މެންބަރު އުޝާމް އައު ޕާޓީއެއް އުފައްދަވަނީ
ޖުމްހޫރީ ޕާޓީ ތެރެއިން ވެސް އިތުރު ޕާޓީއެއް އުފައްދަން އުޅޭކަމުގެ ޚަބަރުތަކެއް ފެތުރެން ވަނީ ފަށާފައި
ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު އަހުމަދު އުޝާމް
ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު އަހުމަދު އުޝާމު އައު ޕާޓީއެއް އުފައްދަވަން ނިންމަވައިފިއެވެ.
ރައްޔިތުންގެ މަޖިލީހުގައި މިނިވަން މެންބަރެއްގެ ގޮތުގައި ވިލިމާލެ ދާއިރާ ތަމްސީލު ކުރައްވަމުން ގެންދަވާ މެންބަރު އުޝާމު ވިދާޅުވީ ރައްޔިތުންގެ މަޖިލީހުގައި މިހާރު އޮތް ލީޑަރޝިޕްގެ ދަށުން މަޖިލީހުގައި މިނިވަން މެންބަރެއްގެ ގޮތުގައި މަސައްކަތްކުރެއްވުމުގައި ވަރަށްބޮޑެތި ގޮންޖެހުންތަކަކާ ކުރިމަތިލައްވަންޖެހިވަޑައިންނަވާ ކަމަށެވެ.
އެގޮތުން ގާނޫނީ ގޮތުން މުހިންމު މައްސަލަތަކުގައި އެކަށީގެންވާ ގޮތެއްގައި ބަހުސްކޮށް ވާހަކަދެއްކެވުމަށް ފުރުސަތު ލިބިނުލައްވާ ކަމަށާއި، ބައެއްފަހަރު ލިބިލައްވަނީ އެންމެ 30 ސިކުންތު ކަމަށެވެ. އޭގެއިތުރުން ދާއިރާގެ ކަންކަމުގައި ސަރުކާރުގެތެރެއިން މަސައްކަތް ކުރުމުގައި ވެސް އެކަށީގެންވާ ގޮތެއްގައި އެއްބާރުލުން ހޯއްދެވުމުގައި ދަތިތަކެއް އެބަހުރި ކަމަށް މެންބަރު ވިދާޅުވިއެވެ.
މެންބަރު އުޝާމް ވިދާޅުވީ އެހެންކަމުން މި މައްސަލައަށް ހައްލެއް ހޯއްދެވުމަށް ގިނަ ފަރާތްތަކަކާ މަޝްވަރާ ކުރައްވާފައިވާ ކަމަށެވެ. އަދި މިކަމުގެ އެންމެ ރަނގަޅު ހައްލެއްކަމަށް ފެނިވަޑައިންނަވާފައިވަނީ މެންބަރުގެ ހިއްސާ އެކުލެވޭގޮތަށް ސިޔާސީ އައު ޕާޓީއެއް އުފެއްދެވުން ކަމަށް ވުމާއެކު މެންބަރުގެ ނަމުގައި ސިޔާސީ ޕާޓީއެއް އުފެއްދެވުމުގެ ހުއްދައަކަށް އެދި އިލެކްޝަންސް ކޮމިޝަނަށް ހުށަހަޅުއްވާފައިވާ ކަމަށެވެ.
ރާއްޖޭގެ ސިޔާސީ ދާއިރާ އަނެއްކާވެސް ވަރަށް ބޮޑަށް ހަލަބޮލި ވެފައިވާ މި ދަނޑިވަޅުގައި ކުރީގެ ރައީސް މައުމޫން ޢަބްދުލް ޤައްޔޫމްގެ އެންމެ އަރިސް ބޭފުޅުންގެ ތެރޭގައި ހިމެނިވަޑައިގަންނަވާ ޢަބްދުﷲ ކަމާލުއްދީން، ސިޔާސީ ޕާޓީއެއް ރަޖިސްޓްރީކުރުމަށް އިލެކްޝަންސް ކޮމިޝަނަށް ވަނީ ހުށަހަޅުއްވާފައެވެ.
މީގެ އިތުރުން އެމްޑީޕީގެ ތެރޭގައި ދެ ރައީސުންގެ ފެކްޝަނެއް އުފެދިފައިވާކަމުގެ އަޑުގަދަވެފައިވާއިރު، ޖުމްހޫރީ ޕާޓީ ތެރެއިން ވެސް އިތުރު ޕާޓީއެއް އުފައްދަން އުޅޭކަމުގެ ޚަބަރުތަކެއް ފެތުރެން ވަނީ ފަށާފައެވެ. ރާއްޖޭގައި މިހާރުވެސް 10 ސިޔާސީ ޕާޓީ އެބައޮތެވެ.
