ރަކީދޫ ޑަބްލިއުޑީސީގެ ގޮނޑިތައް އެމްއާރްއެމަށް
އިންތިޚާބު ކުރަންޖެހޭ ދާއިރާތަކުގެ ތެރެއިން އެއްވެސް ކެންޑިޑޭޓަކު ކުރިމަތިނުލާ ހުރި ދާއިރާތަކަށް އަނެއްކާވެސްވަނީ ކުރިމަތިލުމުގެ ފުރުސަތު ހުޅުވާލާފައި
އެޕްރީލް 10ގައި ބޭއްވި އިންތިޚާބުގެ ތެރެއިން
ވ. ރަކީދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރު ކަމަށް ކުރިމަތިލި ތިން މެމްބަރުން ވެސް އިންތިޚާބަކާ ނުލައި ގޮނޑި ކާމިޔާބުކޮށްފިއެވެ.
ފަސް މެމްބަރު ހޮވުމަށް ބާއްވާ އިންތިޚާބަށް ކުރިމަތިލި 3 މެމްބަރުންނަކީ ވެސް މޯލްޑިވްސް ރިފޯމް މޫވްމެންޓް (އެމްއާރްއެމް)ށް ނިސްބަތްވާ މެމްބަރުންނެވެ. މި ކޮމިޓީއަށް އަދި ދެ މެމްބަރުން އިންތިޚާބުކުރަން ޖެހެއެވެ. ރަކީދޫގެ ގޮނޑި ކާމިޔާބުކުރީ، އާރިފާ މުހައްމަދު، މަރްޔަމް އަމީނާ، އަދި އާމިނަތު ރަޝީދާއެވެ.
ހދ. ނޭކުރެންދޫ ކޮމިޓީއަށް އިންތިޚާބުކުރަންޖެހޭ 2 ގޮނޑިއަށް ވަގުތު ހަމަވިއިރު ކުރިމަތިލާފައިވަނީ 1 ކެންޑިޑޭޓެވެ. އެހެންކަމުން އެ ކެންޑިޑޭޓަށް ވެސް ވަނީ އިންތިޚާބަކާ ނުލައި ގޮނޑި ޔަގީންވެފައެވެ. އެއީ، ޕީޕީއެމަށް ނިސްބަތްވާ ފާތިމަތު ފަޒްނާއެވެ.
ލ. މާބައިދޫ ކައުންސިލަށް އެއް މެމްބަރަކު އިންތިޚާބުކުރަންޖެހޭއިރު، ކުރިމަތިލާފައިވަނީ ވެސް އެއް ކެންޑިޑޭޓެވެ. އެހެންކަމުން އެ ގޮނޑިއަށް ކުރިމަތިލާފައިވާ، ޕީޕީއެމްގެ ކެންޑިޑޭޓް އާއިޝަތު އާދަމް ވަނީ ގޮނޑި ކާމިޔާބުކޮށްފައެވެ.
އޮގަސްޓް މަހުގެ 7 ވަނަ ދުވަހު މެމްބަރުން އިންތިޚާބު ކުރަންޖެހޭ ދާއިރާތަކުގެ ތެރެއިން އެއްވެސް ކެންޑިޑޭޓަކު ކުރިމަތިނުލާ ހުރި ދާއިރާތަކަށް އަނެއްކާވެސްވަނީ ކުރިމަތިލުމުގެ ފުރުސަތު ހުޅުވާލާފައެވެ. އެގޮތުން ހދ. ނޭކުރެންދޫއަށް 1 މެމްބަރު، ބ. ފުޅަދޫއަށް 1 މެމްބަރު، ވ. ރަކީދޫއަށް 2 މެމްބަރުން އަދި މ. ރަތްމަންދޫއަށް 5 މެމްބަރުން ހޮވުމަށް މިހާރު ވަނީ ހުޅުވާލާފައެވެ. މި ދާއިރާތަކަށް ކުރިމަތިލުމުގެ ފުރުސަތު އޮންނާނީ، ޖުލައި މަހުގެ 16ގެ ނިޔަލަށެވެ.
އަލަށް އިންތިޚާބުވި ކައުންސިލަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރުން ހުވާކޮށް، މަގާމާ ހަވާލުވެފައިވަނީ 17 މެއި 2021 ގައެވެ.
