މެއި 6 ހަމަލާގެ ތަހުގީގު: ޑިމޮކްރަސީގެ ހަޔާތުގެ އެންމެ ފުރިހަމަ އެއް ތަހުގީގު
ތަހުގީގު ކުރިއަށްދަނީ އެއްވެސް ވަރެއްގެ ނުފޫޒެއްނެތި، ފުލުހުންނަށް ލިބިދޭ ހުރިހާ ވަސީލަތްތަކެއް ލިބިމެ، އެ ވަސީލަތްތައް ބޭކާރު ނުކޮށްކަމަށް ވިދާޅުވި
ހޯމް މިނިސްޓަރ ޢިމްރާން ޢަބްދުﷲ
މެއި 6 ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް، ދިން ޓެރަރިސްޓް ހަމަލާގެ ތަހުގީގަކީ ޑިމޮކްރަސީގެ ހަޔާތުގައި ކުރިއަށްދާ އެންމެ ފުރިހަމަ އެއް ތަހުގީގު ކަމަށް ހޯމް މިނިސްޓަރ ޢިމްރާން ޢަބްދުﷲ ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަފުޅު ދައްކަވަމުން މިނިސްޓަރ ވަނީ މެއި 6ގެ ޓެރަރިސްޓް ހަމަލާގެ މަޢުލޫމާތު ހިއްސާކުރައްވާފައެވެ. މި ތަހުގީގުގެ ވާހަކަ ފައްޓަަވަމުންވެސް މިނިސްޓަރ އިމްރާން ވަނީ މި ތަހުގީގަކީ ރާއްޖޭގެ ޑިމޮކްރަސީގެ ހަޔާތުގައި އެންމެ ފުރިހަމަ އެއް ތަހުގީގު ކަމަށް ވިދާޅުވަން ކެރިވަޑައިގަންނަވާކަމަށް ވިދާޅުވެފައެވެ. އެގޮތުން މި ތަހުގީގު ކުރިއަށްދަނީ އެއްވެސް ވަރެއްގެ ނުފޫޒެއްނެތި، ފުލުހުންނަށް ލިބިދޭ ހުރިހާ ވަސީލަތްތަކެއް ލިބިމެ، އެ ވަސީލަތްތައް ބޭކާރު ނުކޮށް އެންމެ ފުރިހަމައަށް ކަމަށް ވިދާޅުވިއެެވެ. މިކަމުގައި ސަރުކާރުން ދީފައިވަނީ ޕޮލިސީ ލެވެލްގެ އިރުޝާދުތަކެއް ކަމަށާއި، އަދި މި މައްސަލައިގައި ރައީސް ޞާލިޙް ގެންގުޅުއްވި އުސޫލުތަކަކީ ތައުރީފު ހައްގު މަސައްކަތްޕުޅުތަކެއް ކަމަށް ވިދާޅުވިއެވެ. އެގޮތުން މި މައްސަލައިގެ ދެފުށް ފެންނަކަން ކަށަވަރުކުރުމަށް ބޭނުންވާ ހުރިހާކަމެއް އިންތިޒާމުކުރައްވައި، މިއަދު މި މައްސަލަ އެންމެ ފުރިހަމަ ތަހުގީގެއްގެ ގޮތުގައި ނިންމާލެވޭނެކަމުގެ ޔަގީންކަން އެބަ އޮތްކަމަށް ވިދާޅުވިއެވެ.
އަދި ހޯމް މިނިސްޓަރުގެ ހައިސިއްޔަތުން ރައްޔިތުންގެ މަޖިލީހަށާއި، އަދި މިނޫނަސް ޖަވާބުދާރީ ވާންޖެހޭ ހުރިހާ ތަނަކަށް ޖަވާބުދާރީ ވުމަށް ފަސްނުޖެހެނީވެސް މި ސަބަބަށްޓަކައި ކަމަށް ވިދާޅުވިއެވެ.
ރައީސް ނަޝީދަށް އަމާޒުކޮށް، ދިން ހަމަލާގެ ތަހުގީގު ޖުލައި މަހު ނިމޭނެ ކަމަށް ޕްރޮސެކިއުޓަރ ޖެނެރަލް ޙުސައިން ޝަމީމް ވަނީ މީގެ ކުރިން ހާމަކުރައްވާފައެވެ. ޕީޖީ ވިދާޅުވީ މި ހަމަލާއަކީ ރާއްޖޭގައި މިހާތަނަށް ދެވުނު އެންމެ ނުރައްކާތެރި ހަމަލާކަމަށާއި، ތަހުގީގު ވެސް ހިންގަނީ، ވަރަށް އިސްކަންދީގެން ކަމަށެވެ. ތަހުގީގު ޓީމާއެކު ޕީޖީ އޮފީހުގެ ޕްރޮސެކިއުޓަރެއް ހަރަކާތްތެރިވާ ކަމަށާއި، މި މައްސަލައިގެ ތަހުގީގު ކުރިއަށްދާ ގޮތާ މެދު ހިތްހަމަޖެހި ވަޑައިގަންނަވާކަމަށް ވިދާޅުވިއެވެ.
ޕީޖީ ވިދާޅުވީ ރައީސް ނަޝީދު އަވަހާރަކޮށްލެއްވުމަށް ދިން ހަމަލާއާ ގުޅިގެން ކުރިއަށްދާ ތަހުގީގު ބާރު ސްޕީޑެއްގައި ކުރިއަށްދާކަމަށެވެ. އަދި އެ ހާދިސާ ތަހުގީގުކުރުމަށްޓަކައި ފުލުހުންނާއި، ޕްރޮސެކިއުޓަރ ޖެނަރަލްގެ އޮފީހާއި، ބޭރުގެ ތަޖުރިބާކާރުން ގުޅިގެން މަސައްކަތް ކުރައްވަމުން އަންނަ ކަމަށެވެ.
މި ބާވަތުގެ މައްސަލަތަކަކީ ތަހުގީގު ކުރަން އުނދަގޫ މައްސަލަތަކެއްކަން ފާހަގަކުރައްވައި ޝަމީމް ވިދާޅުވީ މައްސަލައިގެ ތަހުގީގު އަވަސްކުރުމުން ވެސް ނުވަތަ މާ ލަސްކުރުމުން ވެސް ގެއްލުންތަކެއް ކުރިމަތިވާނެކަމަށެވެ. މިގޮތުން އަވަސް ކޮށްލައިފިނަމަ ހާދިސާ ހިންގުމުގައި ބައިވެރިވާ ފަރާތްތައް ނުހޯދިދާނެކަމަށާއި، ލަސްކޮށްފިނަމަ ހެކި ނައްތާލުމަށް ވެސް މަސައްކަތް ކޮށްފާނެކަމަށެވެ.
ޕީޖީ ވިދާޅުވީ މި މައްސަލައިގެ ތަހުގީގު ޖުލައި މަހު ނިމި، އޯގަސްޓް މަހުގެ 5 ވަނަ ދުވަހުގެ ކުރިން ކޯޓަށް ހުށަހެޅޭނެކަމުގެ ޔަގީންކަން އެބައޮތް ކަމަށެވެ. އަދި އެއަށްވުރެ އަވަހަށް ވެސް މައްސަލަ ކޯޓަށް ހުށަހެޅުމަށް މަސައްކަތް ކުރައްވަމުން ގެންދަވާނެކަމަށް ޕީޖީ ވިދާޅުވިއެވެ.
