ރާއްޖެ އިޝްތިހާރުކުރުމަށް "އިންސައިޑްފްލަޔަރ މެގަޒިން"އާއެކު ޚާއްސަ ގްލޯބަލް ކެމްޕެއިނެއް

ރާއްޖެ އިޝްތިހާރު ކުރުމަށް އިންސައިޑްފްލަޔަރ މެގަޒިނާއިއެކު މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)އިން ގްލޯބަލް މާކެޓިން ކެމްޕެއިނެއް ފަށައިފިއެވެ.

އެމްއެމްޕީއާރުސީން މައުލޫމާތުދޭގޮތުގައި އިންސައިޑްފްލަޔަރ މެގަޒިނާއިއެކު ފެށި މި ކެމްޕައިނަކީ ހަފްތާއެއްގެ މުއްދަތަަށް ކުރިއަށް ގެންދަން ރާވާފައިވާ ކެމްޕެއިނެކެވެ. މިކެމްޕެއިންގެ ދަށުން، ރާއްޖެއަކީ ރައްކާތެރި މަންޒިލެއްގެ ގޮތުގައި އިޝްތިހާރުކުުރުމުގެ މަސައްކަތްކުރާނެ ކަމަށް އެމްއެމްޕީއާރުސީން ބުނެއެވެ. އެގޮތުން ރާއްޖެ އުފެދިފައިވާ ގޮތުންނާއި، އެކުލަވާލެފައިވާއި އުސޫލުތަކާއިއެކު ރާއްޖެ އަކީ މިވަގުތު ދުނިޔޭގެ އެންމެ ރައްކާތެރި އެއް މަންޒިލުގެ ގޮތުގައި ސިފަކުރެވިގެންދާނެ ކަމަށް އެމްއެމްޕީއާރުސީން ބުނެއެވެ.

އޭގެ އިތުރުން ރާއްޖޭގެ ވަކިވަކި ރަށްރަށުގައި ތަަރައްގީކުރެވިފައިވާ ރިސޯޓްތަކާއި، ފަތުރުވެރިންނަށް ޚާއްސަކޮށް ރާއްޖޭން ލިބެން ހުންނަ ޚިދުމަތްތައް އިޝްތިހާރުކުރެވިގެން ދާނެކަމަށް އެމްއެމްޕީއާރުސީން ބުނެއެވެ.

އެމްއެމްޕީއާރުސީން ބުނީ މި ކެމްޕެއިން ކުރިއަށް ގެންދާނީ "ރިޓަރން ޓު މޯލްޑިވްސް"ގެ ނަމުގައި ކަމަށެވެ. އަދި 7 ދުވަހަށް މިކެމްޕެއިން ކުރިއަށް ގެންދާއިރު، ކޮންމެ ދުވަހަކުވެސް ރާއްޖޭގެ ޓޫރިސްޓު ފެސިލިޓީއެއް އިޝްތިހާރުކުރެވިގެން ދާނެކަމަށެވެ. އެއީ ފުުށިފަރު މޯލްޑިވްސް، ޕުލްމަން މޯލްޑިވްސް މާމުޓާ، ސަން ސިޔާމް އިރު ވެލި، ޖޯލި މޯލްޑިވްސް މުރަވަންދޫ، ހާރޑް ރޮކް ހޮޓެލް މޯލްޑިވްސް، ރެޑިސަން ބްލޫ އަދި ކޮންރެޑް މޯލްޑިވްސް އެވެ.

އިންސައިޑްފަލަޔަރގެ ވެބްސައިޓް އަދި ސޯޝަލް މީޑިއާގެ ރިޓަރން ޓު މޯލްޑިވްސް ކެމްޕެއިން ކުރިއަށްގެންދާނެއެވެ. އަދި ނިއުސްލެޓާރސްވެސް ނެރޭނެ ކަމަށް އެމްއެމްޕީއާރުސީން ބުނެއެވެ.

އިންސައިޑްފްލަޔަރއާ ގުޅިގެން އެމްއެމްޕީއާރުސީން ކުރިއަށް ގެންދާ މިކެމްޕެއިނުން ޖަރުމަނު، ސްވިޒަލެންޑް، އޮސްޓްރިއާ، ޔޫކޭ އަދި ބެނަލުކްސްގެ ގައުމުތަކާއި، ސްކެންޑިނޭވިއަން ގައުމުތަކުގެ އިތުރުން ނޯތު އެމެރިކާގެ ގައުމުތަކުގައި ރާއްޖެ އިޝްތިހާރުވެގެންދާނެއެވެ. އެގޮތުން މިކެމްޕެއިންގެ ދަށުން 1.3 މިލިއަން މީހުންނަށް ރާއްޖެ އިޝްތިހާރުކުރެވިގެންދާނެ ކަމަށް އެމްއެމްޕީއާރުސީން ފާހަގަކުރެއެވެ.

މިކެމްޕެއިންގެ ދަށުން ރާއްޖެ އިޝްތިހާރުވެގެން މިދަނީ މިހާރު ރާއްޖެއަށް އެންމެ ގިނަ އަދަދެއްގެ ފަތުރުވެރިން އަންނަ މާކެޓުތަކުގައެވެ.