ބޮލުގެ ނާށިގަނޑަށް ލިބުނު އަނިޔާއިން ރަނގަޅުވެ ވުލްވްސްގެ ފޯވާޑް ރައުލް ހިމެނޭޒް ޕްރީ-ސީޒަން މެޗެއްގައި ކުޅެފިއެވެ.
އިނގިރޭސި ޕްރިމިއާ ލީގުގައި މިދިޔަ އަހަރުގެ ނޮވެމްބަރު މަހުގެ 29 ވަނަ ދުވަހުގެރޭ އާސެނަލް އަތުން 2-1 ގެ ނަތީޖާއަކުން ވުލްވްސް މޮޅުވި މެޗުގައި ލިބުނު އަނިޔާއާ ގުޅިގެން ހިމެނޭޒްގެ ބޮލުގެ ނާށިގަނޑުގައި ރެނދުލިއެވެ. އެ މެޗު ފަށައިގެން ފަސްވަނަ މިނެޓުގައި އާސެނަލުގެ ޑިފެންޑަރު ޑޭވިޑް ލުއިޒް އާއި ހިމެނޭޒްގެ ދެ ބޯ ޖެހިގެން ދެ ކުޅުންތެރިންނަށްވެސް އަނިޔާވިއިރު، ހިމެނޭޒަށް ވަނީ ގާތްގަނޑަކަށް 10 މިނެޓު ވަންދެން ދަނޑުމަތީގައި ފަރުވާދީފައެވެ. އަދި ސީރިއަސް ހާލަތުގައި ހިމެނޭޒް ސީދާ ހޮސްޕިޓަލަށް ގެންދިޔައިރު، އޭނާގެ ކުއްލި އޮޕަރޭޝަނެއްވެސް ވަނީ ކޮށްފައެވެ.
އެ އޮޕަރޭޝަނަށްފަހު ޑިސެމްބަރު މަހުގެ ތެރޭގައި ހިމެނޭޒް ހޮސްޕިޓަލުން ދޫކޮށްލިއިރު، އަނިޔާގެ ފަހުން މި ނިމުނު ސީޒަނުގައި ހިމެނޭޒް މެޗެއް ކުޅެފައެއް ނުވެއެވެ. އެކަމަކު ކުރިއަށް އޮތް ސީޒަނަށް ތައްޔާރުވުމުގެ ގޮތުން ހޮނިހިރު ދުވަހު ވުލްވްސްއިން ކުޅުނު މެޗެއްގައި ހިމެނޭޒް ވަނީ ކުޅެފައެވެ. އެ މެޗުން ވުލްވްސް ވަނީ ތިންވަނަ ޑިވިޝަނުގެ ޓީމެއް ކަމަށްވާ ކްރޫ އަލެކްޒަންޑްރާ އަތުން 1-0 ގެ ނަތީޖާއަކުން ބަލިވެފައެވެ.
އަނިޔާއިން ރަނގަޅުވެ ހިމެނޭޒް އެނބުރި ކުޅުމުގެ ތެރެއަށް އައިރު، އަނިޔާގެ ކުރިން މިދިޔަ ސީޒަނުގައި އޭނާ ވަނީ ތަފާތު މޮޅު ކުޅުމެއް ދައްކާފައެވެ. އެގޮތުން މިދިޔަ ސީޒަނުގެ ޕްރިމިއާ ލީގުގައި ވުލްވްސްއަށް ކުޅެދިން 10 މެޗުގައި ހިމެނޭޒް ވަނީ ހަތަރު ލަނޑު ޖަހާފައެވެ.
ކުރިއަށް އޮތް ސީޒަނަށް ވުލްވްސްއިން ތައްޔާރުވަމުން އަންނައިރު، މިދިޔަ ސީޒަނުގައި އެ ޓީމަށް އިރުޝާދުދިން ނޫނޯ އެސްޕިރީޓޯ ސަންޓޯ ވަނީ ޓޮޓެންހަމް ހޮޓްސްޕާގެ ކޯޗުގެ މަގާމާ ހަވާލުވެފައެވެ. އެއާއެކު ވުލްވްސްއިން ވަނީ އަންނަ ސީޒަނަށް އެ ޓީމުގެ ކޯޗަކަށް ބެންފީކާގެ ކުރީގެ ކޯޗު ބްރޫނޯ ލޭގް ހަމަޖައްސާފައެވެ.
