މިދިޔަ މެއި މަހުގެ 6ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ޓެރަރިސްޓު ހަމަލާގެ ތަހުގީގު ކުރިއަށްދާގޮތް މޮނިޓަރ ކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ޚާއްސަ މަންދޫބަކަށް އައްބާސް ފާއިޒް ރާއްޖެ ވަޑައިގެންފިއެވެ.

އެމްނެސްޓީ އިންޓަރނޭޝަނަލްގައި ކުރިން މަސައްކަތް ކުރެއްވި އަދި ދެކުނު އޭޝިޔާ ސަރަހައްދުގެ އިންސާނީ ހައްގުތަކާ ބެހޭ ތަޖުރިބާކާރު އައްބާސް ރާއްޖެ ވަޑައިގެންނެވީ ހުކުރު ދުވަހުއެވެ. އެ މަގާމަށް ރައީސް އޭނާ އައްޔަންކުރެއްވީ މެއި މަހުގެ 19 ވަނަ ދުވަހުއެވެ.

އެ ހާދިސާގެ ތަހުގީގުގެ ތެރޭގައި ރައީސުލްޖުމްހޫރިއްޔާގެ ޚާއްސަ މަންދޫބުގެ ހައިސިއްޔަތުން މޭ 6 ގެ ހަމަލާޔާގުޅޭ އެންމެހައި ތަޙުގީގެއްގައި ޕްރޮސެކިއުޓަރ ޖެނެރަލް ކަނޑައަޅުއްވާ ހުދޫދުގެ ތެރެއިން އައްބާސް ފާއިޒް ބައިވެރިވެވަޑައިގަންނަވާނެ ކަމަށް ރައީސް އޮފީހުން ބުނެއެވެ. އަދި، އިންސާފު ގާއިމުކުރެވެންދެން ބޭނުންވާ ހާލަތްތަކުގައި ކަމާގުޅޭ ލަފަޔާއި އިރުޝާދު ދެއްވައި، ތައްޔާރުކުރައްވަން ޖެހިވަޑައިގަންނަވާ އެންމެހާ ރިޕޯޓްތައްވެސް ތައްޔާރުކުރައްވާނެކަމަށް ބުނެފައިވެއެވެ.

އައްބާސް ފާއިޒަކީ ގިނަ ދުވަސްތަކެއްވަންދެން އެމްނެސްޓީ އިންޓަރނޭޝަނަލްގެ ދެކުނު އޭޝިޔާ ބައްރުގެ އިޖްތިމާއީ، ސަގާފީ އަދި ސިޔާސީ މައްސަލަތައް ދިރާސާކުރެއްވި ކަމާ ގުޅޭ މާހިރެކެވެ. އަދި، ދެކުނު އޭޝިޔާ ބައްރުގެ ގައުމުތަކުގެ އިންސާނީ ހައްގުތައް ކަށަވަރުކުރުމުގެ މަސައްކަތުގައި 30 އަހަރަށް ވުރެ ދިގު މުއްދަތަށް ޚިދުމަތްކުރައްވައި، ކަމުގެ ތަޖުރިބާ ލިބިވަޑައިގެން ހުންނެވި ބޭފުޅެކެވެ. އައްބާސް ފާއިޒަކީ އިނގިރޭސިވިލާތުގެ ޔުނިވަރސިޓީ އޮފް އެސެކްސްގައި ފާއިތުވި 3 އަހަރު ގާނޫނީ ލެކްޗަރަރއެއްގެ ގޮތުގައި ވެސް މަސައްކަތް ކުރައްވަމުން ގެންދަވާ ބޭފުޅެކެވެ.

މެއި މަހުގެ ހަ ވަނަ ދުވަހު ރައީސް ނަޝީދަށް ދިން ހަމަލާގެ ތަހުގީގުގެ ތެރެއިން މިހާތަނަށް އެ ހަމަލާގައި އަމަލީގޮތުން ބައިވެރިވި 8 މީހަކު ހައްޔަރުކޮށްފައިވާއިރު އޭގެ ތެރެއިން ހަތަރު މީހެއްގެ ތަހުގީގު ނިމި ދައުވާކުރަން ފޮނުވަން ތައްޔާރުވެފައިވާ ކަމަށް ރައީސް ސާލިހު ދާދިފަހުން ވިދާޅުވެފައިވެއެވެ. އޭގެ ތެރެއިން ފަސް މީހެއްގެ ނަން ފުލުހުން މިހާތަނަށް އާންމުކޮށްފައިވާއިރު އޭގެ ތެރޭގައި ސައިކަލުގެ ވެރިމީހާއާ ސީދާ ބޮން ގޮއްވާލި މީހާ ވެސް ހިމެނެއެވެ.

އެ ހަމަލާގައި ލިބުނު އަނިޔާތަކަށް އޭޑީކޭ ހޮސްޕިޓަލުގައި ފަރުވާ ހޯއްދެވުމަށް ފަހު އިތުރު ފަރުވާއަށް ރައީސް ނަޝީދު ޖަރުމަނަށް ވަޑައިގެންނެވީ މެއި މަހުގެ 13ގައެވެ. އޭގެ ފަހުން އަނެއްކާ ވެސް އެމަނިކުފާނު ވަނީ އިތުރު ފަރުވާއަށް އިނގިރޭސިވިލާތަށް ވަޑައިގެންފައެވެ. ހަމަލާގައި ލިބުނު އަނިޔާތަކާ ގުޅޭގޮތުން ރައީސް ނަޝީދު ވިދާޅުވީ ބައެއްކަންކަން މުޅިން ރަނގަޅުވާން ދުވަސްކޮޅެއް ނެގިނަމަވެސް ޖުމްލަ ގޮތެއްގައި ހުރިހާ ކަމެއް ވެސް ރަނގަޅުކަމަށެވެ.