޕްލޯޑް ކޮށްފައިވެއެވެ.
