ބަންގްލަދޭޝްގައި ރޯވި ފެކްޓްރީގެ ވެރިޔާ ހައްޔަރުކޮށްފި

ބަންގްލަދޭޝްގެ ފެކްޓްރީއެއްގައި ރޯވެ 52 މީހުން މަރުވި ހާދިސާއާ ގުޅިގެން، ގަސްދުގައި އެ މީހުން މަރާލިކަމުގެ ތުހުމަތުގައި އެ ފެކްޓްރީގެ ވެރިޔާ ހައްޔަރުކޮށްފިއެވެ.

ފުލުހުން ބުނެފައިވަނީ ހައްޔަރު ކުރި 8 މީހުންގެ ތެރޭގައި ކާބޯތަކެތި އުފައްދާ އެ ފެކްޓްރީގެ ވެރިޔާގެ އިތުރުން އޭނާގެ ހަތަރު ދަރިން ވެސް ހިމެނޭ ކަމަށެވެ.

ރޯވި ހާޝިމް ފުޑް އެންޑް ބެވެރޭޖް ފެކްޓްރީ ހުންނަނީ ޑާކާގެ ބޭރުން އޮންނަ ރުޕްގާންޖް ސިނާއީ އަވަށުގައެވެ. މަރުވެފައިވާ 48 މީހެއްގެ ހަށިގަނޑު ފެނުނީ އެ ފެކްޓްރީ ތެރެއިންނެވެ. އަދި ސަލާމަތްވުމަށް ފުންމާތި 3 މީހަކު ވެސް ވަނީ މަރުވެފައެވެ.

މީހުން ސަލާމަތްކުރުމުގެ މަސައްކަތް މިހާރުވަނީ ހުއްޓާލާފައެވެ. އެތަނުގައި މަސައްކަތްކުރާ މީހުންގެ އާއިލާތަކާ ހަވާލާދީ އަލްޖަޒީރާއިން ރިޕޯޓުކޮށްފައިވާ ގޮތުން އަދިވެސް ބައެއް މީހުންގެ ހަށިތައް ނުފެނެއެވެ. ބުރާސްފަތި ދުވަހު ފެކްޓްރީގައި ރޯވި އަލިފާންގަނޑު އެއް ދުވަސް ވަންދެން އަނދައަނދާ ހުއްޓެވެ.

އެ ފެކްޓަރީގައި އަލިފާން ރޯވި މައްސަލައިގެ ތަހުގީގު މިހާރު ވަނީ ފަށާފައެވެ. ނަރާޔަންގަންޖް ޑިސްޓްރިކްޓުގެ ފުލުހުންގެ ވެރިޔާ ޖައިދުލް އާލަމާ ހަވާލާދީ އަލްޖަޒީރާގައި ރިޕޯޓު ކޮށްފައިވާގޮތުން އަލިފާން ރޯވި ވަގުތު ފެކްޓްރީއަށް ވަންނަ ދޮރު ހުރީ ތަޅުއަޅުވައި ބަންދުކޮށްފައެވެ. އަދި އެތަނުގައި އަލިފާނުން ރައްކާތެރިވުމުގެ ގޮތުން އަޅަންޖެހޭ ފިޔަވަޅުތަކާއި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް ނާޅާ ހުރިކަން ފުލުހުން ވަނީ ފާހަގަކޮށްފައެވެ. އެއީ ގަސްތުގައި ގިނަ ބަޔަކު މަރާލުން، ކަމުގައި ފުލުހުން ވަނީ ބުނެފައެވެ.

އަލިފާން ރޯވި މައްސަލައިގެ ތަހުގީގު ކުރިއަށްދާއިރު އެތަނުގައި ކުޑަކުދިން ލައްވާ މަސައްކަތް ކުރުވި މައްސަލައެއްގެ ތަހުގީގު ވެސް ވަކިވަކިން ކުރިއަށްގެންދާކަމަށް ފުލުހުންވަނީ ހާމަކޮށްފައެވެ. ސްޓޭޓްގެ ލޭބާރ މިނިސްޓަރު މޮންނުޖާން ސުފިއާން ވެސް ބުނެފައިވަނީ ފެކްޓްރީގައި ކުޑަކުދިން ލައްވާ މަސައްކަތް ކުރުވި މައްސަލައިގެ ތަހުގީގު ފަށައިގެން ކުރިއަށްދާ ކަމަށެވެ.

ފެކްޓްރީގައި އުމުރުން 11 އަހަރުގެ ކުޑަކުދިން ވެސް މަސައްކަތް ކުރަމުން ދިޔަކަން ފުލުހުންގެ ތަހުގީގުން މިހާތަނަށް ވަނީ ހާމަވެފައެވެ.