މިއަދު ހަވީރު ސަރ ރިޗަރޑް ބްރޭންސަން ޖައްވަށް ދަނީ

ސަރ ރިޗަރޑް ބްރޭންސަން ޖައްވަށް ދިއުމުގެ އެންމެ ފަހު ތައްޔާރީތައް ވާން ފަށައިފިއެވެ.

ރިޕޯޓްތައް ބުނާގޮތުން އިނގިރޭސި ބިލިއަނަރު ސަރ ރިޗަރޑް ބްރޭންސަން މިއަދު ޖައްވަށް ދާނެއެވެ. އޭނާ ޖައްވަށް ދާން ފުރާނެ ކަމަށް ރިޕޯޓްކޮށްފައި ވަނީ ރާއްޖެ ގަޑިން ހަވީރު 04:00 ގައެވެ. އެއީ އެމެރިކާ ގަޑިން ހެނދުނު 07:00 އެވެ.

ސަރ ރިޗަރޑް ޖައްވަށް ދިއުމަށް ހަމަޖެހިފައި ވަނީ ވަރޖިން ގެލެކްޓިކް ފްލައިޓެއްގައެވެ. އަދި ޖައްވަށް ދާން ފުރާނީ ނިއު މެކްސިކޯއިން ކަމަށް ރިޕޯޓްތައް ބުނެއެވެ.

ސަރ ރިޗަރޑްގެ މިދަތުރު ވަނީ ލައިވް ބްރޯޑްކާސްޓް ކުރަން ހަމަޖެހިފައެވެ. މި ދަތުރުގައި ސަރ ރިޗަރޑްއާ އެކު ދެ ޕައިލެޓުންނާއި އިތުރު ތިން ޕަސެންޖަރުން ދަތުރުކުރާނެއެވެ.

ސަރ ރިޗަރޑް ވަނީ ކަސްޓަމަރުންނަށް މިގޮތަށް ދަތުރުތައް ދިއުމަށް ފުރުސަތު ހުޅުވާލުމުގެ ކުރިން އަމިއްލަ އަށް މިކަންތައް ތަޖުރިބާކޮށްލަން ބޭނުންވާ ކަމަށް ވިދާޅުވެފައެވެ. އެގޮތުން މިއީ އެންމެ ކުޑަ އިރުއްސުރެ ވެސް ކުރަން ބޭނުންވި ކަމެއް ކަމަށާއި އުންމީދަކީ ކުރިއަށް އޮތް އަހަރުތަކުގެ ތެރޭގައި އިތުރު އެތައް ބަޔަކަށް މިފުރުސަތު ލިބުން ކަމަށް ސަރ ރިޗަރޑް ވިދާޅުވިއެވެ.