ރާއްޖޭގައި ބޮޑެތި މަޝްރޫއުތަކެއް ހިންގަން ޗައިނާއިން ދީފައިވާ ލޯނުތައް އަނބުރާ ދެއްކުން އެގައުމުން އަދިވެސް ފަސްކޮށްދީފައި ނުވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ޗައިނާއިން ރާއްޖެއަށް ދޫކޮށްފައިވާ ލޯނުތައް ފަސްކޮށްދިނުމާ ގުޅޭގޮތުން އިންޑިއާގެ ވިއޯން ޓީވީއަށް ދެއްވި އިންޓަރވިއުއެއްގައި ރައީސް ނަޝީދު ވިދާޅުވީ މި ލޯނުތައް އަނބުރާ ދެއްކުން ޗައިނާއިން އަދިވެސް ފަސްކޮށްދީފައި ނުވާ ކަމަށެވެ.
މި ހާލަތުގައި ރާއްޖެއަށް ކުރިމަތިލާންޖެހިފައިވާ ދަތިތަކާއެކު ވެސް ޗައިނާއިން އެ ލޯނުތައް އަނބުރާ ހޯދުމަށް މަސައްކަތް ކުރަމުންދާކަމަށާއި، އެއީ ބޮޑު އަދަދުތަކުން ކަމަށް ރައީސް ނަޝީދު ވިދާޅުވިއެވެ.
މި އަދަދުތައް ދެއްކުމަށް ރާއްޖެއަށް ގޮންޖެހުންތަކާ ކުރިމަތިލާންޖެހިފައިވަނީ ހަމަ އެކަނި ކޮވިޑްގެ ސަބަބުން ނޫން ކަމަށް ރައީސް ނަޝީދު ވިދާޅުވިއެވެ. މި ލޯނުތައް ނަގައިގެން ހިންގި މަޝްރޫޢުތަކުން ލޯނު އަނބުރާ ދެއްކޭނެ މިންވަރަށް އާމްދަނީ ނުލިބުން ވެސް އެއީ ކުރިމަތިވާ ދައްޗެއް ކަމަށް ރައީސް ނަޝީދު ވިދާޅުވިއެވެ.
މީގެ ކުރިން ރައީސް ނަޝީދު ވަނީ ޗައިނާއިން ރާއްޖެއަށް ދޫކޮށްފައިވާ ލޯނުތަކަކީ ލޯނުގެ ދަންތުރަތަކެއް ކަމެއް ވިދާޅުވެފައެވެ. މަޝްރޫޢުތައް ހިންގުމަށް ނަގާފައިވާ ލޯނު ވިޔަފާރީގެ ގޮތުން ދެކޮޅު ނުޖެހޭ ވަރަށް ބޮޑުކޮށްފައިވާ ކަމަށް ނަޝީދު ވިދާޅުވިއެވެ.
މީގެ އިތުރުން ނަޝީދު ވިދާޅުވީ ރާއްޖެއަށް ޗައިނާއިން ދޫކޮށްފައިވާ ލޯނުތައް ނުދެއްކުމުން ދައުލަތުގެ ކުންފުނިތަކުގެ ހިއްސާ އެގައުމުން ނަގާނެ ކަމަށެވެ. އަދި ޗައިނާއިން 16 ރަށެއް ރާއްޖެއިން ނަގާފައިވާ ކަމަށް ވެސް ވިދާޅުވިއެވެ.
ކޮވިޑް-19 އާ ގުޅިގެން މި ލޯނުތައް އަނބުރާ ދެއްކުން ފަސްކޮށްދިނުމަށް ރާއްޖެއިން އެދިފައި ވެސް ވެއެވެ.
ރާއްޖެއިން މިފަދައިން އެދުމުން މި ލޯނުތައް ފަސްކޮށްދިނުމާ ގުޅޭގޮތުން މަޝްވަރާ ކުރަމުންދާކަމަށް ރާއްޖޭގައި ހުންނަ ޗައިނާގެ އެމްބަސީން ވަނީ މިދިޔަ އަހަރުގެ ސެޕްޓެމްބަރު 20 ވަނަ ދުވަހު ހާމަކޮށްފައެވެ. އެހެންނަމަވެސް މި ލޯނުތައް އަނބުރާ ދެއްކުން ޗައިނާއިން އަދި ވެސް ފަސްކޮށްދީފައެއް ނުވެއެވެ.
