މެއި 6 ޙަމަލާގައި ހިމެނޭ 3 މީހަކު ޝަރީއަތް ނިމެންދެން ބަންދު، އެކަކަށް 30 ދުވަސް
21 ޖުލައި 2021 | ބުދަ 13:31މުޖާޒް އަޙުމަދު، ތަހުމީނު އަޙުމަދު، އަދި އަދުހަމް އަހުމަދު ރަޝީދު ޝަރީއަތް ނިމެންދެން ބަންދު
ރައްޔިތުންގެ މަޖިލީހުގެ ރައީސް، މުޙައްމަދު ނަޝީދަށް އަމާޒުކޮށް މެއި 6 ގައި ޙަމަލާދިން ސަރަޙައްދު
ރައްޔިތުންގެ މަޖިލީހުގެ ރައީސް، މުޙައްމަދު ނަޝީދަށް އަމާޒުކޮށް މެއި 6 ގައި ދިން ހަމަލާގައި ތުހުމަތުކުރެވޭ މީހުންގެ ތެރެއިން 3 މީހަކު ޝަރީއަތް ނިމެންދެން ބަންދުކޮށްފިއެވެ.
އެކަން ހާމަކޮށް ފުލުހުން ބުނީ، މި ޙަމަލާއާ ގުޅިގެން ހައްޔަރު ކުރެވިފައިވާ 4 މީހެއްގެ ތެރެއިން، މުޖާޒް އަޙުމަދު، ތަހުމީނު އަޙުމަދު، އަދި އަދުހަމް އަހުމަދު ރަޝީދު ޝަރީއަތް ނިމެންދެން ބަންދު ކުރުމަށް ކްރިމިނަލް ކޯޓުން ބުރާސްފަތި ދުވަހު ނިންމާފައިވާ ކަމަށެވެ. އަދި އަލީ ހައިޝަމްއަށް ވަނީ 30 ދުވަހަށް ބަންދުގެ މުއްދަތު ޖަހާފައެވެ.
އެކަމާ ގުޅޭގޮތުން ކޮމިޝަނަރ އޮފް ޕޮލިސް މުޙައްމަދު ހަމީދު ކުރެއްވި ޓްވީޓެއްގައި ވިދާޅުވީ، މި މައްސަލައާ ގުޅިގެން ފުރަތަމަ ހައްޔަރުކުރި 4 މީހުންގެ މައްޗަށް ދައުވާ ސާބިތު ކުރުމަށް ބޭނުންވާ ތަހުގީގީ އަދި ހެކިތަކާ ގުޅޭ ލިއެކިއުންތައް ހުށައަޅައި، ދައުވާކޮށްދިނުން އެދި ފޮނުވާފައިވާ ކަމަށެވެ. އަދި މި މައްސަލައިގެ ތަހުގީގު ކުރިއަށް ގެންދަވަނީ ޚާއްސަ ސަމާލުކަމެއް ދީގެންކަން ސީޕީ ފާހަގަ ކުރެއްވިއެވެ.
މިދިޔަ މޭ މަހުގެ 6ވަނަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ޓެރަރިސްޓު ހަމަލާގައި އަމަލީގޮތުން ބައިވެރިވި ހަތަރު މީހެއްގެ މައްޗަށް ދައުވާކުރަން ފޮނުވަން ތައްޔާރުވެފައިވާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުވެސް ވަނީ ވިދާޅުވެފައެވެ. 29 ޖޫންގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ، ރައީސް ނަޝީދަށް ދިން ހަމަލާގެ މައްސަލަތައް ވަރަށް ގާތުން ބައްލަވަމުން އަންނަ ކަމަށެވެ.
