އަމާޒަކީ މިއަހަރު ނިމުމުގެ ކުރިން 10،000 މެމްބަރުން ހަމަކުރުންކަމަށް ޢަދާލަތު ޕާޓީގެ ރައީސް އަދި ހޯމް މިނިސްޓަރ ޝެއިޚް ޢިމްރާން ޢަބްދުﷲ ވިދާާޅުވެއްޖެއެވެ.

ރާއްޖެ ޓީވީގެ ފަލަ ސުރުޚީ ޕްރޮގްރާމްގައި އަދާލަތު ޕާޓީގެ ކާމިޔާބީގެ މައްޗަށް އަލިއަޅުއްވާލައްވައި ވާހަކަފުޅުދައްކަވަމުން، ޕާޓީގެ ރައީސް ވިދާޅުވީ، 2005 ވަނަ އަހަރު ރާއްޖޭގެ 3 ވަނައަށް އުފެދުނު ސިޔާސީ ޕާޓީއެއްގެ ގޮތުގައި ޕާޓީ ވުޖޫދުވެ މިއަދާއި ހަމައަށް ދެމިއޮތީ މުހިންމު އަސާސްތަކެއް ދަމަހައްޓައިގެންކަމަށެވެ. ރާއްޖޭގެ ޑިމޮކްރަސީގެ ހަޔާތް ފެށިގެން އައިއިރު ސިޔާސީ ހަރަކާތްތައް ވާދަވެރިވެ، ހަލަބޮލިކަން އިތުރުވެ، ދީނީ ކަންކަން ދޫކޮށްލާފައިވާކަމަށް ވިދާޅުވިއެވެ. އޭރުގައި ކުރެއްވި ދަތުރުފުޅުތަކުގައި ޖަމާއަތަށް ނަމާދަށް އަރަން ދެކޮޅު ހަދާ މީހުންނާއި، މިފަދަ ޚިޔާލާތުގެ މީހުން ގިނަ ނަމަވެސް، އަދާލާތު ޕާޓީގެ ދީނީ އަދި އިޖުތިމާއީ ފޭރާން ވަރުގަދަކުުރުމަށް ކުރި މަސައްކަތުން މިފަދަކަންކަން ބަދަލު ގެނެވިފައިވާކަން މިއަދު އެންމެންވެސް ހެކިވާނެ ކަމަށް އެމަނިކުފާނު ވިދާޅުވިއެވެ.

މިއަދާ ހަމައަށް އަދާލަތު ޕާޓީން ވަނީ ޕާޓީގެ އަސާސްތަކުގެ މަތީގައި ދެމިހުރެ ފުރިހަމަ ދަތުރެއް ދައްކައިދީފައިކަމަށް މިނިސްޓަރ ސިފަކުރެއްވިއެވެ. އެގޮތުން ސިޔާސީ ޕާޓީތައް އެންމެ ފުރަތަމަ އުފެދުނު އިރު ފެނުނު ގިނަ ޕާޓީތަކެއް އުވި ދިޔައިރު، އަދާލަތު ޕާޓީ ދެމިއޮތުމުގެ ސިއްރަކީވެސް ސުލްހަވެރި ޕާޓީގެ އަސާސްތަކުގެ މަތީގައި ދެމިހުރެ ހާލަތާ ގުޅޭގޮތުން މަސައްކަތްކުރުމަށް ގެނައި ބަދަލުތައް ކަމަށް ވިދާޅުވިއެވެ. އަދި މިހާތަނަށް އުފެދެިފައިވާ ކޮންމެ ސަރުކާރެއްވެސް އުފެދުމުގައި އަދާލަތު ޕާޓީން އަދާކުރި ދައުރުގެ ސަބަބުން، އެ ޕާޓީގެ މުހިންމުކަން ވަޒަންކޮށްލެވޭނެކަމަށް ވިދާޅުވިއެވެ.

އަދާލަތު ޕާޓީއިން މިހާރު ވަނީ ޕާޓީގެ މެމްބަރުން އިތުރުކޮށް 10،000 މެމްބަރުން ހަމަކުރުމަށް އަމާޒު ހިފާފައެވެ. ޕާޓީއެއްގެ ކާމިޔާބީއަކީ އަދަދު ބޮޑުކުރުން ނޫންކަމަށާއި، އެއަށްވުރެ ބޮޑަށް އަސާސްތައް ދެމެހެއްޓޭނެގޮތަށް ސިޔާސީ ހަރަކާތްތަކާއި މެސެޖުތައް ދެވޭގޮތް ހެދުންކަމަށް އެމަނިކުފާނު ވިދާޅުވިއެވެ. އެހެންނަމަވެސް، 10،000 މެމްބަރުން ހަމަކުރުމަށް މަޖުބޫރުވި ހިސާބުން، ދޭތެރެ ދޭތެރެއިން މިކަމަށް މަސައްކަތްކޮށްފައިވާކަން ފާހަގަކޮށް ޢިމްރާން ވިދާޅުވީ އޭރުވެސް އަދަދު ހަމަކުރިކަމަށެވެ. އެހެންނަމަވެސް އެމަނިކުފާނުވެސް ޖަލުގައި ހުންނަވަންޖެހުމާއި އަދި ފިންގަރޕްރިންޓް އެއްކުރުމުގައި ދިމާވި ދަތިކަމާއެކު މެމްބަރުންގެ އަދަދު ދަށްވިކަމަށެވެ. މިހާރު އަމާޒު ހިއްޕަވާފައިމިވަނީ މިއަހަރު ނިމުމުގެ ކުރިން އެ އަދަދު ހަމަކުރުމަށް އެމަނިކުފާނު ވިދާޅުވިއެވެ.

ރައީސް ޞާލިޙުގެ ސަރުކާރުގެ ކޯލިޝަން ސަރުކާރަށް ގުޑުމެއް ނައިސް އަދިވެސް ދެމިއޮތީ ތަފާތު ޚިޔާލަށް ފުރުސަތު ދިނުމުން ކަމަށް އެމަނިކުފާނު ފާހަގަކުރެއްވިއެވެ. އަދި މިކަމުގައި ކޯލިޝަން ޒިންމާ އުފުލައި ބުރަ މަސައްކަތްތަކެއް ކޮށްފައިވާކަމަށްވެސް ޢިމްރާން ވިދާޅުވިއެވެ. ވަކި ޕާޓީތަކުގެ ނުތަނަވަސްކަން ހުއްޓަސް، ނުތަނަވަސްކަމުން އަރައިގަނެ ފައިދާހުރި ގޮތަށް މަސައްކަތް ކުރަން އަދާލަތު ޕާޓީގެ މެމްބަރުން ތައްޔާރަށް ތިބިކަމަށް ވިދާޅުވިއެވެ. އަދި ނުތަނަވަސްކަން ބޮޑުވާ ވަގުތު މަޝްވަރާގެ ސިފަ އިސްކުރެއްވުމުން މިއަދާ ހަމައަށްވެސް ކޯލިޝަން ދެމިއޮތްކަމަށް ވިދާޅުވިއެވެ.