އިރާގުގެ ހޮސްޕިޓަލުގައި އަލިފާން ރޯވީ، ކަރަންޓު ޝޯޓޭޖެއްވެ، އޮކްސިޖަން ފުޅިއެއް ގޮވައިގެން

އިރާގުގެ ހޮސްޕިޓަލުގައި ކޮވިޑް އައިސޮލޭޝަން ވޯޑުގައި ހިނގި އަލިފާނުގެ ހާދިސާގައި މަރުވި މީހުންގެ އަދަދު 92ށް އަރައިފިއެވެ.

ހޯމަ ދުވަހުގެރޭ ދަންވަރު ހިނގި މިހާދިސާއަކީ ފާއިތުވި ތިން މަހުގެ ތެރޭގައި ހިނގި މިފަދަ ދެވަނަ ހާދިސާއެވެ. އަލް-ޙުސައިން ހޮސްޕިޓަލުގައި ހިނގި މިހާދިސާގައި މިހާތަނަށް 92 މީހުން މަރުވެ 100 މީހަކު ފިހިފައިވާކަމަށް ސިއްހީ އޮފިޝަލުން މައުލޫމާތުދެއެވެ.

އަލިފާން ރޯވި ސަބަބު ދެނެގަތުމަށް ހިންގި ތަހުގީގުން އެނގުނު ގޮތުގައި އަލިފާން ރޯވީ ކަރަންޓް ޝޯޓޭޖެއްވެ، އޮކްސިޖަން ފުޅިއެއް ގޮވުމުގެ ސަބަބުންނެވެ. މިހާދިސާ ހިނގުމާއެކު، ބޮޑުވަޒީރު މުޞްޠަފާ އަލް-ކަދީމީ ވަނީ ކުއްލި ބައްދަލުވުމެއް ބާއްވާފައެވެ. އެބައްދަލުވުމުގައި، ބޮޑުވަޒީރުވަނީ، ހޮސްޕިޓަލުގެ ޑިރެކްޓަރާއި، ނަސްރިއްޔާ ސިޓީގެ ޑިފެންސް ޗީފް ސަސްޕެންޑްކޮށް ހައްޔަރުކުރުމަށް އަމުރު ކޮށްފައެވެ.

އެ ސިޓީގެ ކޯޓުންވަނީ މިހާދިސާއާ ގުޅިގެން 13 މީހަކު ހައްޔަރުކުރުމުގެ އަމުރު ނެރެފައެވެ.

އަލިފާން ރޯވި ކޮވިޑް އައިސޮލޭޝަން ވޯޑުގައި 70 އެނދު ހުރެއެވެ. ހާދިސާ ހިނގުމާއެކު އެ ސިޓީގެ ގިނަ އަދަދެއްގެ އާއްމުން ވަނީ ހޮސްޕިޓަލް ހުންނަ މަގަށް ޖަމާވެފައެވެ. އެމީހުން ބުނަމުންދަނީ، ކޮރަޕްޓްވެފައިވާ އޮފިޝަލުން މިކަމުގައި ޖަވާބުދާރީ ކުރުވަން ޖެހޭނެ ކަމަށެވެ. މިއީ ކުށެއްނެތް ބަޔަކު ގަސްދުގައި މަރާލުން ކަމަށެވެ.

މިދިޔަ އެޕްރީލް މަހުގެ ތެރޭގައި ވެސް އޮކްސިޖަން ފުޅިތަކެއް ގޮވައިގެން ހިނގި ހާދިސާގައި 82 މީހުން މަރުވެ 110 މީހަކަށް އަނިޔާވިއެވެ. ހާދިސާގައި އަނިޔާވި މީހުންނާއި، މަރުވި މީހުންނަކީ، ކޮވިޑްގެ ސަބަބުން ނޭވާލާން އުނދަގޫވެ، އޮކްސިޖަން ގުޅައިގެން ފަރުވާ ދެމުން ދިޔަ މީހުންނެވެ.

ކައިރިކައިރީގައި ހިނގި މިފަދަ ދެވަނަ ހާދިސާއާއެކު ހެލްތު މިނިސްޓަރ ޙަސަން އަލް-ތަމީމީ ވެސް ވަނީ އިސްތިއުފާ ދީފައެވެ. އެ ހޮސްޕިޓަލުގެ މެނޭޖަރު ވަނީ މި ހާދިސާ ހިނގުމާއެކު މަގާމުން އިސްތިއުފާ ދީފައި ކަމަށް އަލްޖަޒީރާގައި ރިޕޯޓުކޮށްފައިވެއެވެ.

އިރާގުގައި މިހާތަނަށް 1.4 މިލިއަން މީހުންނަށް ކޮވިޑް ޖެހިގެންވަނީ ރިޕޯޓުކޮށްފައެވެ. އަދި މި ބަލީގައި އެ ގައުމުން 17،000 މީހުންވަނީ މަރުވެފައެވެ.