ހިޔާ ފްލެޓުތައް ބެލުމަށް މިހާތަނަށް 4000ށްވުރެ ގިނަ މީހުން ޒިޔާރަތްކޮށްފި
ޖުލައި 4 ވަނަ ދުވަހާ ހަމައަށް ފްލެޓްތައް ބެލޭނެ
ހިޔާ ފްލެޓުތައް ބެލުމަށް ގޮސްފައިވާ އާންމުން
ހިޔާ މަޝްރޫއުގެ ދަށުން އިމާރާތްކޮށްފައިވާ ހައުސިންގ ޔުނިޓުތަކަށް ފާއިތުވި ހަތަރު ދުވަހު 4000ށްވުރެ ގިނަ މީހުން ޒިޔާރަތްކޮށްފިއެވެ.
ހައުންސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން ބުނީ މިހާތަނަށް ޖުމްލަ 4،247 މީހުން ފްލެޓްތައް ބެލުމަށް ޒިޔާރަތްކޮށްފައިވާ ކަމަށެވެ. އެގޮތުން 26 ވަނަ ދުވަހު 1،308 މީހުން ޒިޔާރަތްކޮށްފައިވާއިރު 27 ވަނަ ދުވަހު 1،479 މީހުން، 28 ވަނަ ދުވަހު 709 މީހުން އަދި 29 ވަނަ ދުވަހު 751 މީހުން ޒިޔާރަތްކޮށްފައިވާ ކަމަށެވެ.
ހިޔާ މަޝްރޫޢުގެ ދަށުން ހުޅުމާލެ ފޭސް 2 ގައި އިމާރާތްކޮށްފައިވާ ފްލެޓްތަކުގެ އެއްބަސްވުމުގައި ސޮއިކޮށް ފްލެޓް ހަވާލުކުރުމަށް ވާންޖެހޭ ތައްޔާރީތައް އެޗްޑީސީގެ ފަރާތުން އަންނަނީ ކުރަމުންކަމަށެވެ. މިއީ ނިސްބަތުން ބޮޑު މަޝްރޫޢުއަކަށްވެފައި ފްލެޓަށް ހޮވިފައިވާ ފަރާތްތަކަށް ވަކިވަކިން އެއްބަސްވުން ފޮނުވުމަކީ ދަތިކަމެއްކަމަށް އެޗްޑީސީން ބުނެއެވެ.
އެހެންކަމުން ހުރިހާ ފަރާތްތަކަށް ފަސޭހަކަމާއެކު އެއްބަސްވުން ފެންނަގޮތަށް އެއްބަސްވުމުގެ ޑްރާފްޓް އެޗްޑީސީގެ ވެބްސައިޓްގައި ވަނީ ޝާއިއުކޮށްފައެވެ. ނަމަވެސް ޝާއިއުކޮށްފައިވާ ޑްރާފްޓް އެއްބަސްވުމަށް އިތުރު ބަދަލެއް އައުމަކީ އެކަށީގެންވާ ކަމެއްކަމަށާއި ޑްރާފްޓަށް އެއްވެސް ބަދަލެއް ގެނެވޭނަމަ އެކަން އިއުލާންކުރުމަށްފަހު ވެބްސައިޓްގައި ޝާއިއުކުރަމުންދާނެ ކަމަށް އެޗްޑީސީން ބުނެއެވެ. އަދި ޑްރާފްޓް އެއްބަސްވުން ވެބްސައިޓުން ޑައުންލޯޑްކުރެވެން ހުންނާނެކަމަށް އެޗްޑީސީން ބުނެއެެވެ.
ސަރުކާރުން ހާމަކޮށްފައިވާ ގޮތުގައި ހިޔާ ފްލެޓްތަކުގެ މި ޔުނިޓްތަކުގައި ދިރިއުޅެން ފެށޭނީ އެގްރިމެންޓްގެ މަސައްކަތާއި އިމާރާތުގައި ނުނިމި ހުރި މަސައްކަތްތައް ނިންމުމަށްފަހުއެވެ. ފްލެޓްތަކުގައި މުށިޖެހުމާއި، ކުލަލުމާއި، ބަދިގެ ކަބަޑުސެޓު ޖެހުމާއި، ފަންކާއާއި ބޮކި ވެސް ހަރުކުރަންޖެހޭނީ ފްލެޓްތަކުގެ ވެރިންގެ ޚަރަދުގައި އަމިއްލައަށެވެ. އެގްރިމެންޓްގައި ސޮއިކުރުމަށްފަހު ފުރަތަމަ ތިން މަސް ދެނީ ފިނިޝިންގ މަސައްކަތްތައް ކުރުމަށެވެ. މި މުއްދަތުގައި އެއްވެސް ކުއްޔެއް ނުނަގާގޮތަށް ސަރުކާރުންވަނީ ލުއި ދީފައެވެ.
ހުޅުމާލޭ ދެވަނަ ފޭސްގައި އަޅާފައިވާ ހިޔާ ފްލެޓްތަކަށް ފްލެޓުގެ މެނޭޖްމަންޓު ފީއާއެކު ހިޔާ ފްލެޓްތަކަށް ދައްކަން ޖެހެނީ މަހަކު 8،500 ރުފިޔާ ކަމަށް އެޗްޑީސީން ވަނީ ބުނެފައެވެ. އެޗްޑީސީން ބުނީ ފްލެޓްތަކަށް ފައިސާ ދައްކާ ޚަލާސް ކުރަން ޖެހޭނީ 25 އަހަރުގެ މުއްދަތަށް ބަހައިލައިގެން ކަމަށެވެ.
ހިޔާ ފްލެޓްތައް ބަލަން ބޭނުންވާ ފަރާތްތަަކަށް ޖުލައި 4 ވަނަ ދުވަހާ ހަމައަށް ފުރުސަތު ހުޅުވާލާފައިވާއިރު ފްލެޓް ލިބިފައިވާ ފަރާތްތަކަށް ފްލެޓް ދެއްކުމުގެ ކަންތައްތައް އެޗްޑީސީން ކުރިއަށް ގެންދަނީ އެކި ބައިތަކަށް ބަހާލައިގެންނެވެ.
