އެމްޑީޕީގެ ވެރިކަމެއްގައި ޕާޓީގެ އަސާސްތައް ބަލިކަށިކޮށްލެވިގެން ނުވާނެ

އެމްޑީޕީގެ ރައީސުލްޖުމްހޫރިއްޔާއެއް ހުންނަވާ ވެރިކަމެއްގައި އެ ޕާޓީގައި ޒަމާނުއްސުރެ އޮތް މެދުމިނުގެ އަސާސްތައް ބަލިކަށިކޮށްލުމަށް ފުރުސަތު ދެވިގެން ނުވާނެ ކަމަށް ގަބޫލުކުރާ ކަމަށް އެމްޑީޕީގެ މާފަންނު އުތުރު ދާއިރާއިން ބުނެފިއެވެ.

އެމްޑީޕީގެ މާފަންނު އުތުރު ދާއިރާއިން މިފަދައިން ބުނެފައި މިވަނީ އެމްޑީޕީގެ އަސާސްތަކާއި އުސޫލުތައް ނެގެހެއްޓުމަށް ޕާޓީގެ ރައީސް، ރައީސް މުހައްމަދު ނަޝީދު ސަރުކާރަށް ގޮވާލެއްވި ގޮވާލެއްވުމަށް ތާއީދުކޮށް ނެރުނު ބަޔާނުގައެވެ.

އެމްޑީޕީގެ މާފަންނު އުތުރު ދާއިރާއިން ނެރުނު ބަޔާނުގައި ވަނީ ސަރުކާރަށް އެ ގޮވާލުން ގޮވާލައްވާފައި އެވަނީ ދެވަނަ ދެ ޕާޓީއެއްގެ ރައީސެއް ނޫންކަމާއި، އެ ގޮވާލެއްވުން ގޮވާލެއްވީ ޕާޓީގެ ރައީސް ކަމަށް ބުނެފައެވެ.  

6 މޭ 2021 ގައި ދެވުނު ޓެރަރިސްޓް ހަމަލާގެ ޝިކާރަކަށް ވެވަޑަގެންފައިވަނީ ވެސް ޚުދު އެމަނިކުފާނު ކަމުން، އެއީ މާފަންނު އުތުރު ދާއިރާއިން ނުހަނު ސީރިއަސްކޮށް ނަގަން ބޭނުންވާ މައްސަލައެއް ކަމަށް ވަނީ ބުނެފައެވެ.

އެމްޑީޕީ ބިނާވެގެންވަނީ ރާއްޖޭގައި ޒަމާނުއްސުރެ އޮތް އިސްލާމީ ރިވެތި މެދުމިނުގެ އުސޫލުތަކާއި، މިނިވަންކަމާއި، ހަމަހަމަކަމާއި، ތަރައްޤީ ގެނެސްދިނުމުގެ އަސާސްތަކުގެ މައްޗަށްކަމަށްވާއިރު، މި އަސާސްތަކާ ޚިލާފު އެހެން ޕާޓީތަކަކުން މި އަސާސްތައް ބަލިކަށިކޮށްލުމަށް އެ ޕާޓީގެ ރައީސެއް ހުންނަވާ ވެރިކަމެއްގައި ފުރުސަތު ދެވިގެން ނުވާނެކަމަށް ގަބޫލުކުރާ ކަމަށް ވެސް މާފަންނު އުތުރު ދާއިރާއިން ވަނީ ބުނެފައެވެ.

ދީނީ ހަރުކަށި ފިކުރު ރާއްޖޭގައި ފުޅާވެ، އެކަމުގެ ނުރައްކާ އޮތް މިންވަރު ސަލާމަތީ ޚިދުމަތްތަކުންނާއި ރައްޔިތުންގެ މަޖިލީހުގެ އިންކްއަރީ ރިޕޯޓުން ވެސް ސާފުކޮށް ހާމަކޮށްފައިވާކަން ފާހަގަކޮށް އެ ދާއިރާއިން ވަނީ، ދީނީ ހަރުކަށި ފިކުރަށް ނިސްބަތްވާ ފަރާތްތަކުން އެހެން މީހުންނަށް ކާފަރެއްގެ ލޭބަލް އަޅުވައި އެފަރާތްތަކުގެ ލޭ ހުއްދަކޮށް، ގަތުލުކޮށްފައިވާކަން ވެސް ފާހަގަކޮށްފައެވެ.

ރައީސް ނަޝީދު އަވަހާރަކޮށްލުމަށް އެމަނިކުފާނަށް އަމާޒުކޮށް ބޮމުގެ ހަމަލާއެއް ވެސް ދީފައިވަނީ ހަމަ މިމޭރުމުން ކަމަށާއި، ކަން މިހެން އޮތް އިރު އެމްޑީޕީގެ މެމްބަރުންގެ އިއްތިފާގުން ފާސްވެފައި އޮތް ނަފްރަތުގެ ބިލު ބޭރުކޮށްލުމަކީ ބަލައިގަންނާނެ ކަމެއް ނޫން ކަމަށް ވަނީ ބުނެފައެވެ.

އެކަމަކީ މި ޤައުމުގައި އޮތް މިފަދަ ސީރިއަސް އަދި ނުރައްކާ މައްސަލައެއް ހައްލުކުރުމަށް ކުރަން އޮތް އެންމެ ކުޑަ މިންވަރުކަމަށްވާއިރު، އެ މިންވަރުގެ ކަމެއް ކުރުމުގައި ވެސް ސަރުކާރުން އެއް ސްޓޭންޑެއް ނުހިފެހެއްޓެވިކަމީ، އެ ދާއިރާއިން އިންތިހާއަށް ކަންބޮޑުވާކަމެއް ކަމަށް ވަނީ ބުނެފައެވެ.

އެހެންކަމުން، ހަރުކަށި ފިކުރުތަކަށް ބާރުވެރިކަމާއި ކުރިއެރުމާއި ހިތްވަރު ލިބިދޭ މިފަދަ އަމަލުތަކުން، އެމްޑީޕީ ނިސްބަތްވާ މި ސަރުކާރުން އިޖާބަނުދެއްވުމަށާއި، އެމްޑީޕީގެ އަސާސްތަކަށް އިޙްތިރާމްކޮށް، ރައްޔިތުން އެ ޕާޓީއާމެދު ކުރި އުއްމީދުތަކާ އެއްގޮތަށް އަމަލުކުރުމަށް މާފަންނު އުތުރު ދާއިރާއިން ވަނީ ސަރުކާރަށް ގޮވާލާފައެވެ.

ރައީސް ނަޝީދުގެ ގޮވާލެއްވުމަށް އެމްޑީޕީގެ މާފަންނު އުތުރު ދާއިރާގެ އިތުރުން ގަލޮޅު ދެކުނު ދާއިރާއިންނާއި، ވިލިމާލެ ދާއިރާއިންނާއި، ހެންވޭރު ހުޅަނގު ދާއިރާއިންނާއި، އަދި ށ. މިލަންދޫ ދާއިރާގެ އިތުރުން އެމްޑީޕީގެ އަންހެނުންގެ ރޫހުން ވެސް ވަނީ ތާއީދުކޮށްފައެވެ.