އެސްޓީއޯ މާލޭ ލީގުގައި މިމަހުގެ 7 ވަނަ ދުވަހު ކްލަބް އީގަލްސް އާއި ނިއުރޭޑިއަންޓް ބައްދަލުކުރި މެޗު ނިމުނު ފަހުން ހިނގާދިޔަ ކަންތައްތަކާ ގުޅިގެން ނިއުރޭޑިއަންޓް ސްޕޯޓްސް ކުލަބުގެ މުހިންމު ތިން ކުޅުންތެރިއަކު ސަސްޕެންޑްކޮށްފިއެވެ.

ކްލަބު އީގަލްސް އަތުން ނިއުރޭޑިއަންޓް ބަލިވި މެޗަށް ފަހު ހިނގައިދިޔަ ކަންތައްކަކާ ގުޅިގެން ނިއުގެ ތިން ކުޅުންތެރިން ސަސްޕެންޑް ކުރުމުގެ އިތުރުން ޖޫރިމަނާ ވެސް ކޮށްފައި ވެއެވެ.

އެފްއޭއެމް އިން ފިޔަވަޅު އަޅައި ސަސްޕެންޑް ކޮށްފައިވާ ނިއުރޭޑިއަންޓުގެ މުހިންމު ކުޅުންތެރިންނަކީ ގޯލްކީޕަރު އިމްރާން މުޙައްމަދާއި ފޯވާޑް އެޑްރިއަން ގަލާޑޯ އާއި، މިޑްފީލްޑަރ ޖަމަލް ރޮމާނޯއެވެ. މިއިން ކޮންމެ ކުޅުންތެރިއެއް ވެސް ސަސްޕެންޑް ކޮށްފައި ވަނީ ދެ މެޗަށެވެ.

ކީޕަރު އިމްރާން މުޙައްމަދު ދެ މެޗަށް ސަސްޕެންޑް ކުރުމަށް އެފްއޭއެމް ބުނެފައި ވަނީ ދެ ކުޅުންތެރިއެއްގެ މެދުގައި ހިނގާދިޔަ ހަމަނުޖެހުމެއް ހޫނުކުރުމަށް އިމްރާންގެ ސަބަބުން މަގުފަހިވެފައިވާ ކަމަށެވެ.

އިމްރާނަކީ 17 އަހަރު ޤައުމީ ޓީމަށް ކުޅުނު ކީޕަރަކަށްވުމުން އެހެން ކީޕަރުންނަށް ނަމޫނާއަކަށް ވާންޖެހޭނެކަން ފާހަގަކޮށްފައި ވެއެވެ. ސަސްޕެންޑްކުރުމުގެ އިތުރުން އިމްރާން ވަނީ 2،000ރ. އިން ޖޫރިމަނާކޮށްފައެވެ.

ގަލާޑޯ ސަސްޕެންޑްކުރީ މެޗު ނިމުމަށް ފަހު ދެ ޓީމްގެ ކުޅުންތެރިން ސަލާމް ކުރަމުންދިޔަ ވަގުތު އީގަލްސްގެ އިބްރާހީމް މުބީން އަހުމަދު ރަޝީދު ކޮއްޕާލާ، ހަމަލާދީފައި ވާތީ ކަމަށް އެފްއޭއެމްއިން ބުނެއެވެ. ސަސްޕެންޝަނުގެ އިތުރުން ގަލާޑޯ 4،000ރ. އިން ޖޫރިމަނާކޮށްފައި ވެސް ވެއެވެ.

ޖަމަލް ދެ މެޗަށް ސަސްޕެންޑްކުރުމުގެ އިތުރުން 4،000ރ. އިން ޖޫރިމަނާކުރީ މުބީން ގައިގަ ޖަހަން ހޫރާލި ފައިން އީގަލްސްގެ އެސިސްޓެންޓް ކޯޗު އަހުމަދު ޝާކިރުގެ ގައިގަ ޖަހާފައިވާތީއެވެ.

މީގެ އިތުރުން މިދިޔަ އަހަރު ބީޖީއަށް ކުޅުމަށްފަހު މިއަހަރު ނިއުރޭޑިއަންޓްގެ ލިސްޓްގައި ހިމަނާފައިވާ ޞޮލާހް ވަނީ ހަ މެޗަށް ސަސްޕެންޑްކޮށްފައެވެ. އޭނާ ސަސްޕެންޑްކުރީ އެދުވަހުގެ ލިސްޓްގައި ނެތި، ކުޅިބަލާ މީހުންގެ ތެރޭގައި އިނދެ ދަނޑަށް އަރާ މުބީންއަށް ހަމަލާދިނުމުންނެވެ.

ނިއުރޭޑިއަންޓުގެ އިތުރުން ކުލަބު އީގަލްސްގެ މުބީން ވެސް ވަނީ ދެ މެޗަށް ސަސްޕެންޑްކޮށް 4،00ރ. އިން ޖޫރިމަނާކޮށްފައެވެ. މުބީން ސަސްޕެންޑްކުރީ ރައްދުގައި ގަލާޑޯ ފައިގަ ފައިން ޖަހާފައިވާތީއެވެ.

އީގަލްސްގެ އެސިސްޓެންޓް ކޯޗު އަހުމަދު ނިމާދު ވެސް ވަނީ ފަސް މެޗަށް ސަސްޕެންޑްކޮށް 8،000ރ. އިން ޖޫރިމަނާކޮށްފައެވެ.