ކޯސްޓާގެ ސޮއިހޯދާ ކްލަބަށް ގެންނަން ބޭނުން: ޝަންހާއީގެ ކޯޗު

ޗެލްސީ އަށް ކުޅެމުން އަންނަ ސްޕެއިންގެ ފޯވާޑް ޑިއެގޯ ކޯސްޓާގެ ސޮއި ހޯދަން ބޭނުން ކަމަށް ޗައިނީޒް ސުޕާ ލީގުގެ ކްލަބެއް ކަމަށްވާ ޝަންހާއީގެ ކޯޗު ގަސް ޕޮއެޓް ބުނެފި އެވެ.

ޓޯކް ސްޕޯޓްސް އަށް ދިން އިންޓަވިއުއެއްގައި ޕޮއެޓް ބުނީ ކޯސްޓާގެ ސޮއި ހޯދުމަކީ ފަސޭހަކަމެއް ނޫން ކަމަށާއި، އެހެންނަމަވެސް އޭނާ އަކީ ޝަންހާއީއަށް ގެންނަން މިވަގުތު އެންމެ ބޭނުންވާ ކުޅުންތެރިޔާ ކަމަށެވެ. އެގޮތުން އެކަމަށް މަސައްކަތްކުރާނެ ކަމަށްވެސް އޭނާވަނީ ބުނެފައެވެ.

މިދިޔަ ޖެނުއަރީ ޓްރާންސްފާގަވެސް ޗައިނީޒް ސުޕާ ލީގުގެ ކްލަބްތަކުން ކޯސްޓާ ހޯދުމަށް މަސައްކަތްކޮށްފައިވާއިރު، އޭނާ ވަނީ އެ ހުށަހެޅުންތައް ރިޖެކްޓްކޮށްފައެވެ. ޗައިނާ ކްލަބްތަކުގެ އިތުރުން ޔޫރަޕްގެވެސް ގިނަ ކްލަބްތަކުން އަންނަނީ ކޯސްޓާއަށް ފާރަލަމުންނެވެ.

އެޓްލެޓިކޯ މެޑްރިޑް ދޫކޮށްލުމަށްފަހު 2014 ވަނަ އަހަރު ޗެލްސީއާ ގުޅުނު ކޯސްޓާ ވަނީ މިވީތަނަށް އެޓީމަށް ކުޅުނު 117 މެޗުގައި 58 ލަނޑު ކާމިޔާބުކޮށް، އެޓީމާއެކު ޕްރިމިއާ ލީގު ދެފަހަރު އަދި ލީގް ކަޕް އެއްފަހަރު ކާމިޔާބުކޮށްފައެވެ.

ޗައިނީޒް ސުޕާ ލީގުގެ ކްލަބްތަކުން ބޮޑެތި ހޭދަތައް ކުރަމުން އަންނާތީ އެ ގައުމުގެ އެފްއޭ އިން ވަނީ ލީގުގެ ސްޓްރަކްޗާއަށް ބަދަލުތަކެއް ގެނެސްފައެވެ. އެގޮތުން ބިދޭސީ ކުޅުންތެރިން ބޭނުންކުރެވޭ އަދަދަށްވެސް ވަނީ ބަދަލު ގެނެސްފައެވެ.

ޗެލްސީ ދޫކޮށްލުމަށްފަހު ކުރިޔަށް އޮތް ސީޒަނުގައި ޖޯން ޓެރީ ފެންނާނީ ޗައިނާގެ ކްލަބަކުން ކަމަށް ރިޕޯޓްތައް ބުނަމުން އަންނަ އިރު، އޭނާ ބަދަލުވާނީ ޝަންހާއީއަށް ކަމަށްވެސް ރިޕޯޓްތައް ބުނެއެވެ.