ވަޒީރުން މެމްބަރުންނަށް އިންޒާރު ދީ، ބިރު ދައްކާ: ޢާޒިމް

ވަޒީރުން ރައްޔިތުންގެ މަޖިލީހުގެ މެމްބަރުންނަށް އިންޒާރު ދެމުންދާކަމަށް ރައްޔިތުންގެ މަޖިލީހުގެ މެދުހެންވޭރު ދާއިރާގެ މެމްބަރު އަދި މޯލްޑިވިއަން ޑިމޮކްރެޓިކް ޕާޓީގެ ޕާލިމެންޓްރީ ގްރޫޕްގެ ލީޑަރު ޢަލީ ޢާޒިމް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ޢާޒިމް ވިދާޅުވީ ވަކި ބިލެއް ވަކި ގޮތަކަށް ނިންމަން، ނުވަތަ ވަކި ކަމެއް ގާނޫނުގައި ލިޔެ ލޮބީ ކުރުމަކީ ރަނގަޅު ކަމެއް ކަމަށެވެ. އަދި ރައްޔިތުންނާއި ސަރުކާރަށް ވެސް ކުންފުނިތަކާއި ވަޒީރުންނަށް ވެސް އެކަން ކުރެވިދާނެ ކަމަށެވެ. ނަމަވެސް މެމްބަރުންނަށް ބިރު ދެއްކުމާއި، ވަކި ގޮތަކަށް ކަންކަން ކުރާނެ ކަމަށް ވިދާޅުވެ އިންޒާރު ދިނުމަކީ ވަރަށް ދެރަކޮށް ހިނގާ ކަމެއް ކަަމަށެވެ. އަދި މިއީ މެމްބަރުންގެ ވަރަށް ބޮޑު ނުތަނަވަސްކަމެއް އޮތް ކަމެއް ކަމަށާއި، މިކަމަށް ވަރަށް ފާޅުގައި އެކި ގޮތްގޮތަށް، މެމްބަރުން މަޖިލީހުގެ ތަޅުމުގައި ބަހުސްކުރައްވަމުން، އަލިއަޅުވާލައްވާފައިވާ ކަމަށެވެ.

އާޒިމް ވިދާޅުވީ ދެން އަންނަ ދައުރަކަށް އިންތިޚާބު ވުމަށް ދާއިރާ ތަރައްގީ ކުރުމަކީ ބައެއް މެމްބަރުންގެ ވިސްނުން ކަމަށާއި، އެކަމުގައި ބައެއް މެމްބަރުންނަށް ވަރަށް ބޮޑެތި ފިއްތުންތައް ވަޒީރުން ފަރާތުން ކުރިމަތިވާ ކަމަށެވެ. އެހެންކަމުން ވަކި ދާއިރާއަކަށް ފައިދާއާއި މަންފާވާ ގޮތަށް މަސައްކަތް ކުރާކުރުން ބަދަލުކުރަންޖެހޭ މޭރުމަކުން އާޒިމް ވާހަކަދެއްކެވިއެވެ. އަދި ރައްޔިތުން މަޖިލީހުގެ މެމްބަރުން، ގާނޫނު އަސާސީގައި ވަކި ދާއިރާއެއް ތަމްސީލު ޖެހުނުކަމުގައިވީ ނަމަވެސް ކަންކަން ކުރަންޖެހޭނީ ގައުމު އިސްކޮށްގެން ކަަމަށާއި، މިއީ އެއްގައުމެއްގެ ގޮތުގައި ދެކިގެން ކަމަށް އާޒިމް ވިދާޅުވިއެވެ.

މަޖިލީހުގެ ބައެއް މެމްބަރުން ވިޔަފާރީގެ ދާއިރާގައި މަސައްކަތްކުރާކަން ފާހަގަކުރައްވައި އާޒިމް ވިދާޅުވީ މިވަގުތު އެމެމްބަރުން ސަރުކާރުގެ ވިޔަފާރީގެ ތެރެއިން ދުރަށްދާން ޖެހޭ ކަމަށެވެ. ސަރުކާރުގެ މަޝްރޫއުތަކުގެ ޕްރޮޖެކްޓްތައް ހޯދުމާއި، މުއައްސަސާތަކާއި މިނިސްޓްރީތަކުން އާއިލާ މީހުންނަށް ވަޒީފާ ހަމަޖެއްސުމުގެ އިތުރުން ވެސް އެހެނިހެން ކަންކަމުގައި ވަޒީރުންގެ އަރިހަށް މެމްބަރުން ސަލާމް ޖަހަންދާ ކަމަށް އާޒިމް ވިދާޅުވިއެވެ. އަދި މިފަދަ ކަންކަން ކުރިމަތިވަމުންދާތީ ވަޒީރުން އެކިކަންކަމުގައި މެމްބަރުންނަށް ނުފޫޒު ފޯރުވާ ކަމަށާއި، ބައެއް ބިލްތަކަށް ވޯޓު ދިނުމުގައި ވަކި ގޮތަކަށް ނުވަތަ ނުކިއްސަރުކޮށް ވޯޓު ދިނުމަށް މެމްބަރުންނަށް މަޖުބޫރުވާ ކަމަށް އާޒިމް ވިދާޅުވިއެވެ.