އައިޖީއެމްއެޗްގައި ތައް މަކުނު އެޅި ގޮނޑިތައް ބަދަލުކޮށްފި
10 މެއި 2018 | ބުރާސްފަތި 05:44ގޮނޑިތައް ބަދަލުކުރީ މީޑިއާއިން ރިޕޯޓްކުރުމުން
އެ ގޮނޑިތައް ބަދަލުކޮށް އެތަނަށް މިހާރު ވަނީ އާ ގޮނޑި ވައްދާފައި
އައިޖީއެމް ހޮސްޕިޓަލްގެ ކާޑިއެކް ސެންޓަރުގެ ގޮނޑިތަކުގައި ތައް މަކުނު އަޅާފައިވާކަމަށް މީޑިއާއިން ރިޕޯޓްކުރުމާއެކު އެ ގޮނޑިތައް ބަދަލުކޮށްފިއެވެ.
އެ ގޮނޑިތައް ބަދަލުކޮށްފައި މި ވަނީ، އެތަނުގެ ގޮނޑިތަކުގައި ތައް މަކުނު އަޅާފައިވާ ފޮޓޯއާއި ވީޑިއޯ އާއިއެކު އެކަން ރާއްޖެއެމްވީން ގެނެސްދީފައި ވަނިކޮށެވެ.
އެތަނުން ފަރުވާ ހޯދަމުން ދާ ހާޓް ޕޭޝަންޓެއްގެ އާއިލާ އިން ރާއްޖެއެމްވީއަށް މައުލޫމާތު ހިއްސާ ކުރަމުން ބުނީ އެތަނުގެ ގިނަ ގޮނޑިތަކެއްގައި ތައްމަކުނު އަޅާފައިވާ ކަމަށާއި މަކުނު ހަފައިގެން އެތަނުގެ އިސްވެރިންނަށް އެ ޝަކުވާ ހުށައެޅިކަމަށެވެ. މީގެ ކުރިން ވެސް އެ ހޮސްޕިޓަލްގެ ބައެއް ވޯޑްތަކުގައި ބުޅާ ވެސް އަދި މީދާ ވެސް އުޅޭކަމުގެ ޝަކުވާ އާއްމުން ވެފައި ވެއެވެ. އަދި އެފަދަ ފޮޓޯތައް ސޯޝަލް މީޑިއާގައި ދައުރު ވެސް ވިއެވެ.
މިކަމާ ގުޅޭ ގޮތުން އައިޖީއެމް ހޮސްޕިޓަލްގެ މީޑިއާ ޑިޕާޓްމަންޓްގެ ޑިރެކްޓަރު އަހުމަދު މައުސޫމް އޭރު ވިދާޅުވީ، އެފަދަ ކަމެއް ހިނގާފައި ވާނަމަ އެކަން ބަލައި ޕެސްޓްކޮންޓްރޯލް ޓީމުން އެކަން ރަނގަޅުކުރާނެ ކަމަށެެވެ.
ކާޑިއެކް ސެންޓަރުގެ ގޮނޑިތައް ބަދަލުކޮށްފައިވާކަން އެ ހޮސްޕިޓަލްގެ އޮފިޝލަކު ވަނީ ކަށަވަރުކޮށްދީފައެވެ.
އައިޖީއެމް ހޮސްޕިޓަލްގެ ކާޑިއެކް ސެންޓަރު ހިންގަނީ އިންޑިއާގެ މެޑިޓްރިނާ ހޮސްޕޓަލާ ގުޅިގެންނެވެ.
