ސިންގަޕޫރުގެ ސުކޫލެއްގައި ކިޔަވަމުން ދިޔަ 13 އަހަރުގެ ކުއްޖަކު މަރާލައިފިއެވެ.
ބީބީސީގައި ރިޕޯޓު ކޮށްފައިވާ ގޮތުން 13 އަހަރުގެ ކުއްޖާ މަރާލާފައިވަނީ އެ ޤައުމުގެ ރިވަރ ވެލީ ހައި ސްކޫލުގައި ކިޔަވަމުންދިޔަ 16 އަހަރުގެ ދަރިވަރެކެވެ. އޭނާގެ ހަށިގަނޑު ފެނިފައިވަނީ އެ ސުކޫލުގެ ފާޚާނާ ތެރެއިންނެވެ. މި ހާދިސާއާ ގުޅުންހުރި ފުރޯއެއް ފުލުހުންގެ ބެލުމުގެ ދަށަށް ގެންގޮސްފައިވާކަމަށް ބީބީސީގައި ރިޕޯޓު ކޮށްފައިވެއެވެ. އެ ގައުމުގެ ލޯ އެންޑް ހޯމް އެފެއާޒް މިނިސްޓަރ ކޭ ޝަންމޫގަން ވިދާޅުވާ ގޮތުގައި ހަމަލާ ދިނުމަށް ބޭނުންކޮށްފައިވާ ފުރޯއަކީ އޮންލައިންކޮށް ގަނެފައިވާ ފުރޯއެކެވެ.
ރިޕޯޓުތައް ބުނާގޮތުން މި ޙާދިސާގައި ތުހުމަތު ކުރެވޭ ކުއްޖާ މިހާރު ވަނީ ހައްޔަރު ކޮށްފައެވެ. އަދި އޭނާގެ މައްޗަށް ގަސްތުގައި މީހަކު މަރާލުމުގެ ކުށުގެ ދައުވާ އުފުލާފައިވާއިރު، ސިންގަޕޫރުގައި އެ ކުށުގެ އަދަބަކީ މަރަށް މަރު ހިފުމެވެ. ނަމަވެސް އޭނާއަކީ 18 އަހަރު ނުފުރޭ ކުއްޖަކަށްވާތީ، އަދަބު، އުމުރު ދުވަހުގެ ޖަލު ހުކުމަކަށް ބަދަލުވުން އެކަށީގެންވާކަމަށް ބީބީސީގައި ރިޕޯޓު ކޮށްފައިވެއެވެ.
އޭނާގެ ސައިކޭޓްރިކް އެސެސްމަންޓެއް ހެދުމަށް ޕްރޮސެކިއުޓަރުން މިހާރު ވަނީ އެދިފައެވެ. އެގޮތުން 2019 ވަނަ އަހަރު އޭނާ އަމިއްލައަށް މަރުވާން މަސައްކަތް ކުރި ކަމަށާއި، އޭރު ނަފްސާނީ ބައްޔަށް ފަރުވާ ހޯދާފައިވާކަމަށް ޕްރޮސެކިއުޓަރުން ވަނީ ކޯޓުގައި ބުނެފައެވެ.
މުޅި ދުނިޔޭގެ ނިސްބަތުން އެންމެ ކުށް މަދު އެއް ގައުމުގެ ގޮތުގައި ފާހަގަ ކުރެވޭ ސިންގަޕޫރުގައި މިފަދަ ހާދިސާއެއް ހިނގައިގެން ދިއުމާއެކު، އެ ގައުމުގެ ރައްޔިތުންވެސް ތިބީ ބޮޑު ސިހުމެއްގެ ތެރޭގައެވެ.
