ޔާމީން ތާއީދުކުރައްވާ ނިޒާމެއް ނަޝީދަށް އެނގިވަޑައިނުގަންނަވާނެ، އިންތިޚާބުގައި ޔާމީނަށް ވާދަކުރެވެން ޖެހޭ: އަދުރޭ

ރައީސް ޢަބްދުﷲ ޔާމީން ތާއީދުކުރައްވަނީ ވެރިކަމުގެ ކޮން ނިޒާމަކަށް ކަމެއް ރައީސް މުޙައްމަދު ނަޝީދަށް އެނގިވަޑައިނުގަންނަވާނެ ކަމަށް ޕީއެންސީގެ ރައީސް ޢަބްދުއްރަޙީމް ޢަބްދުﷲ (އަދުރޭ) ވިދާޅުވެއްޖެއެވެ.

އަދުރޭ މިމޭރުމުން ޓްވީޓްކުރައްވާފައި މިވަނީ ހޯމަ ދުވަހުގެ ރޭ ކުރިޔަށްގެންދިޔަ "އާސްކް ސްޕީކަރ" ޕްރޮގްރާމްގައި، ވެރިކަމުގެ ނިޒާމުގައި ބަރުލަމާނީ ނިޒާމަކަށް ބަދަލުކުރުމުގައި އެމަނިކުފާނާއެކު ރައީސް ޔާމީން މަސައްކަތްކުރައްވާނެ ކަމަށް ރައީސް ނަޝީދު ވިދާޅުވެފައިވަނިކޮށެވެ. މި ޕްރޮގްރާމްގައި ވާހަކަދައްކަވަމުން ރައީސް ނަޝީދު ވިދާޅުވީ ވެރިކަމުގެ ނިޒާމު ބަދަލުކުރުމަށް ގާނޫނު އަސާސީއަށް ބަދަލު ގެނައުމުގެ މަސައްކަތް ކުރަންޖެހޭއިރު، އެމަސައްކަތް ކުރައްވާނެ ކަމަށެވެ. އަދި އެބަދަލު ގެނެވޭނެކަން ފާހަގަކުރައްވައި، އެބަދަލު ގެނައުމަށް ޕީޕީއެމްވެސް ތާއީދު ކުރާނެ ކަމަށް ވިދާޅުވިއެވެ.

ރައީސް ނަޝީދު މިމޭރުމުން ވާހަކަދެއްކެވުމާ ގުޅިގެން އަދުރޭ ކުރެއްވި ޓްވީޓްގައި ވިދާޅުވީ ރައީސް ޔާމީން ތާއީދުކުރައްވަނީ ރައްޔިތުންގެ ނިންމުމަށްކަމަށެވެ. އަދި ރައްޔިތުން ވަނީ ވެރިކަމުގެ ނިޒާމަކީ ރިޔާސީ ނިޒާމުކަމަށް ނިންމާފައިކަމަށެވެ.

"ރައީސް ޔާމީން ތާއީދުކުރައްވާ ނިޒާމެއް ރައީސް ނަޝީދަކަށް އެނގިވަޑައެއްނުގަންނަވާނެ. ރިޔާސީ އިންތިޚާބުގައި ރައީސް ޔާމީނަށް ވާދަކުރެވެން ޖެހޭނެ. އެއީ ގައުމު ބޭނުންވާ ގޮތް." އަދުރޭގެ ޓްވީޓްގައި އިތުރަށް ވިދާޅުވެފައިވެއެވެ.

ރައީސް ނަޝީދު ގެންދަވަނީ ބޮޑުވަޒީރުކަމަށް ވަޑައިގަންނަވަން ބޭނުންފުޅުވާކަމަށް ވިދާޅުވެ އެމަގަށް މަސައްކަތްކުރައްވަމުންނެވެ. ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރުމަށްފަހު ބޮޑުވަޒީރު ކަމަށް ވަޑައިގަތުމުގެ ޝައުގުވެރިކަން ފާޅުކުރައްވައި، އެކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށްވެސް ވަނީ ހުށަހަޅުއްވާފައެވެ. އެކަމާ ގުޅޭގޮތުން ރައީސް ޞާލިޙު ވިދާޅުވެފައިވަނީ އެކަން ނިންމާނީ ރައްޔިތުންގެ ވޯޓަކުންކަމަށެވެ.

މިހާރު އަމަލުކުރަމުން އަންނަ ގާނޫނު އަސާސީ އެކުލަވާލަމުންދިޔަ ދުވަސްވަރު، ވެރިކަމުގެ ނިޒާމު ކަނޑައެޅުމުގައި ގޮތް ނިންމާފައިވަނީ ރައްޔިތުންގެ މެދުގައި ވޯޓެއް ނަގައިގެންނެވެ. އެގޮތުން ރައްޔިތުން ނިންމާފައިވަނީ ރިޔާސީ ނިޒާމެއް ބޭއްވުމަށެވެ. އެހެން ކަމުން ދެންވެސް ވެރިކަމުގެ ނިޒާމު ބަދަލުކުރާނަމަ އެކަން ކުރަންވާނީ ރައްޔިތުންގެ ވޯޓަކުން ކަމަށް ގިނަ ބަޔަކު އަންނަނީ ބުނަމުންނެވެ.

ރައީސް ނަޝީދު ވިދާޅުވަމުން ގެންދަވަނީ ފެންނަ ނުފެންނަ ވޯޓެއް، އަންނަ 2022 ވަނަ އަހަރު ނަގައި، ގާނޫނު އަސާސީއަށް އެބަދަލު ގެނައުމުގެ މަސައްކަތް ކުރަންޖެހޭކަމަށެވެ.