ހޮނިހިރު ދުވަހު އިތުރު 596 މީހުން ވެކްސިންގެ ދެ ޑޯޒް ފުރިހަމަކޮށްފި
5 ޖުލައި 2021 | ހޯމަ 02:18ކޮވިޝިލްޑް ވެކްސިން ޖަހަން އެޕޮއިންޓްމަންޓް ނެތި މީހުންދާކަމަށް އެޗްޕީއޭއިން ވަނީ ފާހަގަކޮށް އެކަން ނުކުރުމަށް ގޮވާލާފައި
ރާއްޖޭގައި މިހާރު ޖަހަމުން އަންނަނީ ކޮވިޝީލްޑް ވެކްސިނާއި، ފައިޒަރ ވެކްސިން، އަދި ސިނޮފަރމް ވެކްސިން
އިތުރު 596 މީހުން ވެކްސިންގެ ދެ ޑޯޒް ފުރިހަމަކޮށްފިއެވެ.
އެޗްޕީއޭއިން އާންމުކުރި ތަފާސްހިސާބުތައް ދައްކާގޮތުން ހޮނިހިރު ދުވަހު ފުރަތަމަ ޑޯޒު ޖެހީ 72 މީހުންނެވެ. އެއީ މާލެ ސަރަހައްދުން ވެކްސިން ޖެހި 55 މީހުުންނައި އަތޮޅުތެރެއިން ވެކްސިން ޖެހި 17 މީހުންނެވެ. މީގެ އިތުރަށް ހޮނިހިރު ދުވަހު ދެވަނަ ޑޯޒު ޖެހީ 596 މީހުންނެވެ. އެއީ މާލެ ސަރަހައްދުން ވެކްސިން ޖެހި 351 މީހުންނާއި އަތޮޅުތެރެއިން ވެކްސިން ޖެހި 245 މީހުންނެވެ. މިއާއެކު ވެކްސިންގެ ފުރަތަމަ ޑޯޒު ޖެހި މީހުންގެ ޖުމްލަ އަދަދު 317،316ށް އަރާފައިވާއިރު، ދެ ޑޯޒު ފުރިހަމަކުރި މީހުންގެ އަދަދު މިވަނީ 192،321ށް އަރާފައެވެ.
ރާއްޖޭގައި މިހާރު ޖަހަމުން އަންނަނީ ކޮވިޝީލްޑް ވެކްސިނާއި، ފައިޒަރ ވެކްސިން، އަދި ސިނޮފާމް ވެކްސިނެވެ. މީގެތެރެއިން ސިނޮފާމްގެ ފުރަތަމަ ޑޯޒް 4 ޖުލައިގައި ޖަހާނީ ވެކްސިން ނުޖަހާ މީހުންގެ ތެރެއިން 18 އަހަރުން މަތީގެ މީހުންނަށްކަމުގައިވާއިރު، ދެވަނަ ޑޯޒް ޖަހާނީ ވެކްސިން ޖެހިތާ 3 ހަފުތާ ވެފައިވާ މީހުންނަށް ކަމަށެވެ.
އަދި ކޮވިޝީލްޑް ވެކްސިންގެ ދެ ވަނަ ޑޯޒް ޖަހަން ދާއިރު އެކަން ކުރަނީ ވެކްސިން އެޕޮއިންމެންޓްއެއް ހައްދައިގެންނެވެ. ކޮވިޝީލްޑް ވެކްސިންގެ ދެ ވަނަ ޑޯޒް ޖެހުން ޖުލައި 4 ގައި ވަނީ ފަށާފައެވެ. ބައެއް ފަރާތްތަކުން އެޕޮއިންޓްމެންޓް ނުހައްދާ ވެކްސިން ޖަހަންދާ ކަމަށާއި އެގޮތަށް ވެކްސިން ޖަހަން ދިއުމުން ވެކްސިން ޖަހައި ނުދެވޭނެ ކަމަށް އެޗްޕީއޭ އިން ބުނެއެވެ. އެ އިދާރާއިން މިހާރު ދަނީ ވެކްސިންގެ ދެ ވަނަ ޑޯޒް ޖަހަންޖެހޭ ފަރާތްތަކަށް ގުޅައި އެޕޮއިންޓްމެންޓް ހެއްދުމުގެ މަސައްކަތް ކުރަމުންނެވެ.
ވެކްސިން ޖެހުމަށް އެޕޮއިންޓްމަންޓް ދެމުންގެންދާނީ ފުރަތަމަ ޑޯޒް ޖެހި ތަރުތީބުން، ކުރިން ޖެހި މީހުންނަށް އިސްކަންދީގެންނެވެ. އެގޮތުން މި އަހަރުގެ ފެބްރުއަރީ މަހު ކޮވިޝީލްޑް ވެކްސިންގެ ފުރަތަމަ ޑޯޒް ޖަހާފައިވާ ފަރާތްތަކަށް މިއަދު ވެކްސިން ޖެހުމަށް އެޕޮއިންޓްމެންޓް ހެއްދުމަށް އެޗްޕީއޭއިން ގުޅަމުން ގެންދާނެއެވެ. އެޕޮއިންޓްމަންޓް ލިބޭ ހުރިހާ ފަރާތްތަކުން ވެސް ކަނޑައެޅިފައިވާ ސެންޓަރަށް ގަޑިއަށް ދިއުމަށް ސަމާލުކަންދިނުމަށް އެޗްޕީއޭ އިން އިލްތިމާސްކުރެއެވެ.
ވެކްސިން ޖަހަން ދާ ފަރާތްތަކުން ވެކްސިން ކާޑާއި އައިޑީ ކާޑު ނުވަތަ ކާކުކަން އަންގައިދޭ ރަސްމީ ލިޔުމެއް ގެންދިޔުމަށް އެޗްޕީއޭ އިން ވަނީ އިލްތިމާސްކޮށްފައެވެ.
