ވެކްސިން ނުޖަހާ ހުރި، ބެލްޖިއަމްގެ އަންހެނަކަށް އެއް ފަހަރާ ކޮވިޑްގެ ދެ ވޭރިއަންޓް ޖެހިޖެއްޖެ

ކޮވިޑް-19 ޖެހިގެން މަރޗް މަހު މަރުވެފައިވާ ބެލްޖިއަމްގެ އުމުރުން 90 އަހަރުގެ އަންހެނަކަށް ކޮވިޑްގެ ދެ ވޭރިއަންޓެއް އެއް ފަހަރާ ޖެހިފައިވާކަމަށް ޔޫރަޕިއަން ކޮންގްރެސް އޮން ކްލިނިކަލް މައިކްރޯބައިލޮޖީ އިންފެކްޝިއަސް ޑިޒީސްގައި ހާމަކޮށްފިއެވެ.

މިއީ މިހާތަނަށް ފާހަގަވެފައިވާ މިފަދަ ފުރަތަމަ ކޭހެވެ. މިކޮންގްރެސްގައި މިކޭހާ ގުޅޭގޮތުން މަޝްވަރާކޮށްފައިވާއިރު މީގެން އަންގައިދެނީ އެއް ފަހަރާ ދެ ވޭރިއަންޓް ޖެހުމުގެ ފުރުސަތު އޮތުންކަމަށް ކޮންގްރެސް އިންތިޒާމުކުރާ ފަރާތުން ނެރެފައިވާ ބަޔާނެއްގައި ވަނީ ބުނެފައެވެ.

މި މީހާއަށް ޖެހިފައިވަނީ އިނގިރޭސިވިލާތުން ފެނިފައިވާ އަލްފާ ވޭރިއަންޓާއި ދެކުނު އެފްރިކާއިން ފެނިފައިވާ ބީޓާ ވޭރިއަންޓެވެ. ޑޮކްޓަރުން ބުނާގޮތުގައި އަންހެން މީހާއަށް ކޮވިޑް ޖެހިފައިވަނީ ދެ މީހެއްގެ ފުށުންނެވެ.

ޖުލައި މަހުގެ 9ން 12ށް ކުރިޔަށްދާ މި ކޮންގްރެސްގައި މިކޭހާ ގުޅޭގޮތުން ކަމާބެހޭ ފަރާތްތަކުން މަޝްވަރާކޮށްފައިވާއިރު މިއީ ވަރަށް މަދުން ނޫނީ ނުވާކަމެއްކަމަށް ޑޮކްޓަރުން ވަނީ ބުނެފައެވެ. ނަމަވެސް ކޮންމެވެސް ވަރަކަށް މިގޮތަށް ދެ ވޭރިއަންޓް ޖެހިފައި ހުންނަ މީހުން ފެންނަމުންދާ ކަމަށް ވަނީ ބުނެފައެވެ.

މި މީހާއަށް ފަރުވާދިން ހޮސްޕިޓަލުން ބުނެފައިވާ ގޮތުގައި މި މީހާ ވެކްސިން ޖަހާފައެއް ނުވެއެވެ. ޔޫރަޕިއަން ޔޫނިއަންގެ އެހެން ގައުމުތަކޭ އެއްގޮތަށް ބެލްޖިއަމްއަށް ވެސް 2021 ވަނަ އަހަރު ފެށުނުއިރު ވަނީ ވެކްސިން ލިބުމުގެ ދަތިތަކާ ކުރިމަތިވެފައެވެ. އަދި އެގައުމުގައި ވެކްސިން ޖެހުމުގެ ކަންކަން ކުރިޔަށް ގެންގޮސްފައިވަނީ މަޑުމަޑުންނެވެ. މިހާރު އީޔޫއިން ވަނީ ބެލްޖިއަމްގެ އާބާދީގެ 70 އިންސައްތައަށް ވާވަރަށް ވެކްސިން ފޯރުކޮށްދީފައެވެ.

މޮލިކިޔުލަރ ބައޮލޮޖިސްޓެއްކަމުގައިވާ އޭން ވަންކީރްބަރގެން ބުނެފައިވަނީ މަރޗް މަސް ތެރޭގައި ބެލްޖިއަމްގައި އަލްފާ އަދި ބީޓާ ވޭރިއަންޓް ވެސް ފެތުރިފައިވާކަމަށެވެ.

އެހެންކަމުން މި އަންހެން މީހާއަށް ދެ ވޭރިއަންޓް ޖެހިފައިވަނީ ތަފާތު ދެ މީހެއްގެ ފުށުންކަމަށް ވުމަކީ އެކަށީގެންވާ ކަމެއްކަމަށާއި މިކަން ހިނގާފައިވާކަން ކުރިން ނޭނގުމަކީ ދެރަކަމެއްކަމަށް އޭން ވަނީ ބުނެފައެވެ.

ޔޫރަޕިއަން ކޮމިޝަންގެ އެގްޒެކެޓިވް އިން ވަނީ މި އަހަރުގެ ހޫނު މަސް ތެރޭގައި ޔޫރަޕްގައި ބޮޑަށް ފެތުރޭނީ މިހާރު އެންމެ ހަލުވި މިނުގައި ފެތުރެމުން އަންނަ ޑެލްޓާ ވޭރިއަންޓް ކަމަށް ބުނެފައެވެ.