ރައީސް ޞާލިހާއި އެމަނިކުފާނާ ދެމެދު މާބޮޑު ހަސަދަވެރިކަމެއް އޮތްކަމަށް ބަޔަކު ދެކޭ ސަބަބެއް ވިސްނިވަޑައިނުގަންނަވާ ކަމަށް ވިދާޅުވި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އާސްކް ސްޕީކަރ ޕްރޮގްރާމްގައި ވާހަކަދައްކަވަނީ
ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލުކުރުމުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަކީ ހުރަހެއް ނޫންކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
އާސްކު ސްޕީކަރގެ ތިން ވަނަ ޕްރޮގްރާމްގައި ވެރިކަމުގެ ނިޒާމު ބަރުލަމާނީ ނިޒާމަށް ބަދަލުކުރުމުގައި އޮތް ހުރަހަކީ ކޮބައިތޯ އާއި ރައީސް ޞާލިހު އެކަމަށް ދެކޮޅު ހައްދަވާފައިވާތީ އެކަމާއި ގުޅޭގޮތުން އާންމުންގެ މީހަކު ކުރި ސުވާލަކަށް ޖަވާބު ދެއްވަމުން ނަޝީދު ވިދާޅުވީ ރައީސް ޞާލިހު އެކަމުގައި ފާޅުގައި ދެކޮޅު ހައްދަވާފައި ނުވާކަމަށެވެ. އަދި ރައީސް ޞާލިހާއި އެމަނިކުފާނާ ދެމެދު މާބޮޑު ހަސަދަވެރިކަމެއް އޮތްކަމަށް ބަޔަކު ދެކޭ ސަބަބެއް ވިސްނިވަޑައިނުގަންނަވާ ކަމަށް ވިދާޅުވިއެވެ. މިހާރުގެ ހާލަތަށް ބަލާއިރު ރައީސް އެގޮނޑީގައި އިންނަވާ މިކަންކަން ތަހުގީގުކުރުމަކީ ފަސޭހަކަމަކަށް ނުވާނެކަމަށް ވިދާޅުވިއެވެ.
މީގެއިތުރުން ރައީސް ޞާލިހަށް އެންމެ އިޚުލާސްތެރި އެއް ބޭފުޅަކަށް ވާނީ އެމަނިކުފާނު ކަމަށް ވިދާޅުވިއެވެ.
މީގެއިތުރުން ވެރިކަމުގެ ނިޒާމު ބަދަލުކުރަން ފުރުސަތު ނުލިބި 2023 ވަނަ އަހަރު ރިޔާސީ އިންތިޚާބުގައި ރައީސް ސާލިހު ބައިވެރިވެވަޑައިގެންފިކަމަށް ވާނަމަ ރައީސް ސޯލިހަށް ތާއީދުކުރައްވާނެތޯ އާންމު މީހަކު ކުރި ސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ 2023 ވަނަ އަހަރު ބާއްވާ ރިޔާސީ އިންތިޚާބުގައި އެމްޑީޕީގެ ކެންޑިޑޭޓަކަށް ވާނީ އެމަނިކުފާނުކަމަށެވެ.
ދެން އަންނަ ރިޔާސީ އިންތިޚާބެއްގައި ކުރީގެ ރައީސް އަބްދުﷲ ޔާމީނަށް ވާދަކުރެއްވުމުގެ ފުރުސަތު ލިބުމަކީ ކިހާ މުހިންމުކަމެއްތޯ އާންމު މީހަކު ކުރެއްވި ސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ އެއްވެސް އިރެއްގައި ރައީސް ޔާމީނަށް ދެރައެއް ލިބުމަށް އެދިވަޑައިނުގަންނަވާ ކަމަށެވެ. އަދި އުންމީދުކުރައްވަނީ ރާއްޖޭގައި ބާއްވާ ކޮންމެ އިންތިޚާބެއްގައިވެސް ހުރިހާ ސިޔާސީ ޕާޓީތަކަށްވެސް ބައިވެރިވެވޭގޮތަށް ކުރިޔަށް ދިޔުންކަމަށް ވިދާޅުވިއެވެ. އަދި އެމަނިކުފާނު ދެކެވަޑައިގަންނަވާ ގޮތުގައި ދެން ރާއްޖޭގައި ރިޔާސީ އިންތިޚާބެއް ނޯންނާނެކަމަށް ވިދާޅުވިއެވެ.
