ތައިލެންޑްގެ އެތައް ސަތޭކަ ސިއްހީ މަސައްކަތްތެރިންނަށް ބޫސްޓަރ ޑޯޒެއް ޖަހަނީ

ތައިލެންޑްގެ ސިއްހީ މަސައްކަތްތެރިންގެ ތެރެއިން ޗައިނާގެ ސިނޯވެކް ވެކްސިންގެ ދެ ޑޯޒް ފުރިހަމަކޮށްފައިވާ 600ށް ވުރެެ ގިނަ މީހުންނަށް ކޮވިޑް ޖެހިފައިވާތީ ސިއްހީ މަސައްކަތެރިންނަށް ބޫސްޓަރ ޝޮޓެއް ދިނުމަށް އެގައުމުގެ މާހިރުންގެ ޓީމަކުން ލަފާދީފިއެވެ.

ސިނޯވެކް ވެކްސިންގެ ދެ ޑޯޒް ޖެހި 677،348 ސިއްހީ މަސައްކަތެރިންގެ ތެރެއިން 618 މީހުން އޭޕްރީލް މަހުން ފެށިގެން ޖުލައި މަހާ ހަމައަށް އައިއިރު ކޮވިޑަށް ޕޮޒިޓިވްވެފައިވާކަމަށް ހެލްތު މިނިސްޓްރީން ހާމަކޮށްފައިވާ ތަފާސްހިސާބުތަކުން ދައްކައެވެ. މީގެއިތުރުން ނަރުހަކު ވަނީ ކޮވިޑް ޖެހިގެން މަރުވެފައެވެ. އަދި އެހެން ސިއްހީ މަސައްކަތްތެރިއެއްގެ ހާލު ވަނީ ސީރިއަސްވެފައެވެ.

ސިއްހީ މަސައްކަތްތެރިންގެ މެދުގައި ކޮވިޑާ ދެކޮޅަށް އިމިޔުނިޓީ ވަރުގަދަކުރުމުގެ ގޮތުން ތިން ވަނަ ޑޯޒެއް ޖެހުމަށް ލަފާދީފައިވާކަމަށް އެގައުމުގެ ސީނިއަރ ހެލްތު އޮފިޝަލުން ހިމެނޭ ގްރޫޕަކުން ބުންޏެވެ.

ބޫސްޓަރ ޑޯޒް ވާނީ އެސްޓްރަޒެނިކާ ވެކްސިން ނުވަތަ އެމްއާރުއެންއޭ ބޭނުންކޮށްގެން އުފައްދާފައިވާ އެހެން ވެކްސިނެއްގެ ޑޯޒަކަށްކަމަށް ޕެނަލުން ވަނީ ބުނެފައެވެ. އަދި އިތުރު ވެކްސިންތައް ތައިލެންޑަށް ވަރަށް އަވަހަށް ލިބޭނެކަމަށް ވަނީ ބެލެވިފައެވެ.

އާދިއްތަ ދުވަހު ތައިލެންޑުން ރިޕޯޓްކޮށްފައިވާ ގޮތުން 24 ގަޑިއިރު ތެރޭގައި 9،418 މީހުންނަށް ވަނީ ކޮވިޑް ޖެހިފައެވެ. އަދި 91 މީހުން ވަނީ މިބަލީގައި މަރުވެފައެވެ.

ތައިލެންޑްގެ ފްރޮންޓް ލައިންގައި މަސައްކަތްކުރާ ގިނަ މީހުންނަށް ފެބްރުއަރީ މަހުން ފެށިގެން ދީފައިވަނީ ސިނޯވެކް ވެކްސިނެވެ. ތައިލެންޑަށް އެސްޓްރަޒެނިކާ ވެކްސިން ލިބޭނެކަމަށް ކުރިން ބެލެވިފައިވަނީ ޖޫން މަހުއެވެ. މީގެއިތުރުން 1.5 މިލިއަން ފައިޒަރ ވެކްސިންގެ ޑޯޒް ވެސް އެގައުމަށް ލިބޭނެކަމަށް ވަނީ ބެލެވިފައެވެ. އެއީ އެމެރިކާއިން އެގައުމަށް ފޯރުކޮށްދޭ ވެކްސިނެވެ. މީގެއިތުރުން 20 މިލިއަން ޑޯޒް ހޯދުމަށް ތައިލެންޑުން ވަނީ އޯޑަރ ކޮށްފައެވެ. އެ ވެކްސިން ލިބޭނެކަމަށް ބެލެވެނީ އޮކްޓޯބަރ މަހުއެވެ.

ތައިލެންޑްގެ އިތުރުން ސިނޯވެކް ވެކްސިން ޖަހަމުން އައި އިންޑޮނޭޝިޔާއިން ވެސް ވަނީ މޮޑާނާ ވެކްސިންގެ ޑޯޒެއް ބޫސްޓަރ ޑޯޒެއްގެ ގޮތުގައި ސިއްހީ މަސައްކަތްތެރިންނަށް ދޭނެކަން ހާމަކޮށްފައެވެ.