އިރާގުގެ ހޮސްޕިޓަލެއްގައި ރޯވެ 52 މީހުން މަރު
13 ޖުލައި 2021 | އަންގާރަ 06:22ކައިރި ކައިރީގައި ހިނގި މިފަދަ ދެވަނަ ހާދިސާއާއެކު ހެލްތް މިނިސްޓރ ހަސަން އަލް-ތަމީމީވެސް ވަނީ އިސްތިއުފާ ދީފައި
އަލް-ހުސެއިން ހޮސްޕިޓަލުގައި ހިނގި އަލިފާނުގެ ހާދިސާ
އިރާގުގައި ކޮވިޑަށް ފަރުވާދެމުންދިޔަ ހޮސްޕިޓަލެއްގައި ރޯވެ 52 މީހުން މަރުވެއްޖެއެވެ.
އަލިފާނުގެ ހާދިސާ ހިނގާފައިވަނީ، އިރާގުގެ ނަސްރިއްޔާ ސިޓީގައި ހުންނަ އަލް-ހުސައިން ހޮސްޕިޓަލުގައެވެ. ހޯމަ ދުވަހުގެ ރޭ ހިނގި މި ހާދިސާއަކީ އެ ހޮސްޕިޓަލުގެ ކޮވިޑް އައިސޮލޭޝަން ވާރޑްގައި މިދިޔަ ތިން މަހުގެ ތެރޭގައި ހިނގި މިފަދަ ދެވަނަ އަލިފާނުގެ ހާދިސާއެވެ. ސިއްޙީ ޚިދުމަތްތެރިއަކާ ހަވާލާދީ، އޭފްޕީގައި ރިޕޯޓުކޮށްފައިވާ ގޮތުގައި، އަލިފާނުގެ ހާދިސާ ހިނގަން މެދުވެރިވީ، އޮކްސިޖަން ފުޅިއެއް ގޮވައިގެންނެވެ.
ހެލްތް އޮތޯރިޓީގެ ތަރުޖަމާނު ހައިދަރ އަލް-ޒަމީލީ ބުނެފައިވަނީ، އަލިފާނުގެ ހާދިސާގައި 52 މީހުން މަރުވެފައިވާއިރު، 22 މީހުން ފިހިގެން އަނިޔާވެފައިވާ ކަމަށެވެ. މީހުން ހޯދުމުގެ މަސައްކަތް އަދިވެސް ހުއްޓުމެއް ނެތި ކުރިއަށްދާ ކަަމަށާއި، އަލިފާންގަނޑު ކޮންޓްރޯލް ކުރެވިފައިވާ ކަމަަށް ޒަމީލީ ބުނެފައިވެއެވެ.
އަލިފާން ރޯވި ކޮވިޑް އައިސޮލޭޝަން ވާރޑްގައި 70 އެނދު ހުރެއެވެ.
ނަސްރިޔާ ހޮސްޕިޓަލުގެ އޮފިޝަލަކު ބުނެފައިވަނީ، ބޯ ދުމުގެ ސަބަބުން މީހުން ހޯދުމުގެ މަސައްކަތަށް ދަތިވާ ކަމުގައެވެ. އެ ހޮސްޕިޓަލުގެ މެނޭޖަރު ވަނީ މި ހާދިސާ ހިނގުމާއެކު މަގާމުން އިސްތިއުފާ ދީފައި ކަމަށް އަލްޖަޒީރާގައި ރިޕޯޓުކޮށްފައިވެއެވެ.
މި ހާދިސާ ހިނގުމާއެކު އެ ސިޓީގެ ގިނަ އަދަދެއްގެ އާއްމުން ވަނީ ހޮސްޕިޓަލު ހުންނަ މަގަށް ޖަމާވެފައެވެ. އެމީހުން ބުނަމުންދަނީ، ކޮރަޕްޓް އޮފިޝަލުން މިކަމުގައި ޖަވާބުދާރީ ކުރުވަން ޖެހޭނެ ކަމަށެވެ. މިއީ ކުށެއްނެތް ބަޔަކު ގަސްދުގައި މަރާލުން ކަމަށެވެ.
އިރާގުގެ ބޮޑުވަޒީރު މުސްތަފާ އަލް-ކަދީމީ ވަނީ އިރާގުގެ ދެކުނުގައި ކުއްލި ހާލަތު އިއުލާން ކޮށްފައެވެ. މިފަދަ ހާދިސާތައް ހިނގުމަށް މެދުވެރިވާ ސަބަބާއި، ކުއްލިއަކަށް ދިމާވާ މިފަދަ ހާދިސާތަކުން ނުކުމެދާނެ ނަތީޖާއާއި، ގެއްލުމާއި، އެ ގެއްލުމުން އަރައިގަންނާނެ ގޮތާ ބެހޭ ގޮތުން މަޝްވަރާ ކުރުމަށް ކުއްލި ބައްދަލުވުމެއް ބޮޑުވަޒީރުގެ އޮފީހުގައި ބާއްވަމުން އަންނަ ކަމަށް ބޮޑުވަޒީރު، ކަދީމީ ކުރި ޓްވީޓެއްގައި ބުނެފައިވެއެވެ.
މިދިޔަ އެޕްރީލް މަހުގެ ތެރޭގައި ވެސް އޮކްސިޖަން ފުޅިތަކެއް ގޮވައިގެން ހިނގި ހާދިސާގައި 82 މީހުން މަރުވެ 110 މީހަކަށް އަނިޔާވިއެވެ. ހާދިސާގައި އަނިޔާވި މީހުންނާއި، މަރުވި މީހުންނަނީ، ކޮވިޑްގެ ސަބަބުން ނޭވާލާން އުނދަގޫވެ، އޮކްސިޖަން ގުޅައިގެން ފަރުވާ ދެމުން ދިޔަ މީހުންނެވެ.
ކައިރި ކައިރީގައި ހިނގި މިފަދަ ދެވަނަ ހާދިސާއާއެކު ހެލްތް މިނިސްޓރ ހަސަން އަލް-ތަމީމީ ވެސް ވަނީ އިސްތިއުފާ ދީފައެވެ.
އިރާގުގައި މިހާތަނަށް 1.4 މިލިއަން މީހުންނަށް ކޮވިޑް ޖެހިގެންވަނީ ރިޕޯޓުކޮށްފައެވެ. އަދި މި ބަލީގައި އެ ގައުމުން 17،000 މީހުންވަނީ މަރުވެފައެވެ.
