ފުވައްމުލަކު ހޮސްޕިޓަލްގެ ޚިދުމަތްތައް ފުޅާކުރުމަށް ކުރާ މަސައްކަތުގެ ދަށުން ކޮވިޑް-19ށް ޓެސްޓް ހެދޭނެ ކެޕޭސިޓީ އިތުރުކޮށްފިއެވެ.

އެ ހޮސްޕިޓަލުން ބުނީ ކޮވިޑް-19 ޖެހިފައިވޭތޯ ޓެސްޓް ހެދުމުގެ ކެޕޭސިޓީ އެ ހޮސްޕިޓަލުގެ ލެބޯޓްރީގައި އިތުރުކުރުމަށް އަލަށް ބެހެއްޓި "ޕޮއިންޓް އޮފް ކެއަރ – ރިއަލްޓައިމް ޕީ.ސީ.އާރ މެޝިން" އިންސްޓޯލްކޮށްފައިވާ ކަމަށެވެ. އަދި އެ މެޝިންގެ ވެލިޑޭޝަން ހަދައި، ބޭނުން ކުރުމަށް މިހާރު ތައްޔާރުވެފައިވާ ކަމަށް އެ ހޮސްޕިޓަލުން ބުނެއެވެ.

ފުވައްމުލަކު ހޮސްޕިޓަލުން ބުނީ މި މެޝިން ބޭނުންކޮށްގެން ދުވާލަކަށް 80 މީހުންގެ ޓެސްޓް ހެދޭނެ ކަމަށެވެ.

ކޮވިޑް-19 އަށް ޓެސްޓު ކުރުމުގެ ކެޕޭސިޓީ އަތޮޅުތަކުގައި އިތުރުކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން އަތޮޅުތެރެއަށް 15 ޕީސީއާރް މެޝިން ފޮނުވުމަށް ނިންމާފައިވާ ކަމަށް މީގެ ކުރިން ހެލްތް މިނިސްޓަރ އަހުމަދު ނަސީމް ވިދާޅުވެފައިވެއެވެ. އަދި މިހާތަނަށް އައިރު ށ. ފުނަދޫ، ޅ. ނައިފަރު ގއ. ވިލިނގިލި، ކުޅުދުއްފުށި ސިޓީ، ނ. މާފަރު، އައްޑޫ ސިޓީ، ބ. އޭދަފުށި. ރ. އުނގޫފާރު، ގދ. ތިނަދޫ އަދި ލ. ގަމުގައި ޖީން-އެކްސްޕާޓް ކާޓްރީޖް ބޭނުންކޮށްގެން ކޮވިޑް-19 އަށް ޓެސްޓް ކުރެވޭނެ އިންތިޒާމް ވަނީ ހަމަޖައްސާފައެވެ. ކުރިއަށް އޮތްތަނުގައި އަތޮޅުތެރޭގައި ކޮވިޑް-19 އަށް ޓެސްޓު ކުރުމުގެ ކެޕޭސިޓީ އިތުރުކުރާނެ ކަމަށް މިނިސްޓްރީން ބުނެއެވެ.