ހީވެސް ނުވޭ.......

މީގެ ދެރޭ ކުރިން އަޑުއިވުނު ވާހަކައަކާއެކު ގިނަ ބައެއްގެ ހިތުގައި ސުވާލުތަކެއް އުފެދިގެން ދިޔައެވެ. އަޑު އިވުނީ ރަނގަޅަށްތޯ އަމިއްލަ ނަފްސާ ދެތިން ފަހަރު ސުވާލުކުރި މީހުން މަދެއް ނޫނެވެ. ކައިރީގައި ޖެހިގެންއިން މީހާ ގާތުވެސް ތިމަންނާއަށް އަޑުއިވުނީ ހަމަ ރަނގަޅަށްތޯ އެތައް ބަޔަކު ސުވާލުކުރިއެވެ. އަޑު އިވުނީ ރަނގަޅަށް ކަމަށް ގަބޫލުކުރަން އެމީހުން ބޭނުމެއްވެސް ނޫނެވެ.

ވާނީސްވާ އެހެންތާއެވެ. މީގެ ދެރޭ ކުރިން ރައްޔިތުންގެ މަޖިލީހުގެ ރައީސް އަދި މޯލްޑިވިއަން ޑިމޮކްރަޓިކް ޕާޓީގެ ރައީސް، ރައީސް މުހައްމަދު ނަޝީދު ކުރިއަށް ގެންދެވި އާސްކް ސްޕީކަރ ޕްރޮގްރާމްގައި ވާހަކަދައްކަވަމުން އެމަނިކުފާނު ވަނީ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރުމުގައި މާބޮޑު ހުރަހެއް އޮތްކަމަށް ގަބޫލު ނުކުރައްވާކަން ފާހަގަކުރައްވާ ކުރީގެ ރައީސް އަބްދުﷲ ޔާމީން އެކަމުގައި އެކުގައި މަސައްކަތް ކުރައްވާނެކަމަށް ވިދާޅުވެފައެވެ. ވެރިކަމުގެ ނިޒާމު ބަދަލުކުރުމަށް ގާނޫނު އަސާސީއަށް ބަދަލު ގެނައުމުގެ މަސައްކަތް ކުރަންޖެހޭއިރު އެމަސައްކަތް ކުރައްވާނެ ކަމަށާއި އެބަދަލު ގެނައުމަށް ޕީޕީއެމުން އެމްޑީޕީ އާއިއެކު މަސައްކަތް ކުރާނެކަމަށް ވިދާޅުވިއެވެ.

މިކަން ގަބޫލުކުރަން އެމްޑީޕީގެ ސަޕޯޓަރުންނަށް، ވަކިން ޚާއްސަކޮށް ރައީސް ނަޝީދުގެ ސަޕޯޓަރުންނަކަށް ފަސޭހައެއް ނުވިއެވެ. ރައީސް ޔާމީނު ތާއީދުކުރައްވާ ވެރިކަމުގެ ނިޒާމު އެނގޭކަމަށް ދޭހަވާ މޭރުމަކުން ރައީސް ނަޝީދު ވާހަކަދެއްކެވުމުން އެކާމަ ހިތްހަމަނުޖެހިގެން ޕީއެންސީގެ ރައީސް އަބްދުއްރަހީމް އަބްދުﷲ ޓުވީޓެއް ކުރެއްވުމުން އޭގެ ޖަވާބުގައި އެމްޑީޕީގެ ސަޕޯޓަރުން ވަނީ ތިޔަ އުޅުއްވަނީ އޮޅިގެންނޭ، ރައީސް ނަޝީދު ވައްކަމުގެ ހުކުމެއް ތަންފީޒު ކުރަމުން ގެންދާ މީހަކާއެކު މަސައްކަތް ކުރެއްވުމުގެ ޚިޔާލެއްވެސް ނުގެންގުޅުންވާނެ ކަމަށް ބުނެފައެވެ.

ފެށުނީއްސުރެ އެމްޑީޕީ އަދި ޚާއްސަކޮށް ރައީސް ނަޝީދަކީ ވައްކަމާއި ކޮރަޕްޝަނާ ދެކޮޅު ބޭފުޅެކެވެ. އެކަންކަމާ އެހާ ދެކޮޅު ބޭފުޅަކު ސިޔާސީ މަންފާއެއް ހާސިލުކުރުމުގެ ބޭނުމުގައި ރާއްޖޭގެ ހިނގި އެންމެ ބޮޑު ވައްކަމާއި ކޮރަޕްޝަނުގެ މައްސަލައިގެ އެންމެ އިސް ސަފުގައި ހުރި ކަމަށް ތުހުމަތު ކުރެވި، ކުށް ސާބިތުވެ ޖަލު ހުކުމެއް ތަންފީޒު ކުރަމުންދާ މީހަކާއެކު އެމަނިކުފާނު މަސައްކަތް ނުކުރައްވާނެ ކަމަށް އެމަނިކުފާނުގެ ސަޕޯޓަރުން ގަބޫލުކުރެއެވެ.

އެމްއެމްޕީއާރުސީގެ ބޮޑު ޚިޔާނާތުގެ މަސައްލަތައް ނުނިމި، އެކަމުގައި ޝާމިލުވާ މީހުންނަށް އަދަބު ދިނުން ލަސްވަމުން ދާތީ އެކަމާ އެންމެ ހަރުއަޑުން ހިތްހަމަނުޖެހުން ފާޅުކުރައްވަމުން ގެންދަވާ ބޭފުޅަކީ ރައީސް ނަޝީދެވެ. މިމައްސަލަ މިގޮތަށް ދެމިގެން ދިއުމަކީ އެމްޑީޕީގެ މެމްބަރުން އަދި ވަކިން ޚާއްސަކޮށް ރައީސް ނަޝީދުގެ ފާޑުކިޔުން ސަރުކާރަށާއި އެސެޓް ރިކަވަރީ ކޮމިޝަނަށް އަމާޒުވުގެންދާ ސަބަބުކަމަށް ރައްޔިތުން ގަބޫލުކުރެއެވެ.

ބޮޑު ޚިޔާނާތެއްގެ ތުހުމަތު އެތައް ބަޔަކަށް ކުރެވި އެކަންތައް ނުބެލި އަދަބު ނުދެވި ލަސްވެގެންދާ ދިއުމަށް އެހާ ހިތްޕުޅާނުވެ ހުންނެވިއިރު، އެކަމާ ގުޅިގެން މައްސަލަބެލި، ތުހުމަތުތައް ސާބިތުކުރެވި ހުކުމް ތަންފީޒުކުރަމުންދާ މީހަކާއެކު ރައީސް ނަޝީދު ޑީލް ހައްދަވައި އެމަނިކުފާނު ބޭނުންފުޅުވާ ވެރިކަމުގެ ނިޒާމެއް ގެނެސް ބޮޑުވަޒީރުކަން ހޯއްދެވުމަކީ ކުރައްވަފާނެ ކަމެއް ބާވައެވެ. ޖަވާބު ވަރަށް ކުރެވެ. ހީވެސް ނުވެއެވެ. ގަބޫލެއްވެސް ނުކުރެވެއެވެ.