"ތަސްވީރު" - 10،000 ޑޮލަރުގެ އަގުހުރި އިނާމުތައް

ކުރެހުންތެރިންގެ ހުނަރުން ރާއްޖޭގެ ރީތިކަން ދައްކައިދީ 10،000 ޑޮލަރުގެ އަގުހުރި އިނާމުތަކަކާއެކު މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)އިން ކުރެހުމުގެ މުބާރާތެއް ލޯންޗުކޮށްފިއެވެ.

ޖުލައި 15 ވަނަ ދުވަހު އެމްއެމްޕީއާރުސީން ލޯންޗުކުރި ކުރެހުމުގެ މުބާރާތަކީ، "ތަސްވީރު-މޯލްޑިވްސް ތުރޫ އާރޓް" އެވެ. މި މުބާރާތުގައި ރާއްޖޭގެ އިތުރުން ބައިނަލްއަގުވާމީ ކުރެހުންތެރިންނަށް ބައިވެރިވުމުގެ ފުރުސަތު ވަނީ ހުޅުވާލާފައެވެ.

އެމްއެމްޕީއާރުސީން މައުލޫމާތުދޭ ގޮތުގައި މި މުބާރާތް ކުރިއަށް ގެންދާނީ ޖުލައި 15 ވަނަ ދުވަހުން އޮގަސްޓް 15 ވަނަ ދުވަހުގެ ނިޔަލަށެވެ. މުބާރާތުގައި ބައިވެރިވާ ފަރާތްތަކުގެ ތެރެއިން ދިވެހި ކުރެހުންތެރިންގެ އުފެއްދުންތަކާއި ބައިނަލްއަގުވާމީ ކުރެހުންތެރިންގެ އުފެއްދުންތައް މިންކުރެވިގެން ދާނީ ވަކިވަކިންނެވެ. އެގޮތުން ހޮވާލެވިފައިވާ މިނިވަން ޖަޖުންގެ ޕެނަލަކުން ކުރެހުންތައް މިންކޮށް، އެކުރެހުންތަކަށް މާކްސް ދޭނެއެވެ. އޭގެ ތެރެއިން ފާހަގަކޮށްލެވޭ 12 ކުރެހުމެއް ހޮވުމަށް ވަނީ ހަމަޖެހިފައެވެ. އެއީ ދިވެހި ކުރެހުންތެރިންގެ 6 ކުރެހުމާއި ބައިނަލްއަގުވާމީ ބައިވެރިންގެ 6 ކުރެހުމެވެ.

މިކުރެހުންތައް އެމްއެމްޕީއާރުސީގެ ސޯޝަލް މީޑިއާ ޕްލެޓްފޯމްތަކުގައި ޕްރޮމޯޓްކޮށް، ޕޯސްޓް ތަކަށް ލިބޭ ލައިކްސް އިން 50 އިންސައްތަ އަދި ޖަޖުންގެ މާކްސްގެ 50 އިންސައްތައަށް ބަލައި އެންމެ ގިނަ މާކްސް ލިބޭ ހަތަރު ކުރެހުން މުބާރާތުގެ އެންމެ މޮޅު ކުރެހުންތަކުގެ ގޮތުގައި ހޮވުމަށް ވަނީ ހަމަޖެހިފައެވެ. އެއީ ރާއްޖޭގެ ކުރެހުންތެރިންގެ ކުރެހުންތަކުގެ ތެރެއިން އެއްވަނަ ކުރެހުމާއި ދެވަނަ ކުރެހުމާއި، ބައިނަލްއަޤްވާމީ ކުރެހުންތެރިންގެ ކުރެހުންތަކުގެ ތެރެއިން އެއްވަނައާއި ދެވަނައެވެ. ދެ ކެޓަގެރީ އިންވެސް އެއްވަނައަށް ދާ ފަރާތަށް 3000 ޑޮލަރު ލިބިގެންދާއިރު، ދެ ވަނައަށް ހޮވޭ ފަރާތަށް 2000 ޑޮލަރު ލިބޭނެއެވެ. ހަތަރު ބައިވެރިންނަށް ޖުމްލަ 10،000 ޑޮލަރު އިނާމުގެ ގޮތުގައި ދިނުމަށް އެމްއެމްޕީއާރުސީން ވަނީ ކަނޑައަޅާފައެވެ.

ތިން މީޑިއަމް އަކަށް މި މުބާރާތަށް ކުރެހުންތައް ހުށަހެޅޭނެ ކަމަށާއި އެއީ ޕެއިންޓިންގްސް، ޑިޖިޓަލް އާރޓް، އަދި އިތުރުން މިކްސްޑް މީޑިއާ އާޓްވޯކްސް ކަމަށް އެމްއެމްޕީއާރުސީން ބުނެއެވެ. އަދި މި މުބާރާތަށް ހުށަހަޅާ ކުރެހުން ތަކުގެ ތެރެއިން އުފެއްދުންތެރިކަމަށާއި، ކޮންސެޕްޓަށާއި އެ ކުރެހުމުގެ މީޑިއަމްގައި ފަންނުވެރިކަމަށް ބެލުމަށް ވަނީ ހަމަޖެހިފައެވެ.

މުބާރާތުގައި ބައިވެރިވާ ހުރިހާ ފަރާތްތަކުގެ ހުށަހެޅުންތައް ހުށަހެޅުމަށް މުބާރާތަށް ޚާއްސަކޮށް ވިޒިޓް މޯލްޑިވްސްއިންމައިކްރޯ ސައިޓެއް ތައާރަފުކޮށްފައިވާއިރު، އެމްއެމްޕީއާރުސީގެ މެނޭޖިން ޑިރެކްޓަރ ޠައްޔިބު މުޙައްމަދު ވަނީ މި މުބާރާތަކީ، ރާއްޖެ އިޝްތިހާރުކުރުމަށް އެކުންފުނިން ކުރިއަށް ގެންދާ މަސައްކަތްތަކުގެ ތެރެއިން އެކި ޑިޖިޓަލް ޕްލެޓްފޯމްތަކާއި ސޯޝަލް މީޑިޔާ ތަކުގައި ވިޒިޓް މޯލްޑިވްސްގެ ބައިވެރިވުން އިތުރުކުރުމަށް އެކުލަވާލާފައިވާ ސޯޝަލް މީޑިޔާ ސްޓްރެޓެޖީގެ ދަށުން ކުރިއަށްގެންދާ ހަރަކާތެއް ކަަމަށް ވިދާޅުވެފައެވެ.

އެމްއެމްޕީއާރުސީން މުޅިން އަލަށް ކުރިއަށް ގެންދާ މި މުބާރާތުގެ އަމާޒަކީ ދިވެހި އާރޓިސްޓް ކޮމިއުނިޓީއަށް ހިތްވަރާއި އެއްބާރުލުންދީ އެކި މީޑިއަމްތަކުގެ އާޓްވޯކް މެދުވެރިކޮށް ރާއްޖޭގެ ގުދުރަތީ އީކޯސިސްޓަމްސްގެ ހިތްގައިމުކަން ދައްކައިލުމެވެ.