އުރީދޫގެ އަތޮޅު ދުވުން މި އަހަރު އޯގަސްޓް މަހުގައި ބޭއްވުމަށް ނިންމައިފިއެވެ.

އުރީދޫ މޯލްޑިވްސްއިން ބުނީ "އުރީދޫ އަތޮޅު ދުވުން 2021" އިއުލާނުކޮށް، ބައިވެރިން ރަޖިސްޓަރީވުމުގެ ފުރުސަތު އޮންލައިން ޕޯޓަލް ore.do/regstr މެދުވެރިކޮށް އަންގާރަ ދުވަހު ހުޅުވާލާފައިވާ ކަމަށެވެ.

ރާއްޖޭގައި ބޭއްވި ފުރަތަމަ ނޭޝަންވައިޑް ވަރޗުއަލް ރަން "އުރީދޫ އަތޮޅު ދުވުން" ފުރަތަމަ ފެށިގެން ދިޔައީ 2020 ވަނަ އަހަރު އުރީދޫގެ އަހަރީ ދުވަސް ފާހަގަކުރުމުގެ ގޮތުން، ރާއްޖެ އާއި ރާއްޖެއިން ބޭރުގެ އެކި ހިސާބުތަކުން ފަސްހާހަށްވުރެ ގިނަ ބައިވެރިންނާއެކުއެވެ. މި އަހަރު އެ ކުންފުނީގެ 16 ވަނަ އަހަރީ ދުވަހުގެ މުނާސަބަތާ ގުޅިގެން ކުރިއަށް ގެންދާ ހާއްސަ ހަރަކާތްތަކުގެ ތެރޭގައި އިތުރު ފުރިހަމަކަމާއެކު މި ވަރޗުއަލް ދުވުން ބާއްވަން ހަމަޖެހިފައި މިވަނީ މި ދުވުމަށް ލިބިފައިވާ ބޮޑު ތަރުހީބާއެކު ދުރުގައި ތިއްބެވި ކަސްޓަމަރުންނަށް ވެސް ބައިވެރިވެވޭނެ އިވެންޓެއްގެ ގޮތުގައެވެ.

މި އަހަރުގެ ދުވުމުގައި 5 ކިލޯމީޓަރުގެ އިތުރުން، އަލަށް ތައާރަފް ކުރެވުނު 10 ކިލޯމީޓަރ ގެ ކެޓެގަރީއަށް ރަޖިސްޓަރީވުމުގެ ފުރުސަތު ވެސް ވަނީ މިހާރު ހުޅުވާލާފައެވެ. ދެ ކެޓެގަރީގައި ބައިވެރިވުމަށް ބޭނުންވާ ދުވުންތެރިން ދެ ކެޓެގަރީއަށް ވަކިން 27 ޖުލައި 2021 ދުވަހުގެ ހަވީރު 6 ގެ ކުރިން  ރަޖިސްޓަރީވެ މުޅިއަކު 15 ކިލޯމީޓަރު ފުރިހަމަ ކުރަން ޖެހެއެވެ. މި ދުވުމަކީ، އެކަނިވިޔަސް އަދި އާއިލާއާއި ރައްޓެހިންނާއެކުގައި ވެސް، ގައިދުރުކަމާއެކު ބައިވެރިވެ މަޖާ ވަގުތުކޮޅެއް ހޭދަކޮށްލެވޭނެ އިވެންޓެކެވެ. 5 އަހަރުން މަތީގެ ހުރިހާ މީހުންނަށް ވެސް ބައިވެރިވެވޭ މި ދުވުމުގައި ބައިވެރިވާ މީހުންނަށް، 1 އޯގަސްޓް އާއި 7 އޯގަސްޓްއާ ދެމެދުގެ ކޮންމެ ވަގުތެއްގައި ވެސް ދުވުން ފުރިހަމަ ކުރެވޭނެއެވެ.

ރަޖިސްޓްރޭޝަން ފުރިހަމަ ކުރުމުން ޑިޖިޓަލް ބިބް އަދި ކޮންފަރމޭޝަން މެސެޖެއް ލިބޭނެ ކަމަށާއި ދުވުންތެރިން، އެމީހެއްގެ ދުވުން ސްޓްރާވާ އެޕް، ގާމިން ކަނެކްޓް، ރަންޓާސްޓިކް، ނައިކް ރަން ކްލަބް ނުވަތަ ރަންކީޕަރ އެޕްލިކޭޝަން މެދުވެރިކޮށް ޓްރެކްކޮށް، ނިންމާފައިވާ ދުވުމުގެ މަގުތަކުގެ ސްކްރީންޝޮޓް، ކޮންފަރމޭޝަން މެސެޖާއެކު ލިބުނު ލިންކަށް އަޕްލޯޑްކުރުމުން ޑިޖިޓަލް މެޑެއްޔެއް ލިބޭނެއެވެ. ފިސިކަލް މެޑެލް ބޭނުންވާ ފަރާތްތަކަށް ކުޑަ އަގަކާއެކު މޫލީ މެދުވެރިކޮށް އަޕްގްރޭޑްކޮށްލުމުން ރާއްޖޭގެ ކޮންމެ ހިސާބެއްގައި ހުރިނަމަވެސް ހިލޭ ފޮނުވައި ދޭނެއެވެ.