ގޮނޑިތައް ގެއްލުނުކަމަށް ކަނޑައެޅި ޤާނޫނީ ހަމައެއް އިލެކްޝަނަކަށް ނުދެއްކުނު:އިބޫ

ޕީޕީއެމުން ކުރިން ވަކިކޮށްފައިވާ 4 މެންބަރެއްގެ ގޮނޑި ގެއްލުނުކަން ކަނޑައެޅި އެއްވެސް ޤާނޫނީ ހަމައެއް އިލްެކްޝަންސް ކޮމިޝަނަށް ދެއްކިފައި ނުވާކަމަށް އެމްޑީޕީ ޕާލަމެންޓްރީ ގުރޫޕުގެ ލީޑަރ އަދި ރައްޔިތުންގެ މަޖިލީހުގެ ހިންނަވަރު ދާއިރާގެ މެންބަރު އިބްރާހީމް މުހައްމަދު ސޯލިޙް (އިބޫ) ވިދާޅުވެއްޖެއެވެ.

އިބޫ މިހެން ވިދާޅުވީ އެމްޑީޕީން ބުދަ ދުވަހުގެ ރޭ ބޭއްވި އެޕާޓީގެ ޤައުމީ މަޖިލީހުގެ ކުއްލި ބައްދަލުވުމުގައި ވާހަކަ ދައްކަވަމުންނެވެ.

އިބޫ ވިދާޅުވީ އިލްެކްޝަންސް ކޮމިޝަންގެ ނިންމުމާ ގުޅިގެން އިބޫގެ އިތުރުން ޖުމްހޫރީ ޕާޓީގެ ނައިބު ލީޑަރ އަދި ކިނބިދޫ ދާއިރާގެ މެންބަރ ޢަބްދުﷲ ރިޔާޒްއާ ދެ ބޭފުޅުން ރައްޔިތުންގެ މަޖިލީހަށާއި އިލެކްޝަންސް ކޮމިޝަންގެ އޮފީހަށް ވަޑައިގެން މައުލޫމާތު ސާފުކުރެއްވި ކަމަށެވެ.

އިބޫ ވިދާޅުވީ މަޖިލީހުގެ އަމީން ޢާއްމާ ބައްދަލުކޮށް ވާހަކަ ދެއްކެވުމުން މަޖިލީހުން އެއްވެސް ކަމެއް ނިންމަވާފައި ނުވާކަމަށް ވިދާޅުވިކަމަށެވެ. ނަމަވެސް އިލެކްޝަނުން ޤާނޫނީ ލަފަޔަކަށް އެދުނުކަމަށާއި މަޖިލީހަކީ އެފަދަ ލަފައެއް ދެއްވޭނެ ތަނެއް ނޫން ކަމަށް އިލެކްޝަނަށް އެންގެވި ކަމަށް މަޖިލީހުގެ އަމީން ޢާއްމު ވިދާޅުވިކަމަށް އިބޫ ވިދާޅުވިއެވެ.

އިބޫ ވިދާޅުވީ މަޖިލީހުން އެގޮތަށް ޖަވާބު ދެއްވި ނަމަވެސް ސުޕްރީމް ކޯޓުގެ އަމުރާ އެއްގޮތައް ކަންކަން ކުރެއްވުން ރަނގަޅުވާނެ ކަމަށް ބުނެ އިލެކްޝަނަށް ސިޓީއެއް ފޮނުއްވާފައިވާކަމަށް އަމީން ޢާއްމު ވިދާޅުވިކަމަށް އިބޫ ވިދާޅުވިއެވެ. އަދި އެއީ މަޖިލީހަށް ފޮނުއްވޭނެ ސިޓީއެއް ނޫން ކަމަށްވެސް އިބޫ ވިދާޅުވިއެވެ.

އިބޫ ވިދާޅުވީ މަޖިލީހަށްފަހު އެބޭފުޅުން ބައްދަލު ކުރެއްވީ އިލެކްޝަންސް ކޮމިޝަންގެ ރައީސް އަހުމަދު ސުލައިމާނާއި އެކޮމިޝަނގެ މެންބަރުންނާ ކަމަށެވެ.

އިބޫ ވިދާޅުވީ އެކޮމިޝަންގެ ރައީސް ދެއްވީ ވަރަށް ފިނި ޖަވާބެއް ކަމަށާއި ހަމައެކަނި އެބޭފުޅުންގެ ޖަވާބަކީ އެކޮމިޝަންގެ 5 މެންބަރުންގެ އިއްތިފާގުން އެކަން ނިންމެވުން ކަމަށެވެ.

އިބޫ ވިދާޅުވީ އެގޮތައް ނިންމެވޭނެ އެއްވެސް ޤާނޫނީ އިޚްތިޞާސެއް އިލެކްޝަނެއް ލިބިގެން ނުވާ ކަމަށާއި އެގޮތައް ނިންމި ޤާނޫނީ ހުއްޖަތަކަީ ކޮބައިތޯ ދެންނެވުމުންވެސް ތަކުރާރުކޮށް ވިދާޅުވީ ހަމައެކަނި އެކޮމިޝަންގެ 5 މެންބަރުންގެ އިއްތިފާގުން އެކަން ނިންމުން ކަމަށެވެ.

"އެބޭފުޅުން ވިދާޅުވީ ޕީޕީއެމުން އެންގިއްޔޭ އެޕާޓީގެ 4 މެންބަރުން ޕާޓީގެ ދަފްތަރުން އުނިކުރަން. އެހެންވެ އަޅުގަނޑުމެންގެ 5 މެންބަރުން އިއްތިފާގުން ނިންމިއްޔޭ" އީސީގެ ރައީސް ވިދާޅުވިކަމަށް އިބޫ ވިދާޅުވިއެވެ.

އިބޫ ވިދާޅުވީ ބައި އިލެކްޝަނަކަށް ހުޅުވާލިކަންވެސް އެކޮމިޝަންގެ ރައީސް ފުރަތަމަ އުޅުއްވީ އެކަމާ ޙަވާލު ނުވާން ކަމަށާއި ނަމަވެސް މީޑިޔާތަކުން އެކަން އެނގެން އޮތްކަން ދެންނެވުމުން ފަހުން އެކަމަށްވެސް އިއުތިރާފްވި ކަމަށް އިބޫ ވިދާޅުވިއެވެ.

"ވިދާޅުވީ ގޮނޑި ގެއްލުނީމަ ދެން ޖެހޭނީ އިންތިޚާބު ބާއްވަން ނޫންތޯއޭ. އެހެންވެޔޭ ބައި އިލެކްޝަން ހުޅުވާލީ. އެކަން ކުރެއްވި ޤާނޫނީ ހުއްޖަތެއް ނުދެއްކުނު" އިބޫ ވިދާޅުވިއެވެ.