ފުރަތަމަ ޑޯޒާއި ދެވަނަ ޑޯޒް ޖެހި މީހުންގެ ފަރަގު ލައްކައަކަށްވުރެ ކުޑަވެއްޖެ
ވެކްސިންގެ ދެވަނަ ޑޯޒް ޖެހި މީހުންގެ އަދަދު ވަނީ 219،661ށް އަރާފައި
ވެކްސިން ޖެހުމުގެ ގައުމީ ކެމްޕޭންގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދިނުމުގެ މަސައްކަތް ކުރިއަށް ދަނީ
ރާއްޖޭގައި ކޮވިޑް-19 ވެކްސިނޭޝަން ޕްރޮގްރާމް ފެބްރުއަރީ މަހުގެ 1 ވަނަ ދުވަހު ފަށާފައިވާއިރު ވެކްސިންގެ ފުރަތަމަ ޑޯޒް ޖެހި މީހުންނާއި ދެވަނަ ޑޯޒް ޖެހި މީހުންގެ ފަރަގު ލައްކައަކަށްވުރެ ކުޑަވެއްޖެއެވެ.
އެންމެފަހުން ހެލްތު ޕްރޮޓެކްޝަން އެޖެންސީ (އެޗްޕީއޭ)ން ހާމަކޮށްފައިވާ ތަފާސްހިސާބުތަކަށް ބަލާލާއިރު ބުރާސްފަތި ދުވަހު ވެކްސިންގެ ދެވަނަ ޑޯޒް 6609 މީހުން ވަނީ ޖަހާފައެވެ. އެއާއެކު ރާއްޖޭގައި ވެކްސިންގެ ދެވަނަ ޑޯޒް ޖެހި މީހުންގެ އަދަދު ވަނީ 219،661ށް އަރާފައެވެ.
ބުރާސްފަތި ދުވަހު ވެކްސިންގެ ފުރަތަމަ ޑޯޒް ޖަހާފައިވަނީ 273 މީހުންނެވެ. އެއާއެކު ރާއްޖޭގައި ވެކްސިންގެ ފުރަތަމަ ޑޯޒް ޖެހި މީހުންގެ އަދަދު ވަނީ 318،142ށް އަރާފައެވެ. އެހެންކަމުން މިހާރު ވެކްސިންގެ ފުރަތަމަ ޑޯޒް ޖެހި މީހުންނާއި ދެވަނަ ޑޯޒް ޖެހި މީހުންގެ ދެމެދުގައި ވާ ފަރަގަކީ 98،481 އެވެ.
ބުރާސްފަތި ދުވަހު ފުރަތަމަ ޑޯޒް ޖެހި 273 މީހުންގެ ތެރެއިން 186 މީހުންނަކީ މާލެ ސަރަހައްދުން ވެކްސިން ޖެހި މީހުންނެވެ. އަތޮޅުތެރެއިން ބުރާސްފަތި ދުވަހު ފުރަތަމަ ޑޯޒް ޖަހާފައިވަނީ 87 މީހުންނެވެ. ދެ ވަނަ ޑޯޒް ޖެހި މީހުންގެ 6609 މީހުންގެ ތެރެއިން 4544 މީހުން ވެކްސިން ޖަހާފައިވަނީ މާލެ ސަރަހައްދުންނެވެ. އަދި 2065 މީހުންނަކީ އަތޮޅު ތެރެއިން ވެކްސިން ޖެހި މީހުންނެވެ.
ރާއްޖޭގައި މިހާރު ޖަހަމުން އަންނަނީ ކޮވިޝީލްޑް ވެކްސިނާއި ސިނޯފަރމް ވެކްސިން އަދި ފައިޒަރ ވެކްސިނެވެ. މީގެތެރެއިން ކޮވިޝީލްޑް ވެކްސިންގެ ދެވަނަ ޑޯޒް މާލެ ސަރަހައްދުގައި މެއި މަހުގެ 2 ވަނަ ދުވަހު ޖެހުން މެދުކަނޑާލުމަށްފަހު އޭގެ ދެ މަސްދުވަސް ފަހުން ޖުލައި މަހުގެ 4 ވަނަ ދުވަހުން ފެށިގެން އަންނަނީ އެޕޮއިންޓްމަންޓް އުސޫލުން ދެ ވަނަ ޑޯޒް ޖަހަމުންނެވެ.
ސިނޮފަރމްގެ ފުރަތަމަ ޑޯޒާއި ދެވަނަ ޑޯޒް ޖެހުމުގެ ކަންކަން ކުރިޔަށްދަނީ ސެނަހިޔާ އަދި ޓްރީޓޮޕް ހޮސްޕިޓަލުން ހެނދުނު 9:00ން 11:00ށް ވެކްސިން އަށެވެ. މީގެ އިތުރުން ވެކްސިންގެ ދެވަނަ ޑޯޒް ޖެހުމަށް އެޕޮއިންޓްމެންޓަށް ހުޅުވާލާފައިވާއިރު ފެބްރުއަރީ މަހާއި މާޗް މަހު، މާލެ ސަރަހައްދުގައި ކޮވިޝީލްޑް ވެކްސިންގެ ފުރަތަމަ ޑޯޒް ޖަހާފައިވާ ފަރާތްތަކުން އެޕޮއިންޓްމަންޓަށް ހެދުމަށް ވަނީ އެދިފައެވެ.
ވެކްސިން ލިބުމުގައި ދިމާވި ދަތިތަކަށްފަހު ވެކްސިން ލިބުމުން ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވެފައިވަނީ މިހާރު ވެކްސިން ޖެހުމުގައި ދަތިކަމެއް ކުރިމަތިނުވެ މެދުކެނޑުމެއް ނެތި ކުރިއަށްދާނެކަމަށެވެ.
